Lufta
për qytetërim
Gjenerata ime ka futur në të drejtën ndërkombëtare
principin madhështor: të drejtën për intervenim.
Kjo e drejtë në kohën e fundit ka mundësuar
tri luftëra çlirimtare: në Bosnje, në Kosovë
dhe tash në Afganistan. U takon fëmijëve tanë
që të vazhdojnë dhe këtë të drejtë
ta kthejnë në një detyrim universal. Për këtë
do t'iu duhet shumë më tepër se sa ndihma humanitare
e shprehjet e ngushëllimeve.
|
Kështu
thotë në një intervistë dhënë
para sa kohësh revistës Der spiegel, Bernard-Henry
Levy (BHL), intelektuali më me ndikim sot në opinionin
francez, ku i bën një shpjegim interesant intervenimit
amerikan në Afganistan. Po e botojmë në mënyrë
që lexuesi shqiptar të njohtohet me qasjen e këtij
personaliteti ndaj luftës më të re edhe për
shkak se BHL shumë vjet rresht ishte një mbrojtës
i vendosur i çështjes së Kosovës.
Zoti Levi, lufta në Afganistan ka ndarë inelektualët
në Francë dhe Gjermani. Ju jeni nga të paktët,
i cili që në fillesë gati pa kusht ka mbështetur
intervenimin e SHBA-së. Pse mbetët kaq i izoluar?
BHL: Si duket shumica e intelektualëve evropianë
nuk shqetësohet për fatin e popullit afgan. Ata
harrojnë se amerikanët po luftojnë jo vetëm
kundër terrorizmit, por edhe për ta çliruar
Afganistanin.
DS: A mos është synim kryesor i amerikanëve
hakmarrja?
BHL: Për çdonjërin që sheh tej hundës
së vet është e qartë se grushti kundër
Bin Ladenit ka për synim edhe çlirimin e afganëve
nga një sundim i tmershëm si dhe zhdukjen e njërit
prej sistemeve më të zeza të planetit.
|
DS:
Si e shpjegoni atëherë antiamerikanizmin e kolegëve
tuaj?
BHL:
Ai është mister. Unë nuk jam proamerikan. Kam demonstruar
kundër luftës në Vijetnam dhe kundër largimit
të Alendes në Kili, që ishte një inskenikm i
CIA-së. Llahtarisem nga dënimi me vdekje, i aplikueshëm
në Amerikë. Kam reagur me shumë zë edhe kur
është zgjedhur Xhorxh Bushi. Por për të qenë
i sinqertë, kjo luftë, për të cilën ai
është përgjegjës, është kryer çuditërisht
mirë. Për më tepër do të mund të ishte
premierë botërore.
DS:
Luftë pa ndonjë prapamendim imperialist? Disi të
ngjallë dyshime
BHL:
Antiamerikanizmi është më tepër se një
mosbesim. Ai është një nga konstantat stabile të
kulturës sonë politike, madje pasion. E pasioni e verbon
njeriun. Ky pasion nuk ka lindur me imperializmin amerikan.
DS:
Ku i shihni ju rrënjët e këtij pasioni, nëse
jo në arrogancën e një stërfuqie?
BHL:
Amerikanët janë, në kuptimin historik, një tip
i ri i kombit, të cilin Evropa gjithnjë e ka mbajtur në
distancë. Kombet tona të vjetra, gjoja kanë lindur
në një territor të përbashkët, në
një mbamendje kolektive, në një identitet popullor,
prandaj Amerika rusoiste [e ndërtuar sipas idealeve të
filozofit Zhan Zhak Rusó] është e padurueshme,
e denjë për neveri, një komb skandaloz i fabrikuar
me marrëveshje nga lart, në vend që të rritet
në mënyrë organike, nga posht.
DS:
Do të thotë kritika e imperializmit amerikan ka rrënjë
shumë më të thella?
BHL:
Te evropianët ende kotet fantazma e gjoja kombit të pastër,
një bashkësie të mirëfilltë por të
mbyllur. Për ta është e pakëndshme pamja e "fulteres
shkrirëse" ku përziehen kulturat. Ndërkaq në
rastin e fuqisë amerikane ky mosbesim i vjetër është
kthyer në një përbuzje për arrogancën amerikane.
