SHTYPI
SHQIPTAR
MARRËVESHJE
HISTORIKE APO ALEANCË FLUIDE
Shkruan
Fatos LUBONJA
"Historike"
ishte epiteti që një pjesë e politikanëve dhe
e bërësve të opinioneve në Shqipëri nuk
ngurroi t'i veshë marrëveshjes midis maxhorancës
dhe opozitës për zgjedhjen e presidentit konsensual Kuko
- Moisiu. Sipas tyre ishte historike jo pse Shqipëria gjeti
më në fund njeriun e përshtatshëm, por sepse
për herë të parë Nano dhe Berisha, dy lidérët
e mëdhenj, u ulën dhe u morën vesh për diçka
të rëndësishme. Kjo ulje dhe shtrëngim duarsh
midis Nanos dhe Berishës ose Berishës dhe Nanos, pra,
u konsiderua si çelje e një epoke të re në
politikën shqiptare, epokë kur problemet nuk do të
zgjidhen më me konfliktualitetin tradicional, por duke u ulur
dhe duke gjetur zgjidhje konsensuale. Madje, madje, disa analistë
dhe intelektualë të mirënjohur që kohët
e fundit janë shprehur kundër "kulturës së
dyshimit" në emër të një besimi të
ri tek politikanët shqiptarë, tek dialogu midis PS dhe
PD-së, tek konsensusi, tek ndërtimi i frymës së
komunitetit etj. etj., duket se e përshëndesin këtë
marrëveshje me nota mjaft optimiste.
Duke qenë se personalisht e konsideroj veten si pjesë
e kulturës së dyshimit dhe duke besuar se profesioni i
gazetarit është më së pari të gjurmojë
të vërtetat me shpirt dyshimi, të rrëmojë,
edhe të provokojë, kam rrëmuar mjaft nëpër
njerëz për të vërtetuar dyshimet e mia lidhur
me zgjidhjen Kuko - Moisiu. Mua më del se ndërkohë
që thuajse pjesa më e madhe e opinionit vë duart
në kokë me habi se si mund të zgjidheshin në
krye të shtetit persona thuajse anonimë, ajo loja e çuditshme
e mediave të kontrolluara nga politika e pushtetparasë,
që dita ditës manipulon një botë virtuale të
opinionit virtual publik që ushtron dhunë mbi botën
reale, mbi opinionin publik real, ka krijuar përshtypjen sikur
opinioni është i ndarë midis një shumice që
e quante këtë ngjarje "çelje e një epoke
të re" dhe atyre pak meskinëve apo dyshuesve apo
pretenduesve për president që e quajnë këtë
"vazhdim të historisë së vjetër".
Gjithsesi, në emër të fjalës së lirë
dhe jo fjalës "në shitje" unë po dua të
shpreh dyshimet e mia sepse kjo marrëveshje për presidentin
konsensual Kuko - Moisiu nuk më duket të jetë, ashtu
dhe aq një ngjarje historike në kuptimin e çeljes
së një epoke të re, por më shumë një
variacion mbi temën tradicionale të politikanit shqiptar,
që për hir të interesave të veta i ka sakrifikuar
gjithnjë sa principet aq edhe interesat e të gjithëve.
Zgjidhja
Kuko - Moisiu një aleancë e re fluide
Kohët
e fundit në Shqipëri ka ndodhur një fenomen që
në terminologjinë gazetareske dhe të politikanëve
është quajtur "aleancë fluide". Me aleancë
fluide u quajt më së pari aleanca Berisha - Meta, kundër
Nanos, për të hequr prokurorin Rakipi dhe për të
vendosur prokurorin Sollaku. Rezultati i saj, tashmë krejt
i qartë, ishte vendosja e një kryeprokurori, i cili i
la të qetë të gjithë politikanët shqiptarë,
pra që i dha fund demagogjisë nanoiste të luftës
kundër korrupsionit duke i siguruar edhe më tej politikanët
shqiptarë se mund të vazhdojnë të qetë
pazaret e tyre të pista në dëm të interesave
publike. Shumë shpejt aleancës fluide Meta - Berisha ia
zuri vendin aleanca fluide Nano -Meta. Pa shfaqur asnjë skrupull
moral dy kundërshtarët për vdekje në Partinë
Socialiste, kur kuptuan se lufta me njëri -tjetrin i nxirrte
si ata të dy ashtu edhe klanet rreth tyre duarthatë, i
pamë të shtrëngojnë duart dhe të bëjnë
një aleancë të re fluide për të ndarë
pushtetin midis tyre dhe që tani së fundi u shpreh me
sakrifikimin e kandidatit më të respektueshëm për
president që mund të paraqiste Partia Socialiste, Rexhep
Meidanit.
