NJË
RRUGË E LARGËT SA NJË ËNDËRR
Shkruan: Xhafer SHATRI
Natyrisht
se duhet të kërkohen ndihma e kredi për të ndërtuar
rrugën Durrës Prizren, por parasegjithash duhet provuar
dhe mundësitë vetanake, konkretisht duke shkundur edhe
xhepat shqiptarë.
Dhe sidomos duhet të funksionojë shteti: polici duhet
të jetë polic e jo hajdut, doganieri të mos jetë
plaçkitës, funksionari të mos jetë maskara.
Historia
Ne
mesvitet nëntëdhjetë, kur në ish-Jugosllavi
luftërat bënin kërdi dhe kur shihej se as Kosova
nuk do të mund ti shmanget më të keqes, kryetari
i atëhershëm dhe i tashëm i Kosovës, Ibrahim
Rugova, në njërën prej gjumave të tij hodhi
idenë për ndërtimin e rrugës Lezhë-Prizren.
Kjo ishte si kallëzimi i një ëndërre dimërore
për qërshitë. Pak kush i frikësohej asaj që
vinte: se kjo rrugë shpejt do të kthehej ne një lumë
që do të bartë qindra mijëra ikanakë mbi
të cilët rëndonte tmerri e dhimbja kosmike. Ata do
lënin në pamëshirën e zjarrit dhe urrejtjes
serbe shtëpitë, tokën, të gjallët dhe të
vdekurit e tyre.
Nuk vonoi shumë dhe po kjo rrugë jetoi kthimin e madh
të njerëzve, të shpresës, të lirisë
që në Kosovë kishte munguar mbi 20 shekuj.
Do të mjaftonte historia gjysmëvjeçare e kësaj
rruge për të qenë ajo më shumë se një
arterie komunikimi, më shumë se një faktor rëndësor
zhvillimi ekonomik e kulturor kombëtar e rajonal.
Zhgënjimi
Pas
Luftës nëpër këtë rrugë filluan të
kthehen në Kosovë mërgimtarët e saj të
shumtë. Ata që kishin edukuar fëmijët e tyre
me një dashuri të pakufishme për Kosovën dhe
për Shqipërinë do kthehen familjarisht në Kosovën
e lirë dhe këtë kthim do ta bëjnë nëpër
Shqipëri! Ata dikur këtë kthim vetëm kanë
mundur ta ëndërrojnë.
Këta që kishin jetuar një jetë të tërë
në vendet më të zhvilluara perëndimore gjatë
kthimit do të përballen me një zhgënjim të
dhimbshëm. Që në portin e Durrësit do të
takojnë llymin e burokracisë ballkanike: Mbush këtë
formular, paguaj këtë taksë, paguaj dhe këtë
zotëriun që po të ndihmon të kryejsh këtë
procedurë më shpejt, paguaj diçka dhe për
shokun polic, diçka për shokun kryedoganierë etj.,
etj. Dhe kjo nuk përfundonte me kaq. Sepse plaçkitja
nuk do të ndalej deri në Qafë të Morinës!
Dënime me të holla për pikë të qejfit,
plaçkitje me pretekstet më grotesk.
Apo e ashtuquajtura «përcjellje me stafetë»,
kur vargani prej dhjetra ose edhe qindra veturash përcillej
nga një patrullë e policisë se një rrethi deri
te patrulla e policisë së rrethit tjetër, e ku vargani
detyrohej të presë nga pesë orë, sepse patrullës
së policisë nuk i ecej përpara pa pas marrë
haraçin e vet
Në këtë rrugë ka pasur edhe mërgimtarë
që janë vrarë nga bandat, të cilat, sipas mediave
vendore kanë bashkëpunuar dhe me policinë. Me një
fjalë kjo rrugë në kujtesën e mërgimtarëve
të Kosovës e mori emrin që nuk do të guxonte
ta merrte kurrë: rruga e plaçkitjes dhe poshtrimit që
bëheshin në emër të shtetit shqiptar!
Projekti
Pasojat
ekonomike, pa folur për ato politike e morale, të këtij
trajtimi krejt të papërgjegjshëm mund të merren
me mend: qindra mijëra mërgimtarë edhe sot kthehen
përmes Malit të Zi, Greqisë e Maqedonisë, duke
paguar taksa të rrasta rruge e transiti. Një pjesë
e mirë prej tyre kalojnë ndonje ditë pushimi në
bregdetin grek e malazez
Ndërkohë që me një
përkujdesje minimale të shtetit shqiptar rruga Durrës
- Qafë e Morinës do të bëhej një burim
i konsiderueshëm për ekonominë e brishtë shqiptare.