DS:
Amerika si botë e materializmit, uniformimit dhe tredhjes
së mendjes - a mos është ende gjallë imazhi
i shtrembëruar për Amerikën e Hajdegerit?
BHL:
Ky është topuzi i të djathtës gjermane dhe franceze,
i cili, si në pasqyrë, ndodhet edhe te e majta. Hajdegeri,
por dhe ideologët francezë si Zhorzh Valoi, Pier Drilé
la Roshel dhe Sharl Morat, mendojnë se Amerika është
një katastrofë ontologjike. Kjo kundërshti e tmerrshme
metafizike, e cila gëlon në zemër të kulturave
evropiane, del në sipërfaqe sa herë t'i jipet rasti.
DS:
Pse atëherë urrejtja ndaj Amerikës në botën
islamike është dhe më e fuqishme?
BHL
: Për muslimanët Amerika është qëngji i
flijimit. Ata tmerrohen nga fakti se prej shekujsh ngadalë
po shkatërrohen. Humbja e madhështisë, rruga e këputur
e arsimimit, turpërimin që ua shkaktoi kolonializmi -
krejt kjo përjetohet si një poshtrim i Lindjes nga ana
e Perëndimit. Amerikanët kurrë nuk kanë qenë
forcë koloniale në Lindjen e Mesme, por njerëzit
atje i konsiderojnë si bartëse të "perëndizimit"
DS:
Por dhe si mbrojës të Izraelit, të cilin arabët
e konsiderojnë si fidan kolonial.
BHL
: Kjo është vetëm alibi. Izraeli dhe Amerika nuk
i kanë kontribuar turpërimit të arabëve. Ata
shërbejnë si zëvendësim, sepse arabët nuk
janë në gjendje ta shpjegojnë fatkeqësinë
e vet e të njohin fajin te vetja. Shumë arabë jetojnë
në botën e tyre magjike në të cilën mbretëron
kauzalja diabolike në të cilën SHBA dhe Izraeli të
thuash janë të njëjtë: Satanai i Madh dhe Satanai
i Vogël.
DS:
Athua për këtë po gëlokan kaq shumë
teori komploti, si ajo se sulmin në rrokaqiejtë njujorkas
e paskan organizuar Izraeli e Amerika për të pasur një
shkas për sulm kundër botës islamike?
BHL:
" Komploti amerikano-izraelit ", Nju Jorku si " kryeqytet
hebre " etj etj, këto janë ide të çmendura
të të djathtës ekstreme evropiane, fryma e të
cilave qarkullon nëpër shumë kryqytete arabe. Islami
në formën e vet fundamentaliste, në njëfarë
mënyre është fashizmi i tretë, ai është
fashizmi i gjelbërt, pas atij të murmë e atij të
kuq.
DS:
Megjithatë ju po i barazoni gjërat e ndryshme? Nacionalsocializmi
dhe komunizmi kanë qenë sekular, pra lëvizje antireligjioze
BHL:
me qendër kuazimistike. Të gjithë fundamentalizmat
e kanë të përbashkët dëshirën për
pastërti, ëndërrën për Njeriun e Ri, i
cili jeton në harmoni të plotë me vetën dhe
me mjedisin, bashkësinë. Dridhjet e integrizmit islamik,
janë grahmat e fundit të totalitarizmit nga shekuli i
kaluar.
DS:
Ju mendoni se fjala është për luftë civilizimesh,
për mbrojtjen e lirisë nga barbaria?
BHL:
Po, por jo luftë e Perëndimit kundër islamit. Lufta
e vërtetë mes civilizimeve po ndodhë brenda vetë
botës islamike. Shkak është zgjërimi i qytetërimit.
Kjo luftë do të zgjasë shumë dhe fundi i saj
është tmerrësisht i paqartë. Por besoj se ky
do të jetë konflikti i madh i shekullit XXI.
DS:
A nënkupton kjo se Perëndimi është i vetmi
pronar i vlerave të mirëfillta universale: lirisë,
demokracisë, individualizmit, të drejtave të njeriut?
