Në
vend të editorialit
DY
PREMTIME SA PËR FILLIM
Shkruan:
Shqiptar OSEKU
Desha
t'ja nis detyrës si kryeredaktor duke i shkruar nja dy fjalë
për veten time, si dhe duke i trasuar një çikë
synimet që i kam me revistën PASQYRA, edicionin e internetit.
Kur
m'u lut z. Shatri që ta marr përsipër detyrën
e kryeredaktorit, mendova gjatë para se t'i them po. Së
pari desha ta di saktësisht se cilat do të ishin detyrat
e mia. Ditëve të javës unë shërbej si punonjës
i sociales në Stokholm të Suedisë, e detyra e kryeredaktorit
duhej patjetër të korrespondojë me këtë
fakt. Idealizmi, siç dihet, s'blihet me para, por edhe idealistëve
u duhet ta mbushin barkun disi. Puna te revista PASQYRA për
shumë prej nesh ka qenë krejtësisht ideale. Po si
njeri i martuar me fëmijë (një gocë të
mrekullishme 1.5 vjeç), këtë punë do shoshitur,
pra, edhe nga drejtime, t'i quajmë pragmatiste. Duhej qartësuar
për vetveten: Sa orë në javë do të mi
merr kjo punë? Sa orë mund tia kushtoj revistës
PASQYRA, pa e lënë mënjanë atë që
e kam absolutisht më të shtrenjtën, familjen time?
Unë
sot jam 32 vjeç, e jam arratisur prej Gjakovës sime
në Suedi si 17 vjeçar. Në Suedi kam studiuar 3.5
vjet në lëmin e punës sociale, pranë Universitetit
të Stokholmi. Në mediat shqip kam botuar qysh ditës
së parë në ekzil, së pari te "Republika"
e z. Sali Kabashi, i cili në vitet 1991-1993 qe bërë
si një Faik Konicë i dytë për Kosovarët,
e pastaj me radhë te Bujku, te QiK-u i dikurshëm, te Koha
Ditore, e më vonë edhe te KosovaPress-i, te KosovaLive
etj etj, duke e ndjekur kësisoj zhvillimin e shtypit shqip
në Kosovë.
Posaçërisht
vendimtare për mua qenë vitet 1994-1999, kur punoja (idealisht
si rëndom) si Sekretar për shtyp pranë Zyrës
së Kosovës në Stokholm, me detyrë përpilimin
e informacioneve suedisht për shqiptarët. Këto ishin
vitet kur e kam vërejtur qartë e dhembshëm se çfarë
hendeku e ndan gazetarinë tonë prej kërkesave të
kohës. Një kohë kam shërbyer si gazetar pranë
Radios Suedeze, seksionit shqip. Ata që më njohin e dinë
që kam botuar vazhdimisht shqip e suedisht te revistat e komunitetit
shqiptar në Suedi, që kam nxjerrur dy vëllime poezish,
e përkthyer një antologji shqip-suedisht anasjelltazi
në të dy gjuhët.
Së
dyti, desha ta di se cilët do të ishin njerëzit me
të cilët do të bashkëpunoja më intimisht.
Siç e merrni me mend, kam dashur të di pak për
më tepër edhe për kolegët e mi të revistës,
shumë prej të cilëve si kam takuar kurrë.
Kur ka njeriu punë profesionale në njërën anë,
e familje në anën tjetër, një detyrim ideal
si ky i kryeredaktorit ia shton një përgjegjësi të
madhe. Minimumi që kërkohet është, që njerëzit
me të cilët premton të bashkëpunosh t'i kenë
kuptuar e aplikuar për një copë here fundamentet
e fjalës së lirë e të gazetarisë së
lirë.
Shumë
prej pikëpyetjeve më janë përgjegjur, disa kanë
mbetur të marrin përgjegje në kursin e udhës,
e disa kanë mbirë krejt të reja. Ajo që është
me rëndësi të thuhet që këtu është,
se si kryeredaktor jam i interesuar për komunikim të drejtë.
