Essay
KU MBETI FEMRA SHQIPTARE?
Ku
mbeti femra në fushatën zgjedhore në Kosovë?
Kosova u çlirua prej serbëve; po kush do ta çlirojë
viktimën më të dhembshme shqiptare, femrën,
prej primitivizmit patriarkal të burrit shqiptar?
Shkruan:
Ardiana SHALA
Ne
femrat që po i përcjellim fushatat zgjedhore në Kosovë,
në IRJM e në Kosovën Lindore, e që mendojmë
për vetveten, për nënat, motrat e bijat tona, kemi
arsye të jemi të dëshpëruara. Ose shoqëria
shqiptare i ka zgjidhur të gjitha problemet me çlirimin
e femrës, meqë ato s'përmenden asgjëkund; ose
ato probleme janë aq të thella e të mishëruara
në fundamentet e shoqërisë, sa askush as guxon ta
shpiejë mendjen te to.
Diskriminimi
i padiskutueshëm i femrës prej mashkullit në shoqërinë
shqiptare, më konkretisht: diskriminimi im, i nënës
sime e i motrës sime, e diskrimini i ardhshëm i bijave
të mia, që rezulton në atë se neve na mohohet
sistematikisht e drejta e zgjedhjes së lirë dhe e drejta
e konkurrimit në kushte të njëjta si mashkulli, patriarkalistët
shqiptarë thonë se rrjedhka nga "natyrshmëria
e krimit tonë". Ata mundohen pafytyrësisht t'i bëjnë
argat angarie arsyen e shëndoshë, shkencën, e, pse
jo, edhe Allahun Xheleshanehu tok me Jezu Krishtin, për të
na rrëmbyer neve femrave çdo shans të jetës
së lirë e të barabartë me mashkullin!
Si
çdo sistem tjetër diskriminues, edhe patriarkati orvatet
t'i dekurajojë e t'i satanizojë idetë që i shkojnë
kundër. Pesë strategjitë standarde defanzive të
çdo sistemi: injorimi; përqeshja; izolimi; kërcënimi;
dhe dhuna; janë njëherit edhe fytyra e patriarkalizmit
në ballafaqim me kërkesat e kohës.
Në
strategjinë e dominimit mashkullor mbi ne femrat, rol qendror
luan p.sh. përqeshja e feminizmit. Feminizmi, thonë analfabetët
patriarkalë, kërkoka njëjtësim të femrës
me mashkullin. Po mashkulli e femra janë biologjikisht ndryshe,
apo jo? Ja pra, sa e gabuar që është tërë
ideja e barazisë gjinore...
Por
feminizmi nuk kërkon *njëjtësim* të mashkullit
me femrën. Përkundrazi, femiznimi kërkon pikërisht
respekt për dallimet, duke kërkuar kushte të njëjta
për konkurrencë në arenat e ndryshme të shoqërisë
pa marrur parasysh dallimin gjinor.
Njerëzit
janë e duhet të jenë të ndryshëm e unikë,
por ata duhet të gëzojnë shans të njëjtë
në jetë. Nëse dikush ka disavantazh pse ka lindur
me sy të kaltër, hundë të gjatë, këmbë
të shkurta, a vagjinë në vend të penisit, kësaj
i thonë diskriminim.
Ç'do
të thoshin burrat sikur dikush t'ua ngushtonte atyre horizontin
jetësor, vetëm pse kanë lindur mashkuj? Si do t'u
pëlqente sikur dikush t'ju përplaste në fytyrë
mendimet e ndryshkura të fundamentalistëve islamikë
e kristianë, si receta se si duhet hequr dorë nga barazia?
Tjetërku në Evropë, në atë Evropë
ku burrat tanë po duan të hyjnë për vrimë
të çelësit nëse s'i lënë ndryshe,
feminizmi është tipar dallues i shoqërive të
qytetëruara. Arritjet në lëmin e barazisë gjinore
janë të numërta. Diskriminimi i femrës prej
mashkullit, patriarkati, është një sistem që
është ndërtuar e sofistikuar përmes një
procesi të ndërlikuar socioekonomik për një
kohë relativisht të gjatë (ndonëse jo bash aq
të gjatë sa duan të thonë përkrahësit
e tij). Sfidat e parë të feminizmit janë shfaqur
tek në fillim të qindvjetëshit të shkuar, e
pendat e para kundër patriarkatit në nivel shoqëror
janë ngritur vetëm aty kah mesi i atij qindvjetëshi,
pas disa prej ngjarjeve më definuese në historinë
e qytetërimit. Femizmi është proces qytetërues,
pra, që ka zgjatur ca më pak se 100 vjet, e gjatë
tërë kohe janë arritur këto suksese: është
miratuar e drejta e votës për femrat; si dhe janë
miratuar një sërë ligjesh që synojnë barazim
në lëmitë e trashëgimisë familjare, e të
drejtave të shkollimit, e të drejtës së prindërisë,
e tregut të punës, etj. etj. Procesi qytetërues ka
arritur sot deri atje, sa femrës i është miratuar
edhe e drejta e kontrollit mbi gjenitaliet e veta (femra ka të
drejtë të ketë seks me kë të dojë
kur të dojë, si dhe të refuzojë të ketë
seks me këtë të dojë e kur të dojë
- bazuar mbi preferencat e veta personale e jo bazuar mbi ato të
meshkujve kujdestarë në familje) si dhe ajo e kontrollit
mbi trupin e vet (e drejta e abortit).
