Rreziqet
e anarkisë së komunikimit
KONFLIKTI I DY PUSHTETEVE NË KOSOVË
Shkruan:
Xhafer SHATRI
Kjo
verë ka qenë shumë e nxehtë në Kosovë.
As reshjet disajavëshe të shiut nuk po mund ta ftohin
prushin politik, i cili nxori për herë të parë
në formën më të hapur konfliktin e mprehtë
të disa institucioneve vendore me disa institucione ndërkombëtare.
1.
Më 12 gusht në ora 16h, në ambientet e Hotelit të
Madh u arrestua Rrustem Mustafa, gjegjësisht gjeneral Rremi.
Një figurë e luftës e njohur në krejt Kosovën.
Arrestimi u bë, si në film, para qindra njerëzve
dhe me pjesëmarrjen e shumë forcave të policisë
së UNMIK-ut dhe KFOR-it.
Zëdhënësi
i policisë ndërkombëtare Derek çapell deklaroi
se «Arsyet e arrestimit të tij kanë qenë hetimet
e kryera deri më tash, sipas të cilave personi në
fjalë dyshohet se ka keqtrajtuar, ka mbajtur në arrest
ilegal dhe ka vrarë të paktën pesë persona
»
Të
nesërmen, më 13 gusht, zyrtarët e UNMIK-ut bën
të ditur se prokurori ndërkombëtar kishte ngritur
një aktakuzë kundër Ramush Haradinajt, kryetar i
AAK-së, partia e tretë për nga ndikimi në Kosovë.
Ai akuzohej për rrezikimin e jetës së disa personave
dhe, siç e nënvizoi zëdhënësja e UNMIK-ut,
Suzan Manuel, akuza lidhej me një aktakuzë tashmë
të ngritur kundër disa eprorëve të TMK-së,
të Zonës së Dukagjinit të arrestuar në
muajin qershor. Personazh kyç i së cilës është
vëllau i Ramushit, gjenerali Daut Haradinaj, një emër
tjetër emblematik i luftës së fundit në Kosovë.
Ngarkimi penal ishte i rëndë: vrasje, lëndime të
rënda trupore, arrestime të paligjshme dhe rrezikim i
sigurisë së të tjerëve. U nënvizua se viktimat
ishin shqiptarë.
Të
njëjtën ditë në Prekaz KFOR-i kishte ndërmarrë
një aksion të madh për kërkimin e armëve.
Gjatë këtij aksioni ishin përdorur edhe buldozerët
që kishin rrëmihur oborret. Buldozeri i KFOR-it një
lëvrim veçanërisht të thellë e kishte
bërë në oborret e Sami dhe Nuredin Lushtakut, që
të dy gjeneralë të luftës së fundit. Ky
i dyti edhe komandant i Gardës së Kosovës.
Por
Prekazi i njohur për pushkë e sakrifica dëshmoi se
nuk i mungon as mendja e hollë: një delegacion i katundit
qëndresëtar ia bëri me dije KFOR-it se nëse
nuk e heqin rrethimin e pakuptimtë të katundit (që
zgjaste prej katër ditësh) brenda disa orësh ata
do të shpërnguleshin prej aty.
Dhe
KFOR-i u tërhoq, duke lënë prapa krahas hullive e
grumbujve të dheut dhe një shije të keqe që
kaloi larg përtej kufijve të Drenicës.
Shtrohet
pyetje a janë këto ngjarje të rastit, a është
fjala për veprime që nuk kanë asnjë lidhje njëri
me tjetrin?
2.
Dy-tri ditë para arrestimit të gjeneral Mustafës,
në Mitrovicën veriore policia e UNMIK-ut «nuk arriti
ta arrestonte» Milan Ivanoviqin, njeriun që dihet publikisht
se udhëheq formacionin ushtarak Rojat e Urës, një
strukturë që është organizuar, udhëhequr
e financuar nga UDB-ja e Serbisë. Milan Ivanoviq ngarkohet
se në një manifestim anti-UNMIK, mbajtur në prill
të këtij viti, forcat e tij kanë plagosur me bomba
e me armë të tjera të paktën dhjetë policë
ndërkombëtar.
Ivanoviqi
u strehua në Beograd, por autoritetet serbe nuk po pranojnë
tia dorëzojnë atë organeve ndërkombëtare
të drejtësisë.
3.
Prej arrestimit të Daut Haradinajt, qershor 2002 e der më
sot janë organizuar një mori protesatash e demonstratash
në shumë qytete të Kosovës. Këto protesta
me kohën u kthyn në një rit dhe kishin gjithnjë
e më pak pjesëmarrës. Por, me acarimin e klimës
politike në Kosovë, protesta e mbajtur më 15 gusht
në Deçan u kthye në një konfrontim të
hapur e brutal të vendorëve me forcat e policisë
dhe ushtrisë ndërkombëtare. Pasojat ishin dëshpruese:
50 protestues dhe 11 policë e dy ushtarë ndërkombëtarë
të lënduar, 23 shqiptarë të arrestuar!
4.
