Pas
safarit francez në Mitrovicë
Çfarë
halucinogjenesh përdorka gjeneral Valentaion?!
Shqiptar
OSEKU
Kreu
i NATO-s në Mitrovicë, gjenerali francez Marcel Valentain,
organizoi dje një shfaqje të pashijshme, madje makabër,
në qytetin e ndarë të Mitrovicës në veri
të Kosovës. I rrethuar nga ushtarë elitë francezë,
të shtërnguar në uniformë lufte e me gishtin
në këmbëz, gjenerali francez ndërmorri një
safari të shpejtë nëpër një pjesë
të zonës së kontrolluar prej serbëve në
Mitrovicë.
Qëllimi,
të cilin gjen. Valentain s'arriti t'u qartësojë gazetarëve
të habitur sa pa u kthyer në rehatinë e pjesës
shqiptare, ishte që atyre t'u dëshmojë se "gjendja
është plotësisht e qetë dhe normale" në
Mitrovicë!
"Asnjeri
nuk kërcënohet në veri. Gjithçka është
plotësisht e qetë dhe normale", u tha gjen. Valentain
gazetarëve të mbetur pa mend.
"Ky
nuk është qytet i ndarë. Secili mund të endet
kah të dojë, e a duan a jo kjo është punë
tjetër", tha ai.
Kumtesa
psikodelike e gjeneralit francez i ka lënë pa frymë
shqiptarët në Kosovë, por edhe shumë prej ndërkombëtarëve
këtu.
Ajo
vie pas trazirash të fuqishme në pjesën e dominuar
prej serbëve, që shpërthyen pasi K-Fori arrestoi
- pahiri, thonë disa - një prijës lokal të ekstremistëve
serbë. Trazirat i shtynë UNMIK-un dhe K-Forin që
ta evakuojnë (!) veriun e Mitrovicës. Veriu i Mitrovicës
iu la, pra, në dorë fraksioneve më ekstreme të
rebelëve serbë.
Trupat
franceze të gjen. Valentain, që dallohen për relatat
e veta të ngushta me qarqet ekstreme serbe, ishin të parat
që morën leje ta shkelin sërish pjesën veriore
të Mitrovicës. Kjo ndodhi tek javën që shkoi.
Mirëpo
atje s'guxon të qarkullojë ende lirisht as personeli shqiptar,
e as ai ndërkombëtar i UNMIK-ut. Madje atje s'endet dot
as personeli serb i UNMK-ut. Burime nga Mitrovica pohojnë se
ka serbë të punësuar në UNMIK që janë
shpërngulur me familje në jug, te lagja serbe pranë
kishës ortodokse, një hap ky i pamarrshëm me mend
vetëm një muaj më parë, nga droja prej bashkëkombasve
të vet ekstremistë.
Por
realiteti s'para dukej që ishte preokupim fort serioz i gjeneralit
francez gjatë shfaqjes së tij për publikun gazetaresk
në Mitrovicë.
"Si
patë, unë piva kafe në kafene, madje mora edhe ca
kokrra më tepër sheqer. Asnjeri s'u ankua, gjithçka
qe normale", tha ai. "E pra kështu është
situata këtu, krejtësisht normale".
Por
as mediat kryesore kosovare, të cilat rëndom i hanë
UNMIK-ut nga dora, kësaj radhe s'ndejtën dot pa e përqeshur
gjeneralin francez. Pas inserteve me Valentainin u njoftuan lajme
plotësuese prej safarit: se si gazetarët shqiptarë
ishin fyer e kërcënuar prej ekstremistëve serbë.
Se si trupat franceze i kishin ndaluar përdhunshëm gazetarët
shqiptarë prej intervistimit të "kalimtarëve
të rastit" serbë.
Gjen.
Valentain zgjodhi që ta fyejë vetrespektin e gazetarëve
shqiptarë edhe në përgjegjet dhënë pyetjeve
të tyre. Ai tha p.sh. se s'i kish patur tërë ato
forca të uniformuara rreth vetit për siguri, por si "masë
kujdesi", pa e ftilluar se ku konkretisht na qenka dallimi
mes këtyre. Në fund krejt, ai i ra llabut duke e porositur
- bukvalisht - korpusin e gazetarëve që të vejnë
te mediat e veta e të raportojnë besnikërisht për
"paqen" në Mitrovicë.