Kjo
është gjendja në atë Evropë, të cilën
burrat tanë po e lakmojnë për vete, por duke i mbyllur
sytë kryeneçësisht për nevojat e nënave,
grave, motrave e bijave të tyre.
E si
u merr mendja, athua vallë, se do ta pranojë kjo Evropë
në gjirin e vet popullin absolutisht më patriarkal të
kontinentit? Apo mendojnë burrat tanë se e kanë gënjyer
Evropën, e se ajo s'u njeh fytyrën e tyre të vërtetë?
Nëse
dikë e rren mendja në këtë pikë, mund t'i
them që këtu: kur shikoni se si Evropa i mbyll sytë
para primitivizmit shqiptar, mos mendoni se i mbyll prej padijes
- po prej tmerrit e neverisë!
Sa
herë që i kam ngritur këto çështje për
diskutim me burrat shqiptarë, gjithmonë është
gjetur një kodosh i hallakatur të më pyesë,
se athua jam unë njëmend shqiptare. Po ku bën që
femra shqiptarë të mendojë, he ruana Zot, se femra
paska të drejtë të vendos vet për tërë
trupin e vet, përfshirë këtu edhe gjenitaliet e veta!
Përgjegja
e thjeshtë është: Po, shqiptare jam. Mua biles ma
merr mendja se jam shqiptare dyfish më i madh se sa gjysmakët
patriarkalë, meqë besoj jo vetëm te meshkujt, por
edhe te femrat shqiptare: kam besim, pra, jo vetëm te vetja
ime, por edhe te nëna ime, te motra ime, e te bijat e mia;
te nënat, motrat e bijat e gjysmakëve, si dhe te nënat,
motrat e bijat e tërë shqiptarëve tjerë. Meqë
praktikisht gjysma e kombit shqiptar janë femrat, del se unë
jam e pakta 50 përqind më shqiptar se secili prej tyre.
Unë dua këtu t'i pyes publikisht ata, ç'i shtyn
ata të besojnë aq marrëzisht, se ata, vetëm
pse kanë lindur meshkuj, paskan të drejtë ta privojë
femrën prej kontrollit mbi trupin e vet!?
Mos
u merr gjë mendja atyre se qenkan më të zgjuar, më
të urtë, më të aftë, më të zot
a më të moralshëm se, ta zëmë, motra/t
e nëna e veta, e se motrat e nënat tjera të kombit
shqiptar, vetëm pse kanë penis e jo vagjinë!? Se
qenkan p.sh. më të zgjuar, më të urtë,
më të aftë, më të zot a më të
moralshëm se, ta zëmë, Teuta, Shote Galica, Flora
Brovina etj, vetëm pse ata kanë penis, e ato vagjinë!?
Meqë
injorantët ngulmojnë se është ashtu, atëhere
rrjedh se ata kujtokan që tiparet e zgjuarësisë,
urtësisë, aftësisë, zotësisë e moralit
njerëzor pushokan në - penis!
Unë
për vete besoj se këto tipare, të cilat kanë
shkëlqyer sa e sa herë në historinë e kombit
shqiptar, pushojnë krejt tjetërkund. E se femra shqiptare
është poaq e zonja - në mos qoftë biles edhe
më e aftë se sa mashkulli - t'i mbrojë e zhvillojë
vlerat e mirëfillta të qytetërimit shqiptar: nëse
i jepet një shans, sall një shans i vetëm!
Por
ky komunikim mes shekujsh i ka vështirësitë e veta:
banorët e mesjetës, si primitivët e patriarkatit,
s'e honepsin dot këtë gjakimin tonë modern, e ne
femrat moderne e kemi të vështirë t'i marrin për
zemre botëkuptimet primitive të mesjetës. Në
këtë komunikim të bllokuar, është detyrë
e politikës të ndërmjetësojë.
E ç'bën
politika jonë?
Përgjegja
është sa e thjeshtë, aq edhe tragjike. Politika jonë
s'bën gjë prej gjëje.
Posi,
ajo pranon urdhërin e ndërkombëtarëve që
në Kosovë 30 përind (!) të parlamentareve të
jenë femra. Por pse u desh të priste urdhër, pse
jo të kërkojë vet jo 30 po 50 përqind - a s'është
Kosova me 50 përqind banorë femra!? Apo qenkan meshkujt,
të cilët na nxorrën bash në dritë me politikat
e tyre, 70 përqind më të mirë se ne femrat!?
Ku
mbeti femra në fushatën zgjedhore në Kosovë?
Ku mbeti femra e shtypur gjer në palcë në zgjedhjet
në IRJM? Ku mbeti femra në Preshevë, në Bujanoc
e në Medvegjë? Femra, hej, gruaja juaj, nëna juaj,
motra juaj, bija juaj - ku e latë ore femrën?
Kosova
u çlirua prej serbëve; po kush do ta çlirojë
viktimën më të dhembshme shqiptare, femrën,
prej primitivizmit patriarkal të burrit shqiptar?
Pyetjet
jehojnë, enden të vetmuara nëpër shkretëtirën
patriarkale, të quajtur "Komb Shqiptar". I cili qysh
në hymnin e vet ta tregon fytyrën e vërtetë:
"Kush është burrë (!) nuk frigohet..."
|