Ngadhnjimi
i opozitës sjell relief të ri politik në IRJM:
TANI FILLON PROVA JETIKE PËR ALI AHMETIN
Shkruan:
Naser SELMANI
Zhvillimi
i i qetë i zgjedhjeve parlamentare në Maqedoni e rezultati
që doli prej tyre në mënyrë të pakthyeshme
hapin një faqe të re të historisë së vendit.
Dalja masive në votime e përcaktimi pro opcionit opozitar
në të dy blloqet etnike ofron një kualitet inkurajues.
Prej ngadhnjimtarëve pritet që besimin e fituar ta përdorin
për të mirën e përgjithshme, për të
stabilizuar situatën e sigurisë, për të hapur
procesin e pajtimit ndëretnik e të zhvillimit ekonomik.
Fitorja
e partisë së Ali Ahmetit te shqiptarët dhe e Branko
Crvenkovskit te maqedonasit nuk e befasoi askënd. Por sihariq
i vërtetë ishte thellësia e fitores. Sepse, as vet
opozita s'kish pritur një ngadhnjim kaq bindës. Partia
Bashkimi demokratik për integrim e Ali Ahmetit fitoi afër
150.000 vota ose, llogaritur në përqindje, mëse dy
të tretat e zgjedhësve shqiptarë, duke zënë
16 vende deputetësh në kuvendin e IRJM-së. Partia
socialdemokrate e Branko Cërvenkovskit, trashëgimtare
e komunistëve, mblodhi afër 500. 000 vota dhe 60 deputetë,
apo rrafsh gjysmën e mandateve të kuvendit 120-vendësh.
Tre partitë tjera shqiptare së bashku kanë fituar
10 deputet, 7 nga PDSH-ja e Arben Xhaferit, 2 nga PPD-ja e Abdurahman
Halitit, dhe vetën 1 nga Partia Demokratike Kombëtare
e Kastriot Haxhirexhës.
Ish
kryeministri maqedon, Lubço Georgievski, në të
ardhmen do të udhëheq me opozitarët në parlament
me 33 deputetë. Georgievski & Xhaferri i humbën zgjedhjet
me faqe të bardhë, meqë kanë arritur ta ruajnë
një fuqi të konsiderueshme në parlament. Humbësit
e vërtetë në këto zgjedhje janë partitë
sllave-maqedone që veten e quajnë të qendrës,
të cilët s'fituan dot asnjë vend deputeti.
Vota: për paqe, me liderin e UÇK-së
Rezultati
i zgjedhjeve ka ndikuar në shtendosjen e situatës së
përgjithme në vend. Midis qytetarëve të dy blloqeve
etnike mbretëron një situatë më e relaksuar
sepse askush më nuk druan nga kërcënimet e VMRO-
DPMNE-së dhe PDSH-së. Sjellja e dhunshme e drejtuesve
të këtyre dy partive ishte shëndruar në një
rrugë veprimi për të ruajtur pushtetin.
Sa
për Ali Ahmetin, ai duhet të jetë koshient se premiera
e tij politike është ndihur prej shumë faktorëve.
Praktikisht çdo gjë ishte në favor të Ali
Ahmetit.
Aleati
më i fortë i Ahmetit në këtë duel qe lufta
e vitit të kaluar. Ajo përfundoi me nënshkrimin e
Marrëveshjes së Ohërit, që i përmirësoi
të drejtat kulturore e gjuhësore të shqiptarëve.
Te pjesa dërmuese e shqiptarëve të Maqedonisë,
Ahmeti është shëndruar në një figurë
mitike, që paraqet më shumë se llogaritë politike
të ditës. Lidhja e shqiptarëve me Ahmetin, si drejtues
i Ushtrisë Çlirimtare Kombëtare, është
më shumë emocionale se sa politike. Ai është,
thjesht, mishërim i njeriut që riktheu dinjitetin e përbuzur
të shqiptarit nga pushtetet e ndryshme sllave-maqedone.
Armiqtë
më të mëdhenj politik të Ahmetit, blloku Xhaferri
& Georgievski, në këto zgjedhje u vunë padashur
në shërbim të fushatës elektorale të Ahmetit.
Partia e Xhaferrit, me politikën e vet tij tinzare kundër
Ahmetit, i irritoi pa masë shqiptarët. Dilema e shpifur
se kush qenkesh trashëgimtari i vërtetë i UÇK-së
u dëshmua si e paqëlluar. Këtë debat Xhaferi
dhe liderët tjerë shqiptarë e kishin të humbur
para se ta fillonin. Askush më shumë se Ali Ahmeti s'mund
të ishte UÇK, as edhe ish-komandantët që Xhaferi
i kish bindur t'i bashkangjiten partisë së tij.
Për
zgjedhësit e Ahmetit, vota për Ali Ahmetin ishte votë
për implementin e plotë të Marrëveshjes së
Ohërit. Vota për BDI-në e Ahmetit ishte, pra, votë
kundër PDSH-së dhe PPD-së, sepse me pëlqimin
e këtyre partive ishte ndryshuar marrëveshja e kontraktuar
në Ohëri. Vota për Ahmetin ishte, poashtu, ndëshkim
për partitë me fajin e të cilave dështoi nisma
për Këshillin koordinues të shqiptarëve, i cili
promovonte bashkëpunimin ndërshqiptarë pas mbarimit
të luftës.
