LDK-PDK
0,5 me 0, Turni i dytë premton tensione
Skërdi
SIKA
S'ka
dyshim që 4 marsi i sivjetëm, për Kosovën shënon
datë historike. Për herë të parë në
historinë e vet, në qoftë se i harrojmë eksperimentet
dështake qeveritare të zz. Rugova e Thaçi, Kosova
ka qeveri, parlament e president të zgjedhur me vota demokratike.
Ashtu si ndodh zakonisht në demokraci, status quoja e radhës
rezultoi pas një shahu të gjatë e të mundimshëm
politik, në të cilën të gjitha palët hoqën
dorë nga diçka, kush më shumë e kush më
pak. Më shumë u detyrua të heq dorë, pa asnjë
dyshim, PDK-ja. Në qeverinë e re kosovare, ndikimi i udhëheqjes
faktike të të a.q. "krahu i luftës" është
kufizuar forcërisht. Poashtu, kryeministri i ri, z. Rexhepi,
ndonëse i afiliuar me luftën çlirimtare e me UÇK-në,
megjithatë është fort largë grupimit që
e udhëhoqi atë luftë.
Tërheqje taktike është dashur, natyrisht, të
bëjë edhe LDK-ja. Nëse i lëmë mënjanë
shpjegimet imagjinative të krerëve të LDK-së
pas ujdisë politike të partive, është fakt se
LDK-ja i ka dëshiruar (e i dëshiron hala ethshëm)
të gjitha postet udhëheqëse të sistemit politik.
Fakti që kryeministri megjithatë doli nga radhët
e PDK-së, LDK-së duhet t'i ketë dhembur sikur kur
ta nxjerrin një dhëmb të shëndoshë.
Në lëmin e ngatërruar të politikës kosovare,
megjithatë mund të thuhet se LDK-ja e ka nxjerrur një
gjysmë poeni të vlershëm. Kjo jo për shkak të
peshës së zyreve të fituara, meqë kryetari ceremonial
i Kosovës de facto ka më pak pushtet se sa kryeministri,
por për shkak të interpretimit që i është
bërë procesit në opinionin publik kosovar.
Në demokracitë e mirëfillta, çfarë mund
të thuhet deridiku se është bërë tash Kosova
(e pakta më e mirëfilltë se demokracitë fqinje),
imazhi është gjithçka: futja në dorë
e postit të kryetarit të Kosovës, ëndërr
e ethshme e z. Rugova, dhe eliminimi i z. Thaçi e i krerëve
tjerë të "krahut të luftës" nga loja
për post të kryeministrit, në opinion është
interpretuar, thjesht, si fitore e kulluar e Rugovës. Kjo i
jep zemër ithtarëve të LDK-së para zgjedhjeve
të ardhshme lokale, e kërcënohet t'i dekurajojë
oponentët e tij, të cilët -përsëri!- u
bënë dëshmitarë se si përlanë bulldozeri
me shall i quajtur Ibrahim Rugova.
Pas mbarimi të procesit, ka qenë habitëse t'i dëgjosh
pandehmat e do analistëve, të cilët seancën
parlamentare të 4 marsit e komentonin si "ceremoniale",
"rituale", "formale" etj etj. Është
interesant të vëresh se një koment të tillë
s'e gjen dot njeriu në mediat e huaja. E vërteta është
se po kaq "ceremoniale" e "formale" janë
seancat e tilla në të gjitha demokracitë parlamentare;
kur s'ka ndonjë zor fort të madh, vetëm aktorët
dytësorë në parlament -a amatorët!- i thirrin
votat pa e patur shumicën me vete. P.sh. ngulmimi i përsëritur
i LDK-së që krye në vete ta instalojë z. Rugova
në krye të Kosovës, në këtë kontekst
flet më shumë për amatorizmin e LDK-së, se sa
për ambiciet e tyre.
Në anën tjetër, ambiciet s'janë lojë. Pikërisht
ambiciet e papajtueshme të LDK-së e të PDK-së,
gjegjësisht të krerëve të këtyre dy partive
rivale, premtojnë një vazhdim fort interesant të
politikës kosovare.
Në teori, mund të ndodhin edhe mrekullira. Meqë si
Rugova, ashtu edhe Thaçi, janë bërë (e pakta
teoretikisht) fanatikë të demokracisë, të tregut
të lirë e të afrimit me Perëndimin, ata mund
t'ia shtërngojnë dorën njëri-tjetrit vëllazërisht
e të punojnë bashkë tash e tutje. Dhe, meqë
jemi në fushën e fantazisë së lirë, edhe
znj. Trajkoviç, edhe ajo poashtu e konvertuar në ungjillin
e demokracisë, mund të vendosë që, ta marrë
djalli, t'ia japim një shans Kosovës! Fundja, në
demokraci ku ekziston treg i lirë e kufinj simbolikë,
e ku Serbia, Kosova e tërë regjioni janë të
integruara me Perëndimin, çka luan rol se a mbahesh
me Prishtinë a me Beograd?
Në teori, pra, gjithçka mund të ndodhë. Se
njeriu s'duhet ta përjashtojë faktorin mrekulli, këtë
e dëshmon më së miri prania e Natos në Kosovë.