Franca,
e cila ka lidhje tradicionale me serbët e Siujdhesës Ilirike,
ishte shteti që refuzoi më së gjati planet e NATO-s
për fushatë bombardimesh kundër serbëve në
pranverën e vitit 1999. Pas luftës, një numër
eprorësh francezë janë pandehur për zbulim të
planeve të NATO-s te shërbimet informative serbe.
Përkundër
kësaj, mu trupave franceze iu besua përgjegjësia
për trevat senzitive të veriut të Kosovës në
kufi me Serbinë pas hyrjes së NATO-s në qershor 1999.
Njësoj si në Bosnje, regjimi francez në Kosovë
ka rezultuar në përparësi për prijësit
lokalë serbë, në raportim negativ për kundërpalët
e tyre, si dhe në kriminelë lufte që janë zhdukur
pa gjurmë.
Në
rastin e Kosovës, trupat franceze të K-Forit ishin ato
që e startuan trendin me të a.q. "enklavat etnike".
Ato qëndruan pasive kur ekstremistët serbë ndoqën
7 000 shqiptarë prej veriut të Mitrovicës, banorë
lokalë që e kishin mbijetuar tërë luftën
nëpër shtëpitë e veta. Më vonë, francezët
e penguan aktivisht kthimin e familjeve shqiptare, në disa
raste duke vajtur deri te gjobimi e paraburgimi i të kthyerve.
Sot
mëse 20 000 shqiptarë nga veriu i Mitrovicës banojnë
në pjesën jugore si ikanakë. Nga shqiptarët
në veri të qytetit kanë mbetur rreth 1 700.
"Cirku
francez s'i ngjanë asnjë tjetri", thotë te PASQYRA
një nëpunës shqiptar i UNMIK-ut, i cili do të
mbetet anonim.
"Familjet
e mbetura shqiptare në veri që i kanë thirrur në
ndihmë francezët me rastin e trazirave kanë gjetur
përgjegjen se atyre mund t'u ofrohet vetëm një transport
njëkahësh, drejt jugut, dhe pikë", thotë
ai.
Një
tjetër punonjës shqiptar në administratën e
UNMIK-ut, i cili poashtu dëshiron të mbetet anonim, pyetet
ironikisht se athua mos ka ndërruar zanat gjenerali Valentain.
"Të
thuash se Mitrovica është idilë, këtë s'e
bën dot njeriut pa u ëmbëlzuar më parë
me halucinogjene të kajshme".
Por
francezët në Mitrovicë e kanë cakun sigurisht
tjetërkund, e jo të shprehen si kullerat nr 1 të
NATO-s. Shumëkush mendon se francezët janë detyruar
tashti të dalin sheshazi në mbrojtje të prijësve
lokalë serbë në veri të Mitrovicës.
OKB-ja
dhe K-Fori hëngrën shumë kritikë kur evakuuan
në fillim të majit. Shefin e UNMIK-ut gjermanin Shtajner,
i cili thuhet se ka qëndrim më të rreptë ndaj
vozhdëve lokalë serbë, ky skandal e shtyri të
kërkojë se si t'u japë fund këtyre marifeteve
nëpër enklava. Ai dhe krerë të tjerë të
ndërkombëtarëve në Kosovë premtuan se do
t'i shpartallonin enklavat krejt.
Kuptohet
që ky s'është kumt i mirë për prijësit
lokalë serbë, e sidomos jo për ata më ekstremë
që profitojnë prej konfrontimeve. Ky s'qe kumt i mirë
as për Beogradin, që i ka operacionalizuar enklavat fort
mirë për të ushtruar trysni ndaj UNMIK-ut.
E
ajo që s'i pëlqen Beogradit në Kosovë automatikisht
nuk i pëlqen as Parisit zyrtar e gjeneralëve të tij
në Kosovë, pa marrë fare parasysh se a përdorin
ata halucinogjene a jo.
|