Rejtingun
e Ahmetit te elektorati shqiptar ia rriti edhe sjellja e partisë
së kryeministrit Georgievski gjatë fushatës parazgjedhore.
Kërcënimet e ministrit të punëve të brendshme
Lube Boshkovskit se do burgosë Ahmetin paraqiste një reklam
që nuk mund të blehej me asnjë çmim. Ky kërcënim
kundër Ahmetit, sado që tensionojë situatën,
shqiptarët e kuptuan si kërcënim që para së
gjithash ishte drejtuar kundër tyre, prandaj shumica dërmuese
u vunë përkrah tij.
Faktor
tjetër për triumfin e Ahmetit ishte edhe përkrahja
e fortë ndërkombëtare. Ali Ahmeti ishte benjamin
i tyre. Me të ndërkombëtarët nënshkruan
marrëveshje për ndërprerjen e luftës ndërsa
me politikanët shqiptarë nënshkruan marrëveshje
politike, që u quajt e Ohërit. Të gjithë ndërkombëtarët
pa përjashtim deklaronin se Ahmeti ishte garancia për
realizimin e marrëveshjeve të nënshkruara dhe kthimin
e paqes në vend. Ai si gjatë luftës dhe pas saj me
përpikmëri kishte respktuar marrëveshjet e nënshkruara
me ndërkombëtarët.
Armiku më i madh i Ahmetit: vet Ahmeti
Por
me fitoren që kori në zgjedhje hallet e Ahmetit nuk mbarojnë,
përkundrazi ato sa kanë filluar. Sfidat vijnë nga
të gjitha anët, nga struktura e brendshme të BDI-së
së tij dhe nga faktorë të jashtëm maqedon e
ndërkombëtarë. Sfidë e vështirë për
Ahmetin pas hyrjen në qeveri dhe ballafaqimit me problemet
do të jetë forcimi i strukturës partiake që
është ende e paetabluar mirë. Ahmeti rreth vetes
duhet të afrojë njerëz të aftë, e jo puthadorë.
Duhet të depolitizojë dhe departizojë institucionet
e sistemit dhe të luftojë krimin e organizuar dhe korrupsionin.
Vetë hyrja në pushtet dhe shijimi i privilegjeve mund
ta 'zbutin' Ahmetin dhe shokët e tij. Nëse hyrjen në
qeveri nuk e kuptojnë si rast për të promvuar interesat
e përgjithsme të shqiptarëve duke realizuar premtimet
parazgjedhorejnë, e jo mundësi për t'u akomoduar
në pushtet, atëherë armiku më i madh i Ahmetit
për të dështuar do të jetë vetë Ahmeti.
Problem
tjetër delikat për Ahmetin është se duhet të
bashkëqeveris me socialdemokratët e Cërvenkovskit,
ish komunistë që e kanë përsosur artin bizantin
të thikës në shpinë. Partizanët e Cërvenkovskit
në të kaluarën janë dëshmuar si antishqiptarë
e antiperendimorë, dhe si të tillë si antireformatorë
kryeneçë. Gjatë tërë konfliktit në
teritoret ish jugosllave ata përkrahën haptazi kërdinë
e Milloshevqit kundër popujve të tjerë. Mirëpo,
atë janë të arsimuar e pragmatistë të paskrupullt
me përvojë të madhe politike. Nëse shqiptarët
pozicionohen fuqishëm në qeveri, socialdemokratët
sllavë-maqedonas do të zgjedhin urtësisht të
jenë konstuktivë në raport me Ahmetin.
Kjo
u dëshmua katërçipërisht pas publikimit të
rezultatit zyrtar të zgjedhjeve. Socialdemokratët më
herët kishin thënë se s'do të bashkëpunonin
kurrë, kurrë, kurrë me "terroristët e Ahmetit".
Mirëpo pozicionimi i vendosur i BDI-së dhe i faktorit
ndërkombëtar bënë që socialdemokratët
ta ndryshojnë qëndrimin brenda natës. Crvnekovski
deklaroi ngutësisht se BDI-ja e Ahmetit është subjekt
"me mandat të pakentestueshëm të elektoratit
shqiptar", e se izolimi i saj ishte i pamundshëm.
Cilat
ministri do t'i drejtojnë shqiptarët?
Si
pasojë, ka gjasa reale që kryetari i i ri i kuvendit të
IRJM-së të jetë mu nga radhët e subjektit "me
mandat të pakontestueshëm". Është thuajse
e sigurtë se shqiptarët do të drejtojnë resorin
e arsimit dhe shkencës, meqë ata duan t'i zgjidhin çështjet
e finansimit publik të arsimit sipëror në shqip.
I rëndësishëm për shqiptarët edhe në
këtë mandat do të jenë resori i drejtësisë,
prej ku pritet të dalin një sërë ligjesh konform
Marrëveshjes kornizë. Në agjendën e bisedimeve
me socialdemokratët shqiptarët mund të marrin edhe
një resor ekonomik, ose shëndetësinë, pushtetin
lokal ose ministrinë e transportit dhe komunikacionit. Por
çdo gjë ende është në sferen e spekulimeve.
Prej
tashti një gjë është e sigurtë, se roli
i ndërkombëtarëve për përpilimin e paltformës
qeveritare dhe ndarjen e resoreve do të jetë thuajse vendimtar.
Mbledhja konstituive e kuvendit të IRJM-së pritet të
mbahet me tre tetor, ndërsa qeveria e re e koalicionit LSDM-BDI
pritet të formohet deri në fund të muajit.
|