BHL:
Ajo universalja, apo, si thoshte Hegeli, mendja botërore më
së shumti dhe në mënyrën më të vendosur
është zhvilluar në Perëndim. Por ekzistojnë
dhe forma të tjera të universales, ato paraqiten edhe
te islami, ekziston arsimimi arab, në shekullin XII që
përfaqësohej nga mendimtari Averoes.
DS:
Pse Islami nuk përqafoi racionalizmin?
BHL:
Arsimimi islamik është mundur, por nuk ka vdekur; ai është
i fuqishëm në Turqi dhe te disa mendimtarë në
vendet arabe, ani se i mundur e i ndrydhur. Vetëm muslimanët
mund ta bëjnë atë reformacion, tash u takon imamëve
të punojnë me vetveten, si dhe në shkrimet e tyre
të shenjta, ta bëjnë atë që të krishtërët
dhe hebrenjt e kanë bërë dikur.
DS:
Dhe çka do të duhej të ndryshonin?
BHL:
Muslimanët duhet të binden se Perëndimi nuk është
shkaktar i problemeve dhe poshtrimeve të tyre. Ata duhet ta
eliminojnë antisemitizmin e tyre, sëmundjen që po
zgjërohet me shpejtësi. Duhet të mos hedhin posht
individualizmin dhe të drejtën për të qenë
ndryshe. Duhet të pranojnë se dhe në fenë e
tyre ka diçka të keqe. Islami nuk është i
paprekshëm dhe fjala e zotit mund të interpretohet.
DS:
Në këtë rast do të vinte deri të ndarja
e politikës nga feja, pra deri të shoqëria laike.
Në këtë rast a s'do ta mohonte islami thelbin e vet,
sepse ai mëton ta brymosë njeriun, të bëhet
mënyrë jetese e jo vetëm bindje fetare?
BHL:
Mu në këtë tendencë integriste fshihet rreziku
totalitarist. Pse në islamin e sotëm laicizmi nuk mund
të jetë i pranuar siç ishte për krishtërimin
në shekullin XVI? Aq më tepër kur ai ekziston në
Turqi e në mënyrë më të vendosur në
Bosnje. Dhe mu për këtë është dashur që
ne t'i mbrojmë boshnjakët nga serbët, për të
ruajtur këtë model, si dëshmi e ekzistencës
së islamit perëndimor e modern.
DS:
A ekziston ende lufta e drejtë; amerikanët a po bëjnë
luftë të drejtë në Afganistan; pastaj intervenimi
në Ballkan a ishte i drejtë?
BHL:
Po, besoj se ashtu është. Intelektualët gjithnjë
ndodhen para dilemave si edhe pamja në pasqyrë: kjo është
dilema mes belicizmit dhe pacifizmit. Lufta si burim i tërë
sherreve dhe paqja për shkak të vetvetës. Kjo dikotimi,
kjo ndarje në dy pole ekstreme, e largon vëmendjen nga
opcioni i tretë, në të cilin pak prej tyre mendojnë,
e ky është lufta e drejtë.
DS:
Për ju paqja nuk është veëvetiu një
vlerë?
BHL:
Lufta asnjëherë nuk është e mirë. Estetika
e luftës që ka fascinuar shkrimtarët si Ernest Jinger
dhe te ne Gijom Apolinerin, Zhan Kokto ose Anri Monterlanin, qartazi
është derrëri. Është skandaloze t'i kushtosh
hymne luftës si kulm i burrërisë. Por lufta mund
të jetë edhe e pashmangshme, përkundër të
këqijave të saj, dhe ajo duhet bërë edhe pse
me dhimbje, dëme e humbje, sepse ka diçka më të
keqe se ajo: ferri.
DS: Megjithatë Kanti ka menduar për paqen botërore
dhe për luftën ka theksuar se ajo ka atë veti të
keqe se më tepër është krijuese e të këqijave
se eliminuese e tyre.
BHL:
Kjo nuk është e saktë. Ne njohim të keqen që
do të eliminohet nga Afganistani, por nuk e njohim të
keqen që mund të krijohet. Vë bast se kjo e dyta
do të jetë më pak e keqe se e para.