Me një gjuhë tjetër, "aleancat fluide"
mund të përkthehen edhe "aleanca të njerëzve
që nuk respektojnë asnjë princip kur vjen puna për
të ruajtur pushtetin e tyre". Dhe nuk mund të mohoet
se jemi në një periudhë kur këto aleanca po
lulëzojnë dhe vyshken me një dinamikë të
paparë ndonjëherë në tranzicionin shqiptar.
Kjo shpeshtësi është vërtet risi, por, sipas
meje, kjo risi në politikën shqiptare, më shumë
se çdo gjë është tregues i degradimit të
përshpejtuar moral të klasës sonë politike.
Gjithashtu kujtoj se nuk është hera e parë që
protagonistë si Berisha dhe Nano shpallin si marrëveshje
historike aleanca të tipit fluide që janë pasuar
nga drama historike. Më e turpshmja nga të gjitha ishte
ajo e 9 marsit 1997 për krijimin e qeverisë së pajtimit
kombëtar, e cila vetëm disa ditë më vonë
u pasua nga hapja nga ana e njerëzve të Berishës
e depove të armëve në të gjithë Shqipërinë,
çka i solli vendit një nga dramat më të rënda
në këtë periudhë tranzicioni. Nuk them se s'mund
t'i jepet Berishës dhe Nanos e drejta për t'i besuar se
kanë ndryshuar tashmë, se janë bërë më
të pjekur politikisht, ashtu sikurse edhe situatat kanë
ndryshuar, se nuk mund të shkonin përsëri deri tek
hapja e depove (njëri) apo arratisja nga detyra (tjetri), por
nga kjo e deri tek heqja e dyshimit se vështirë se mund
të konvertohen në respektues të principeve persona
që tërë jetën kanë provuar se politikën
e konceptojnë si tradhti të principeve në momentin
kur respektimi i tyre ka shkuar në drejtim të kundërt
me interesat e tyre më duket një hap i madh, i gabuar.
Ngjarje vërtet historike do të quaja arritjen e një
pjekurie të tillë në politikën shqiptare, që
do t'i bënte Nanon dhe Berishën dhe Metën & Co
të hiqnin dorë nga interesat e tyre për hir të
respektimit të ligjit e principeve (e më historikja fare
do të kishte qenë heqja dorë krejtësisht prej
tyre nga jeta politike), dhe jo aleancat fluide midis tyre. Të
identifikosh interesat e këtyre pak individëve me interesat
e krejt kombit është një nga grackat ku na kanë
futur këta individë dhe ta konceptosh demokracinë
si konsensus midis tyre kjo nuk mban fare erë demokraci. Në
fakt demokracia nuk është konsensus, dhe aq më pak
për gjëra që qëndrojnë nën interesat
e palëve; demokracia është më së pari mundësi
për të zgjedhur më të mirën midis opsionesh
të ndryshme, mundësi kompeticioni, aftësi për
të zgjidhur mosmarrëveshjet në mënyrë të
qytetëruar nëpërmjet dialogut dhe votës së
lirë. Nga kjo pikëpamje kam shumë arsye të dyshoj
se edhe marrëveshja e fundit për kandidatin Kuko - Moisiu
që përfundoi me zgjedhjen e presidentit të ri Moisiu
nuk është aspak një gjë demokratike, por është
në vazhdën e aleancave fluide, e që madje mund të
jetë me pasoja. Që të besoja të kundërtën
sipas mendimit tim, minimumi i kërkesës do të ishte
që Nano dhe Berisha të mos kishin konverguar tek emri
Kuko dhe as tek ai Moisiu si kukulla presidenciale, por tek zgjedhja
e një presidenti të vërtetë. (Sqaroj se nuk
kam më të voglin dyshim se Kuko ose Moisiu si intelektualë
mund të përfaqësojnë dituri dhe njohje dhe vizione
më të mira, më demokratike se Nano dhe Berisha, por
kjo nuk mjafton për një figurë që të gëzojë
respekt nga opinioni i gjërë, sepse ata nuk kanë
dhënë asnjë provë se mund të qëndrojnë
mbi palët, përkundrazi kanë dhënë prova
se mund të qëndrojnë vetëm e vetëm nën
palët ose jashtë palëve.)