Por, në ndërkohë, ata që janë më pesimistë
-a realistë, s'dihet- kanë arsye të presin një
shah të hollë politik edhe në vijim. Kjo ndihmohet
edhe nga natyra demokratike e Status quosë aktuale; demokratike,
meqë ofron njësoj shanse si për mbarësi, ashtu
edhe për prapësi.
Qeveria Rexhepi do të quhet patjetër e suksesshme nëse
e realizon imperativin e vet më kategorik, formimin e një
infrastrukture ligjore për ekonominë, si dhe në qoftë
se arrinë t'u shmanget skandaleve të korrupsionit. Politikisht,
për qeverinë e parë kosovare mjafton që t'i
neutralizojë politikisht ekstremistët serbë në
parlament, eventualisht ta bëjë ndonjë hap simbolik
në vendlindjen e kryeministrit z. Rexhepi, në Mitrovicë,
për të notuar në breg. Më shumë se kaq
është vështirë të presësh realisht
nga një qeveri e zënë ngusht, e cila s'i ka ende
në dorë çelësat e pushtetit.
Por, sado të moderuara të jenë shpresat në Qeverinë
Rexhepi, prapë kemi arsye të druajmë për të,
aq më tepër kur kihen parasysh sfidat ekstreme që
e presin. Ajo s'e ka në dorë as politikën e jashtme,
as atë të mbrojtjes, e as s'guxon ta diskutojë temën
më madhore politike në vend, pavarësinë. Ajo
mund të llogaritë qysh tash në kontroll të rreptë
prej UNMIK-ut e në sabotim konsekuent prej Beogradit. Dhe edhe
në rastin më të mirë, në qoftë se
Qeveria Rexhepi e sajon relativisht shpejt një kuadër
ligjor efikas për jetën ekonomike, ekonomia e Kosovës
është aq e shkatërruar sa zor të ndërrojë
diçka së shpejti. Fundja, ekonominë e lëvizin
investimet e jo tundja e letrave në parlament; shqiptarët
janë popull i varfër, e është vështirë
t'i imagjinosh ata interesentë perëndimorë që
do të ishin të gatshëm të invesojnë në
Kosovë.
Edhe në planin e brendshëm politik, Qeveria Rexhepi ka
rrezik të përballet me sfida të ndjeshme. Sa për
fillim, nxjerrja në aut e liderëve të "krahut
të luftës" mund të del shpatë me dy teha.
Ata mund të mbledhin lavdata nëse qeveria ka sukses, meqë
kabineti qeveritar, si dihet, quhet se i takon kryeministrit. Në
të njëjtën kohë, nëse puna shkon mbrapsht,
p.sh. në lëminë ekonomike e sociale (se në ato
tjerat vendosin bosat e UNMIK-ut) e qeveria humbet në popullaritet,
atëherë krerët e PDK-së e të AAK-së
mund të ndjehen të lirë ta shajnë sa të
duan një qeveri që "s'është e tyre";
para së gjithash, sigurisht, kryetarin z. Rugova dhe ministrat
e LDK-së.
Poashtu, edhe LDK-ja e ka sigurisht një "Plan B"
në xhep, në qoftë se Qeveria Rexhepi dështon.
Së pari, LDK-ja duhet ta kundërveprojë propagandën
e oponencës, që do të thirret natyrshëm në
"sukseset e kryeministrit". Për LDK-në, e cila
në të kaluarën ka dëshmuar sa e sa herë
se është e aftë t'ia hedhë të gjitha ligjeve
të natyrës, kjo s'përbën ndonjë sfidë
të vështirë. Por edhe LDK-ja s'do mend se do të
orvatet t'ia lë këmbët e ariut në dorë
oponencës nëse qeveria dështon. Madje LDK-ja, e cila
s'ka probleme të imazhit si oponenca, do të fitonte nëse
qeverisë i vejnë punët keq; në raste të
tilla, LDK-ja është mësuar ta lansojë suksesshëm
atunë e vet klasike, "atin e kombit" z. Rugova.
Rrezik politik paraqet edhe mundësia e përplasjeve mes
Qeverisë Rexhepi dhe bosave të vërtetë të
Kosovës, UNMIK-ut. Kur kryetari e kryeministri i Kosovës,
hala pa u zgjedhur bash mirë, nisin ta kritikojnë ujdinë
Beograd - Shkup (dmth indirekt ta kritikojnë UNMIK-un), ata
sikur harrojnë një imtësi të vogël. Këtë
botë s'e sjell drejtësia, po forca. UNMIK-u jo vetëm
që formalisht gëzon të drejta imperatoriale në
Kosovë, deri në prishje të qeverisë po qe nevoja
(llastiku 1244 mund të zgjatet sa të duash). Bosat e UNMIK-ut
mund ta rrëzojnë Qeverinë Rexhepi relavivisht kollaj
edhe pa dalur fare në shesh të mejdanit: në një
skenë politike të polarizuar skajshmërisht, mjafton
nja dy zëdhënës të UNMIK-ut të aludojnë
diçka për "figura të caktuara politike"
e langonjtë shqiptarë të politikës s'përtojnë
ta bëjnë lëmsh Kosovën sërish.
|