DS:
Një gjë shihet të jetë e sigurt: numri i
kandidatëve për atentate vetëvrasëse pas luftës
nëAfganistan nuk do të zvogëlohet. Përkundrazi.
BHL:
Kjo është diçka tjetër. Kurrë nuk kam
menduar se bombardimet janë mjeti më i mirë për
të mundur terrorizmin
Lufta kundër terrorizmit duhet
të bëhet në një rrafsh tjetër: duhet këputur
kanalet financiare, duhet zhvilluar spiunazhin, duhet mbledhur informacione,
duhet bërë presion diplomatik, dhe para së gjithash
Amerika, vendet perëndimore përgjithësisht, nuk duhet
të tregohen të kujdesshme ndaj vendeve që e tumirin
terrorizmin ose që e strehojnë atë.
DS:
Po mendoni në Arabinë Saudite?
BHL:
Natyrisht, dyfytyrësia saudite është e llahtarshme.
Ish-shefi i Aleancës së Veriut, miku im i ndjerë,
gjenerali Masud, më pati thënë se Bin Ladeni është
prodhim tipik i intrigave të oborrit saudit, thelbi i të
cilave është sedra dhe ambicja për të qenë
princ në vend të princit
Bin Ladeni nuk është
zëri i palestinezëve. Ai po lufton me kastën, të
cilës i takon, ai do pushtetin. Dhe kur dëgjoni se CIA
deri vonë ka pasur kontakte me të, të zë angushtia.
DS:
A besoni se terrorizmi do të çrrënjoset një
ditë?
BHL:
Kjo është sikur të më pyesni se a do të
zhduket vdekja, e keqja, lufta ose dhuna. Kjo nuk ka fund. Ne vetëm
mund të shpresojmë se terrorizmi do të zmbrapset,
se do t'i kundërvihemi, se do ta kufizojmë dhe izolojmë.
DS:
Apo krijon Bushi me mendjelehtësi te njerëzit iluzione
kur flet se do ta çrrënjos terrorizmin?
BHL:
Ka diçka që ngarkon Bushin dhe Blerin - ata po përdorin
retorikën e shkatërrimit. Ne mund të mbrohemi nga
terrorizmi, por nuk mund ta çrrënjosim. Njerëzimi
nuk mund ta mposhtë definitivisht atë që është
e tij dhe i takon: e errëta, e mallkuara, e liga
Terrorizmi
është hija e zezë e shoqërisë perëndimore
dhe ajo nuk do të na shqitet për shumë kohë.
DS:
Sodiologu Zhan Bodriar mbron tezën se terrorizmi, shikuar
në përmasa botërore, është e kundërta
absolute e globalizmit. Marksi ka besuar se kapitalizmi bart në
vete qelizën e vetëshkatërrimit. A vlen kjo edhe
për Amerikën, fuqinë që po udhëheq globalizmin?
BHL:
Bodriar, kjo është tipike për të, ka shprehur
në mënyrë tejet të komplikuar diçka që
është evidente. Natyrisht se terrorizmi po globalizohet.
Aktorët e tij sipas rregullit i takojnë elitës, e
jo më të varfërve dhe të paarsimuarve. Por kini
parasysh: Bodriari ka ngjallur pakënaqësi, sepse është
lënë përshtypja se ai ka thënë se Amerika
si avangardë e globalizmit, është fajtore për
fatkeqësinë e vet, se ajo vetë ka krijuar terrorizmin.
Ky qëndrim është i papranueshëm.
DS:
A nuk u përpoqën atentatorët në Nju-Jork
ta dëshmojnë këtë? Ai që sakrifikon jetën
e vet, duhet të jetë aq i rrezikuar dhe i dëshpruar
sa që nuk i mbetet rrugë tjetër - a nuk është
kjo porosia e kamikazëve?
BHL:
Ndoshta ju dëshironi ta paraqitni këtë kështu,
por kulti i vdekjes nuk buron nga dëshprimi. Fanatizmi i tyre
është një formë e shpresës. Ata shohin
vetën si fëmijë modernë të parajsës.