Nano
dhe zgjidhja Kuko - Moisiu
Kur
Nano filloi lëvizjen për katarsisin arriti për një
çast të fitonte edhe simpatinë e Berishës.
Nuk kaloi shumë dhe u pa se atë lëvizje ai po e shfrytëzonte
thjesht e vetëm për t'u bërë president, çka
bëri që të humbiste mbështetjen e një pjese
që ndoshta do të mund ta kërkonte edhe të bëhej
president i Shqipërisë. (Për hir të së
vërtetës duhet thënë se kjo pjesë nuk ishte
në Parlament, ishte opinion i gjerë, por i papërfaqësuar
ose më saktë i tradhtuar nga përfaqësuesit e
tij në Parlament.) Sidoqoftë logjika ta donte që
një Nano i aftë për të parë përtej
interesave të tij personale, qoftë për hir të
vazhdimit të lëvizjes, qoftë për faktin se kur
e la atë nuk po gëzonte më mbështetjen, duhej
të hiqte dorë me kohë nga presidentllëku dhe
të kërkonte brenda grupit të vet të maxhorancës
atë person që do të mund të kishte të paktën
84 votëshin e që në njëfarë mase nuk do
të kontestohej me forcë nga Berisha dhe të tijtë.
Madje ky mund të ishte edhe ndonjë kandidat si Godo. Mirëpo
Nano e çoi deri në fund punën që të luftonte
vetëm dhe vetëm për përfitimin maksimal për
vete. Ai hoqi dorë vetëm kur hunda e tij, e mpirë
nga çdo lloj nuhatje etike dhe politike për shkak të
delirit të presidentllëkut, ndeshi fizikisht në murin
e së pamundurës. Pra, askush nuk mund të na bindë
se Nano sakrifikoi për hir të marrëveshjes. Nano
sakrifikoi atë që nuk mundej kurrsesi ta merrte, pra nuk
sakrifikoi asgjë përveçse interesit tonë që
të kishim një president, i cili të paktën të
kishte një integritet dhe një emër që do të
na bënta ta vendosim në hierarkinë tonë të
vlerave të respektuara mbi Nanon dhe Berishën.
Berisha
dhe zgjidhja Kuko - Moisiu
Po
ashtu duket qartë se edhe në raport me Berishën zgjidhja
Kuko - Moisiu ishte e vetmja që i kishte mbetur atij që
të mund të nxirrte përfitimin maksimal nga kjo mesele
për veten dhe pushtetin e tij dhe se, edhe këtë herë,
si në më të shpeshtën e herëve, kjo zgjidhje
ka shkuar në kah të kundër me atë të interesave
të vendit, pasi, siç e thashë edhe më lart,
zgjedhja në postin e presidenti e një njeriu që nuk
ka dhënë dhe nuk jep asnjë garanci se mund të
qëndrojë mbi Nano - Berishën, e ridikulizon seriozitetin
e politikës shqiptare dhe po ashtu nuk garanton aspak stabilitetin,
siç pretendohet, por krijon idenë e përkohshmërisë
dhe brishtësisë së institucionit më prestigjioz
të shtetit. Dihet se Berisha në fakt donte zgjedhje të
parakohshme, por nga ana tjetër kushdo që njeh realitetin
e marrëdhënieve të Shqipërisë me komunitetin
ndërkombëtar, veçanërisht, e ka të qartë
se këto zgjedhje nuk mund të kryheshin assesi në
këtë kohë. Pra, kushdo që do të provokonte
trazirën e zgjedhjeve të parakohshme në këtë
periudhë do të humbiste më shumë se do të
fitonte pikë politike. Prandaj them se Berisha pranoi më
në fund Kuko - Moisiun si zgjidhjen e optimale që i dilte
për të deligjitimuar sot maxhorancën dhe për
t'u bërë i gjithpushtetshmi i këtij vendi nesër
nëpërmjet zgjedhjesh të parakohshme, që do të
mund t'ia kërkojë këtij presidenti shumë më
kollaj sesa mund t'ia kërkonte Meidanit apo Godos.
