DIVERSITETI
ETNIK NUK DUHET TA RREZIKOJË KOSOVËN
Shkruan: Xhafer SHATRI
10'786 kilometra katrorë të Kosovës përbëjnë
një hapësirë tejet të vogël për të
përballuar pa tronditje të mëdha trysnitë centrifugale
dhe centripetale të marrëdhënieve ndëretnike
në vend.
Kanë kaluar 3 vjet nga lufta dhe ende askush, as vendorët
e as ndërkombëtarët, nuk ka një ide të
qartë se si duhet të gjendet çelësi që
rregullon këto marrëdhënie.
Shqiptarët janë ende nën ndikimin e fortë të
pasojave të tmershme të luftës. Serbët, apo
thënë më mirë shteti serb, nuk mund të
pajtohen me faktin se nuk mund ta sundojnë më Kosovën.
Bashkësitë e tjera etnike përpëliten në
mes rrymimit të kësaj frrojke.
Më ka ndodhur shpesh në hyrje të lokaliteteve të
ndryshme në një mori vendesh perëndimore, të
shoh ëmblemën dhe flamurin e fshatit.
Në raste të tilla, automatikisht, mendimet shkonin tek
fati i rëndë i vendit tonë, i cili nuk kishte të
drejtë të ketë flamurin e tij, të shprehë
pa drojë identitetin e tij... Të gjithëve na kujtohen
sa e sa drama konkrete familjare e njerëzore që lidhen
me përpjekjet për të mbrojtur flamur kombëtar
shqiptarët në ish-Jugosllavi. Ndërkohë që
në vende normale, një katund prej 30 shtëpish ka
flamurin e tij, ka stemën, ka historinë e shkruar, ka
veçoritë e tij që i vë në pah pa asnjë
frikë. Dhe kjo nuk e pengon askënd.
Por më e veçanta në të gjitha këto tabela
anë e kënd Evropës, më duket një pllakë,
ku shkruan: La commune libre d'Ouchi (Komuna e lirë e Oushi-t),
një lagje e Lozanës, qytetit të dytë frankofon
në Zvicër.
Thjeshtë, kjo është një formë origjinale
për të shprehur një identitet që nuk rrezikon
askënd, apo për të përshfaqur një diversitet.
Harta
etnike e Kosovës
Për
shkaqe të njohura në Kosovë ende nuk ka shënime
të sakta për numrin e popullsisë. Ndaj jo vetëm
për shkak të kësaj mungese, por dhe për shkak
të një paanësie të domosdoshme do t'u referohem
statistikave të vetë shtetit serb. Natyrisht, këto
statistika duhen marrë me shumë rezervë, sepse nëse
një shtet është përpjekur, para syve të
krejt botës, ta zhbëjë një popull, mund të
marrim me mend se sa i pamëshirshëm ka qenë ai me
shifrat.
Sipas regjistrimit të organizuar nga qeveria serbe në
vitin 1991, e në të cilin për shkaqe që dihen,
shqiptarët e Kosovës nuk kanë marrë pjesë,
del se Kosova kishte 1'956'196 banorë. Prej tyre:
1'596'072 shqiptarë ose 81.59%
194'190 serbë, ose 9.92%
66'189 boshnjakë ose 3.38%
45'745 romë, ose 2.33%
20'365 malazez ose 1.04
8'062 kroatë, ose 0.41
3'457 jugosllavë ose 0.17
22'116 "Të tjerë" turq ose 1.13
Ndërkaq
në mesin e komunave, ku mungon komuna e Malishevës, e
formuar më vonë, përbërja e popullsisë
ishte si në tabelën më poshtë. Në këtë
tabelë për t'u thjeshtësuar në rubrikën
"të tjerë" janë futur edhe ata që
janë deklaruar si jugosllavë, si hungarez dhe "të
tjerë" që sipas të gjitha gjasëve janë
deklaruar si turq, por që logjika statistikore serbe i ka kthyer
me një të fshirë të lapsit në të "të
tjerë".