Dërgoni komente, lavdata e kritika (konstruktive, kuptohet)
dhe ju premtoj që do të ju lajmërohem.
Deri
tani kemi prodhuar bashkarisht disa numra jashtëzakonisht cilësorë.
Revista PASQYRA ishte e para që shkroi për rendet e kosovarëve
para ambasadës joformale serbe në Prishtinë, për
të marrur pasaporta. Poashtu, revista PASQYRA qe e para - dhe
e vetmja deri tani! - që e vuri në dyshim urtësinë
e atyre që e kanë vënë lojalistët veriirlandezë
të RUC-ut, të paditur për krime etnike, tu
prijnë policëve të ri të Kosovës. Etj etj.
Ambicia ime është që t'i kemi njësoj të
gjithë numrat vijues. Artikujshkruesit që deri tani e
kanë përbërë boshtin kurrizor të revistës,
do të kenë edhe më tej një rol qendror te ne.
Pse
është me rëndësi të kemi sukses me revistën
PASQYRA?
Për
mua personalisht, përgjegja është e thjeshtë.
Unë ambicie politike në skenën shqiptare skam
- jam anëtar aktiv i liberalëve suedezë tash sa kohë,
ajo më del mjaft e tepër. E megjithatë, gjaku ujë
nuk bëhet. Dhe, si secila kafshë tjetër shoqërore,
edhe unë kënaqem nga një shkrim i mirë, i qëndisur
gjuhësisht, i dendur e i saktë, për politikën
e shoqërinë shqiptare.
Ndër
shqiptarët, mjerisht, mediat analitike të pavarura e cilësore
janë fort të kursyera në numër. Mediat shqiptare
kryesisht kanë rënë (e nganjëherë edhe
zgjedhin vetë të bijnë) pre e grupeve me interes
politik, ekonomik e/a kriminal. Në rastet më eklatante,
grupet e interesit që pandehet se kontrollojnë media te
ne kanë origjinë të huaj, me orientim tradicionalisht
antishqiptar. Po në shumicën e rasteve bëhet fjalë
për media të brishta, që gjëllijnë në
një ambient intolerant, nën trysni të forta politike
e ekonomike (e besa edhe tjetërfare!) prej qarqeve që
s'janë fare të interesuara ta pasqyrojnë laryshinë
e botës shqiptare.
Kjo
nuk është e rastit. Historia e këtyre dyqind vjetëve
të fundit e ka dënuar një grusht kombesh evropiane,
si shqiptarët, gjermanët, baltikasit etj, me një
incitament jashtëzakonisht të vështirë. E ky
incitament, ndonëse në pezullim e sipër, vepron ende
me fuqi të mnershme mbi viktimat e veta, aq më tepër
mbi viktima aq të pambrojtura si janë shqiptarët:
kombi më i varfër, më i vetmuar e më i vartur
i tërë Evropës.
Mediat
shqiptare janë pasqyrimi më rrëqethës i këtij
realiteti. Po i rrahe guximshëm si gazetar shqiptar temat "e
ndjeshme", ty të kanoset përnjëherë rreziku
nga shqipfolësit që luajnë kujdestarët e rendit
lokal. E po ngulmove edhe më tej (nëse mbetesh gjallë!),
atëherë do të gjenden qarqe të jashtme të
të damkosin.
Sa
herë ju merr mendja p.sh. që do të mund të shkruanit
analiza te "Koha Ditore", e përditshmja më autoritative
në Kosovë, për, ta zëmë, ëndërrën
shqiptare për bashkim kombëtar, pa iu prerë asaj
fondet e ndërkombëtarëve? Sa herë mund të
shkruash te "Lobi" për korrupsionin shqiptar e sllav
në Maqedoni, te "Rilindja Demokratike" kundër
autokracisë së Berishës, te "ZiP" për
djallëzirat e Nanos, te "Koha Jonë" për
pushtimin e heshtur grek në Shqipëri?