Sadomasokizmi
dhe zgjidhja Kuko - Moisiu
Po
ashtu, zgjidhja Kuko - Moisiu përsëriti edhe një
tjetër fenomen karakteristik të lidershipit tonë
politik: arrogancën e politikanëve tanë ndaj opinionit
publik nga njëra anë dhe servilizmin tradicional ndaj
të huajve nga ana tjetër, me fjalë të tjera
mendësinë sadomasokiste, antidemokatike të tyre.
Madje me zgjidhjen Kuko - Moisiu mua më duket se arroganca
e tyre ndaj opinionit publik ka arritur një kulm të ri,
të paparë. Kur u zgjodh president Meidani, Nano vërtet
i ndryshoi kompetencat duke bërë që të ishte
kryeministri ai që do të kishte fuqinë më të
madhe, por megjithatë respektoi në njëfarë mase
kërkesën e vetëkuptueshme të opinionit publik
që figura e presidentit të ishte një figurë
publike e njohur, e provuar dhe e respektuar nga një shumicë
shqiptarësh. Edhe kur Nanos iu desh të ikte nga posti
i kryeministrit dhe prapë të ndryshonte qendrën gravitacionale
të pushtetit duke e zhvendosur atë tek kryetari i partisë,
(d.m.th prapë tek vetja) ndonëse zgjodhi për kryeministra
dy figura që mendonte se i kishte nën hyqëm, si Majko
dhe Meta, prapë ata ishin figura me emër në PS. Kurse
me Kuko - Moisiun arroganca e njëshit që të gjithë
të tjerët i sheh si zero që duhen t'i vihen prapa
atij për t'i rritur atij dhe vetëm atij vlerën dhe
pushtetin ka arritur kulmin. Me të njëjtën mendësi
të zerove që i vihen prapa njëshit janë emëruar
në Shqipëri kryeministra, ministra, diplomatë, janë
zgjedhur kandidatë për deputetë, drejtues partie
etj., etj. A thua se këta nuk vihen në postet e tyre për
të bërë punë, por për të kënaqur
epshet për gjithëpushtetshmëri të lidérëve
tanë, apo për të hapur shtigje pushteti për
tjerë delirantë gjithëpushtetshmërie. Dhe Shqipëria
ka mbetur në mjerimin e klasës politike që ka sot.
Sa për aspektin tjetër të medaljes së sadomasokizmit,
servilizmin ndaj të huajve, zgjidhja Kuko - Moisiu më
duket se nuk do koment.
*
* *
Sikurse
u mundova të shpjegohem mua veshi më kap disa melodi të
vjetra në këtë këngë që disa kompozitorë
dhe këngëtarë të mirënjohur të marrëveshjeve
gjoja historike të tradhtuara po prej tyre po mundohen të
na e shesin si të re. Qoftë edhe thjeshtë si dyshime
ato mendoj se duhen patur fort parasysh. Sipas mendimit tim qëndrimi
i opinionit publik ndaj politikanëve shqiptarë nuk është
e drejtë të quhet produkt i një kulture dyshimi.
Dyshimi është pjesë e pandarë e çdo kulture
që kërkon të zhvillohet, madje edhe e kulturës
fetare: "Një besim pa dyshimin është një
besim i vdekur" -thotë Shën Pali. Qëndrimi që
opinioni publik reflekton ndaj politikanëve shqiptarë
është më saktë të quhet thjesht mosbesim,
dhe ky mosbesim është produkt i një eksperience të
gjatë zhgënjimesh për shkak të abuzimit të
tyre me pushtetin, për shkak të vënies së interesave
të tyre mbi gjithshka. Ky mosbesim le të qëndrojë
si presion mbi ata që bënë marrëveshjen e fundit
për president konsensual, si sfidë për të na
provuar të kundërtën.
Gazeta
"Shekulli"
|