Në këtë kuadër nisma e kryeminsitrit Pandeli
Majo për ndërtimin e kësaj rruge strategjike ndërshqiptare
është mbështetur jo vetëm nga mërgimtarët
por nga i gjithë opinioni kosovar.
Mundësitë
vetanake
Me
rastin e planifikimit dhe zbatimit të këtij projekti madhor
duhet paraparë edhe mundësinë e kontributit të
atyre që janë nevojtarët më të mëdhenj
të tij, pra të mërgimtarëve. Në vende të
zhvilluara si Franca, Italia etj., në jo pak akse nacionale
ka peage (vendpagesa per taksën e rrugës).
Por për të filuar kjo praktikë paraprakisht duhet
forcuar prezencën efektive të policisë rrugore, duhet
mbykqyr trafikun, duhet ndëprerë keqtrajtimin e njerëzve
në doganë dhe në rrugë. Në këtë
rast do të ishte normale që çdo veturë e jashtme
që hyn e Shqipëri në Qafë të Morinës
apo në portin e Durrësit të paguajë, ta zëmë,
një taksë prej 10 eurosh dhe tiketën ta kthej detyrimisht
pastaj në doganën në dalje, pra ne Durrës ose
në Qafë të Morinës. Në këtë mënyrë
edhe do të kontrollohej abuzimi i mundshëm me shtypjen
e tiketave false, por edhe do të evitohej vjedhja e parave.
Fillimit të kësaj praktike do të duhej dhënë
një publicitet meritor në media gjithandej.
Në të kundërtën, pra nëse vazhdohet si
gjer më tani, një sasi e konsiderueshme e kursimeve të
mërgimtarëve tanë do të shkonin në arkën
e Malit të Zi ose Greqisë e Maqedonisë. Dhe ndoshta
dhe për këtë fakt dhe për të pasur mundësi
qarkullimi më të lehtë nëpër Mal të
Zi, vetëm në një kanton të Zvicrës konsullata
serbe ka shpërndarë vikendin e kaluar hiç më
pak se 800 pasaporta që u janë dhënë shtetasve
të Kosovës. Për të qenë dhe me keq, k listat
e marrësve të tyre do tu dorëzohen edhe institucioneve
ndërkombëtare për të provuar në mënyrë
krejt konkrete «lojalitetin» e mëtejmë të
kosovarëve ndaj Beogradit.
Bashkëpunimi
Tiranë-Prishtinë duhet të jetë më konkret
Në
realizimin e këtij projekti një kontribut rëndësor
do të duhej të japin edhe institucionet e Kosovës.
Së pari duke u bërë thirrje shtetasve që të
mos marrin më pasaporta serbe, që të jenë në
kontakt të vazhdueshëm me qeverinë shqiptare, duke
kërkuar që kjo arterie e rëndësishme komunikimi
ndërshqiptar të jetë të paktën e sigurtë
për tranzit, që krahas ndërtimit, zgjërimit
e asfaltimit, në rrugën ekzistuese të bëhen
riparime në vazhdimësi: mbushje gropash, hapje e pompave
të benzinës pranë rrugës, parkpushime qoftë
edhe të improvizuara etj.
Kjo edhe sepse patriotizmi pa një mbulesë konkrete gjithnjë
e më tepër po kthehet në karikaturë.
Edhe mediat do të mund të luanin një rol të
rëndësishëm po qe se do të përcillnin rregullisht
atë se çka po ndodhë në këtë rrugë.
Pa munguar të jenë prezente në portin e Durrësit
por dhe gjithandej, ku gazetaria hulumtuese nuk ka vënë
kurrë këmbën.
Ky aks i rëndësishëm që do të lidhte tokësisht
Kosovën dhe Veriun me Jugun e Shqipërisë e të
gjithë tok me Evropën ka nevojë imanente dhe për
trajekte vendore, të një cilësie më të
lartë e shërbimi me standarde evropiane, sepse përmes
tyre në Shqipëri nuk do të vërshojnë vetëm
mërgimtarët por dhe turistët që janë oksigjen
i domosdoshëm për mëkëmbjen ekonomike të
vendit.
Natyrisht se duhet të kërkohen ndihma e kredi për
të realizuar këtë projekt, por parasegjithash duhet
provuar dhe mundësitë vetanake, konkretisht duke shkundur
edhe xhepat shqiptarë.
Dhe sidomos duhet të funksionojë shteti: polici duhet
të jetë polic e jo hajdut, doganieri të mos jetë
plaçkitës, funksionari të mos jetë harbut.
|