Më sa shihet protestat lidhen drejtpërdrejtë edhe
me mënyrën e komunikimit të arrestimeve nga administrata
ndërkombëtare: shpeshherë në kumtesat apo deklarimet
e zyrtarëve ndërkombëtarë thuhet se personat,
në këtë rast personalitete që njeh krejt Kosova,
u arrestuan, sepse kanë vrarë, kanë arrestuar dhe
kanë torturuar bashkëkombasit e tyre. Ata që nuk
marrin vesh në procedurën penale i përkujtoj se një
person i ngarkuar për çfarëdo vepre, pra edhe penale,
mund të shpallet fajtor vetëm pasi aktgjykimin e shkallës
së parë ta ketë shqyrtuar dhe vërtetuar gjykata
e shkallës së dytë, pra pasi që aktgjykimi të
jetë bërë i plotfuqishëm.
Forma
e tillë e komunikimit të zyrtarëve ndërkombëtarë
apriori të pandehurit i kthen në fajtorë dhe krijon
opinion shumë negativ për personat e arrestuar, sepse
ata kanë një emër, kanë familje, kanë fëmijë,
kanë miq, kanë të njohur dhe të gjithë
këta nuk mund të marrin pjesë në gjykimin që
nesër mund ti shpallë të pafajshëm. Thënë
më ndryshe kjo është një përbaltje me kaci
që para opinionit të gjerë asnjëri prej të
arrestuarve kurrë nuk do të mund të lahet në
tërësi!
5.Si
reagoi paria e Kosovës ndaj ngjarjeve që tronditën
vendin? Pas përleshjes në Deçan i pari që
reagoi ishte kryetari i Kosovës, Ibrahim Rugova. Kumtesa e
tij ishte krejt e shkurtë. Ajo dënonte protestuesit dhe
arsyetonte sjelljen e forcave ndërkombëtare.
Qeveria
i ndërpreu pushimet. Në mbledhjen e parë paspushimore
qeveria u nda më dysh: 5 veta votua pro, të tjerët
abstenuan. Kryeministri arrestimet i shpalli me motive politike
dhe të arrestuarit si të burgosur politikë. Ishte
një deklaratë tejet emocionale dhe sigurisht e nxitur
nga ndonjë këshillues jo vetëm i paaftë, por
edhe i papërgjegjshëm.
Të
nesërmen u mbajt mbledhjja e Kuvendit të PDK-së,
qëndrimet e të cilës i përmblodhi në një
paraqitje televizive kryetari i saj Hashim Thaçi, i cili
me qëndrimin e tij dukej jokoherent, në çështje
themelore i paqartë dhe i pasigurt edhe pse shihej haptas se
po lexon një tekst që kishte përpara. Për të
qenë më i saktë ai i shkeli i pari qëndrimet
e qeverisë
Disa
ditë më vonë, pasi kjo punë u pashat, në
ekranin e RTK-së doli kryetari i Kuvendit, Nexhat Daci. Paraqitja
e tij nuk ishte as intervistë as intervenim i një homme
détat - burrë shteti.
Opinionit
i mbetej të zgjedhë në mes qëndrimit të
kryetarit të Kosovës, që arsyetonte arrestimet, qëndrimit
të kryeministrit, që ishte preras kundër tyre, qëndrimeve
të Thaçit dhe të Dacit që ishim hëm ashtu,
hëm kështu!
Paria
e Kosovës pra nuk kishte qëndrim unik. Për më
keq, shihej se ajo është krejt e ndarë edhe përbrenda
blloqeve: atij të «luftës» dhe atij «pacifist».
Sepse kishte nuanca të theksuara në mes Rugovës dhe
Dacit, sikundër që kishte edhe në mes asaj që
thoshte Bajram Rexhepi dhe asaj që thoshte Hashim Thaçi.
Paria
e Kosovës pra, nuk kishte qëndrim, sepse qëndrimi
nuk ndërtohet për një ditë, sepse qëndrimi
nuk ndërtohet sipas motit apo sipas modës, por është
një vijë e pashkëputshme që një udhëheqje
duhet ta ndërtojë dhe ta mbrojë me konsekuencë.
6.
Administrata ndërkombëtare është një përbërje
shumë heterogjene. Në të ka nëpunës, diplomat,
polic ushtarakë etj, shumë kompetentë, shumë
të përkushtuar për ta kryer sa më mirë
detyrën evet, por ka dhe të tjerë, që nuk janë
të paktë e që Kosovën e shohin si mundësi
për të mbushur xhepat me të holla, për tu
zhdepur me mish të pjekur, por edhe me mish të gjallë.
Të dy llojet janë kudo të pranishëm. Ata i ka
seleksionuar me kohë kolona e pestë e Serbisë, e
cila pa asnjë ngarkesë me psikologjinë ballkanike
të komplotit, me bën të them se është fort
dhe kudo e pranishme dhe qëllimi i saj është që
të mos lërë gurë pa lëvizur në mënyrë
që në Kosovë të mos ketë kurrëfarë
bashkëpunimi në mes vendorëve dhe ndërkombëtarëve.
Për
këtë qëllim paria e Kosovës duhet ta ndërtojë
qëndrimin e saj, të mësojë abecenë e komunikimit
me administratën ndërkombëtare, por dhe me opinionin
e brendshëm dhe të jashtëm, tu dalë në
udhë gjërave para se të ndodhin.
Sepse
në të kundërtën ndasitë do të thellohen
shumë, brenda vendorëve së pari e pastaj edhe me
ndërkombëtarët. Dhe këtu do të fitojë
vetëm Serbia dhe aleatët e saj të hapur e të
fshehur që statutin e ardhshëm të Kosovës do
ta thurin me ndihmën e hunjve, që ndryshe quhen faje dhe
papërgjegjshmëri e parisë dhe e institucioneve të
Kosovës.
|