Më
e besueshmja është që as s'do t'ju jepej rasti kurrë,
as sa për be!
Është
lehtë që në ditët e sotme, kur është
shtuar zhurma masmediale edhe te shqiptarët, të gabosh
e të mendosh që ka kaluar koha e idealizmit. Mua s'më
thotë mendja ashtu. Përkundrazi, sot është edhe
më vështirë të jesh idealist, pikërisht
për shkak të zhurmimit të shtuar. Ishte lehtë
të ishte gazetar shqiptar në kohën e Konicës,
kur gjërat ishin ende bardhezi. Sot kërkohet perspektivë
më e hollë, zgjuarësi më e hollë, penë
më e hollë. E vetmja që duhet trashur sot është
boshti i kurrizit, pa dyshim.
Përmes
këtij mesazhi, dua t'i falënderoj bashkëpunëtorët
tanë, që e kanë vënë vazhdimisht perspektivën,
zgjuarësinë e penën e vet të hollë në
shërbim te opinionit shqiptar te revista PASQYRA. Përmes
tyre e me ta, PASQYRA, përkundër të gjitha kufizimeve
të veta, është ndër mediat e rralla shqiptare
që mund të krenohet me pavarësinë e vet totale.
Mbi
të gjitha duhet falënderuar lexuesit tanë të
numërt. Qëkur doli edicioni i internetit, kemi mundur
të vërejmë një mori rëniesh në ballinën
tonë, kryesisht prej trojeve tona etnike, por edhe prej katër
anëve të botës. Unë për vete dua të
besoj, se opinioni shqiptar kështu dëshmon se e çmon
analizën e paanshme e guximin qytetar të bashkëpunëtorëve
tanë.
Tani
kur PASQYRA i ka qitur hapat e parë në botën e internetit,
ajo ka potencial të luajë rol prijatar, duke u hapur e
treguar rrugën mediave tjera që duan ta ndjekin shembullin
e saj. Poashtu, interneti i jep mundësi revistës PASQYRA
të komunikojë me lexues në tërë hapësirën
shqiptare, në vend se të kufizohet në ndonjërën
prej ngastrave artificiale të saj.
Në
të ardhmen, revistën PASQYRA do të përpiqem
ta orientoj më tepër kah disa drejtime speciale. Mendoj
se sështë e mirësjellshme ti maltretojmë
ata që duan ta lexojnë horoskopin, apo të mësojnë
të gatuajnë ushqime, për këtë ka sigurisht
sajte më të mira në internet. Në vend të
kësaj, revista PASQYRA në vijim do të orientohet
më tepër drejt analizave në lëmitë e politikës
dhe ekonomisë. Ajo që lexuesi do të gjejë te
ne është si vijon:
Pasqyrim të paanshëm të zhvillimeve në të
gjitha trojet etnike
Pasqyrim të botës, nga këndvështrimi universal
e nga ai shqiptar
Sinqeritet maksimal, deri në kufi të jokorrektësisë
politike - meqë kjo na ka ardhur maje hunde!
Për
sa thashë më lartë, unë mund tju jap besën.
Do t'ju premtoj vetëm një gjë. Në qoftë
se gjithçka shkon ashtu si duhet, e nëse vazhdoni të
jepni kontributin tuaj, në fund të këtij viti s'do
të ketë bir nëne që t'ju shtrojë dy pyetje:
"Kush është PASQYRA?" dhe "Kë e mbështetni
ju?". Sepse a) të gjithë që i thonë vetit
se dinë shkrim-lexim do ta kenë marrur vesh se kush është
PASQYRA, dhe b) po ata do ta dinë që PASQYRA nuk e mbështet
askë tjetër, pos lirisë së mendjes e fjalës
shqiptare.
|