Janë plot shpresë se shpirti dhe mendja e tyre janë
të ndritshme. Në Sri Lankë kam pasur rastin t'i njoh
dhe t'i studioj vetëvrasësit. Ata nuk janë terrnakë,
por besojnë se dinë cila është zgjidhja. Janë
të bindur se po shkojnë në takim me të madhërishmin.
DS:
Këtu dhe qëndron forca e tyre: ata janë të
gatshëm të vdesin, ndërkaq perëndimi i frikësohet
vdekjes. Amerika do të dëshironte të mos i vritet
asnjë ushtar.
BHL:
Vendimi për vetvdekje është një armë absolute,
e vetmja kundër të cilës nuk mund të ndërmirret
asgjë. Këtë e shihni çdo ditë në
Izrael. Mundësia që çdo kalimtar të jetë
një bombë krijon psikozë masive. Ata terroristë
kanë një forcë të tmerrshme morale: aftësinë
për të shkuar deri në fund, të mposhtin instiktin
e vetëgjëllimit, të shtypin çdo dyshim. Kjo
i bën shumë të fuqishëm.
DS:
Ndërkaq amerikanët pëlqejnë t'i quajnë
atentatorët qyqarë.
BHL:
Ata nuk kuptojnë se çka ndodhë në kokat e
tyre. Më saktë, terroristët janë përbindsha.
Atentatorët vetëvrasës kanë kaluar nëpër
një trajnim të veçantë ushtarako-teknike por
edhe shpirtëror.
DS:
Një pastrim truri religjioz, si në ndonjë sektë?
BHL:
Më shumë se kaq mendoj, sepse ata nuk i nënstrohen
një disipline të verbër, pra nuk janë robotë
të disiplinuar. Prej tyre shpërthen një rrezatim
i jashtzakonshëm moral dhe intelektual. Ky terrorizëm
është më afër askezës se sa larjes së
trurit.
DS:
A mos është ky fundi i historisë, të cilin
pas rënies së komunizmit disa e kanë profetizuar
më tepër si periudhë të rritjes së rreziqeve
nga furtuna apokaliptike se sa si realizim të lirive dhe të
progresit.
BHL:
Hegeli, Aleksandër Kozhevi dhe Frensis Fukujama kanë gabuar
shumë. Historia nuk ka përfunduar në Jenë, Moskë
ose Nju-Jork. Kam vërejtur në Burundi dhe tjetërkund
në Afrikë, se në luftërat që shpërthejnë
jashtë çdo logjike, luftëtarët nuk dijnë
pse po luftojnë. Aty mbretëron në formë të
qartë një nihilizëm shpartallues, urrejtja dhe shkatërrimi.
Motivet ideologjik ekzistojnë vetëm si mbulesë për
brutalitet.
DS:
A duhet të kapitulojë mendja para tmerrit?
BHL:
Mendja nuk është e gjithfuqishme, filozofia herë
pas herë detyrohet ta zbresë flamurin. Para tridhjetë
vitesh kam besuar në revolucionin, në atë se bota
mund të ndryshohet në mënyrë radikale. Kjo ka
kaluar, jam bërë modest. Pesimizmi është në
qendër të veprës sime. Mu paraqitja e botës
së re, botës së përkryer, është vetvetiu
një ide barbare.
DS:
A mos po paralajmëroni me këtë se do të heqni
dorë nga çdo humanizëm?
BHL:
Jo. Nëse besoj në të keqen nuk do të thotë
se besoj në mallkimin. Nuk heq dorë nga përpjekjet
kokëforta që botën ta bëjë më pak
të keqe. Frikësimi nuk guxon të jetë fjala e
fundit. Gjenerata ime ka futur në të drejtën ndërkombëtare
principin madhështor: të drejtën për intervenim.
Kjo e drejtë në kohën e fundit ka mundësuar
tri luftëra çlirimtare: në Bosnje, në Kosovë
dhe tash në Afganistan. U takon fëmijëve tanë
që të vazhdojnë dhe këtë të drejtë
ta kthejnë në një detyrim universal. Për këtë
do t'iu duhet shumë më tepër se sa ndihma humanitare
dhe shprehja e ngushëllimeve.
Huazuar nga revista gjermane Der Spiegel.
|