Komunat Gjithsejt Shqiptarë % Serbë % Malazez % Boshnjakë
% Romë % Kroatë % Të tjerë %
1 Albanik-Leposaviq 16'395 951 5.80 14'299 87.22 89 0.54 770 4.70
194 1.18 9 0.1 83 0.51
2 Artan - Novo Bërdë 4'611 1'845 40.01 2'666 57.82 14
0.30 11 0.24 47 1.02 1 0.0 27 0.59
3 Besianë 92'946 91'005 97.91 1'118 1.20 320 0.34 89 0.10 387
0.42 1 0.0 26 0.03
4 Burim - Istog 57'261 43'910 76.68 5'968 10.42 1'302 2.27 4'070
7.11 1'346 2.35 10 0.0 651 1.14
5 Dardanë - Kamenicë 52'152 38'096 73.05 12'762 24.47
58 0.11 83 0.16 986 1.89 9 0.0 158 0.30
6 Deçan 49'000 47'669 97.28 188 0.38 603 1.23 248 0.51 174
0.36 0.0 117 0.24
7 Drenas - Gllogoc 55'148 55'077 99.87 38 0.07 3 0.01 19 0.03 6
0.01 0.0 5 0.01
8 Ferizaj 113'668 100'144 88.10 8'314 7.31 313 0.28 1'810 1.59 2'068
1.82 167 0.1 847 0.75
9 Fushë Kosovë 35'570 20'142 56.63 8'445 23.74 1'303 3.66
1'678 4.72 3'473 9.76 39 0.1 756 2.13
10 Gjakovë 151'597 106'868 70.49 1'751 1.16 1'460 0.96 331
0.22 2'750 1.81 23 0.0 1'909 1.26
11 Gjilan 103'675 79'357 76.54 19'370 18.68 155 0.15 167 0.16 3'477
3.35 24 0.0 1'125 1.09
12 Kaçanik 38'010 37'368 98.31 223 0.59 20 0.05 75 0.20 307
0.81 5 0.0 12 0.03
13 Kastriot - Obiliç 31'627 20'971 66.31 5'490 17.36 421
1.33 347 1.10 3'956 12.51 12 0.0 424 1.34
14 Klinë 65'033 55'882 85.93 5'336 8.21 624 0.96 281 0.43 1'278
1.97 4 0.0 1'628 2.50
15 Lypjan 69'451 53'730 77.36 9'713 13.99 272 0.39 892 1.28 1'673
2.41 2'914 4.2 277 0.40
16 Mitrovicë 104'885 82'837 78.98 9'482 9.04 1'216 1.16 5'205
4.96 4'851 4.63 89 0.1 1'203 1.15
17 Pejë 127'796 96'441 75.46 7'815 6.12 6'960 5.45 9'875 7.73
4'442 3.48 51 0.0 2'212 1.73
18 Prishtinë 199'654 154'990 77.63 26'893 13.47 3'912 1.96
3'427 1.72 6'706 3.36 236 0.1 3'490 1.75
19 Prizren 200'584 157'518 78.53 10'911 5.44 460 0.23 19'260 9.60
4'161 2.07 67 0.0 8'207 4.09
20 Rahovec 85'698 80'583 94.03 4'052 4.73 180 0.21 212 0.25 330
0.39 4 0.0 337 0.39
21 Skënderaj 55'471 54'437 98.14 713 1.29 99 0.18 49 0.09 133
0.24 1 0.0 39 0.07
22 Sharr - Gora 17'574 941 5.35 60 0.34 10 0.06 16'112 91.68 0.00
28 0.2 423 2.41
23 Shterpcë 12'712 4'300 33.83 8'138 64.02 17 0.13 16 0.13
74 0.58 4 0.0 163 1.28
24 Shtime 23'506 21'716 92.38 971 4.13 17 0.07 410 1.74 266 1.13
4 0.0 123 0.52
25 Therandë - Suharekë 72'229 68'849 95.32 3'077 4.26
25 0.03 37 0.05 166 0.23 0.0 75 0.10
26 Viti 57'290 45'078 78.68 7'002 12.22 178 0.31 94 0.16 373 0.65
4'331 7.6 234 0.41
27 Vushtërri 80'644 71'354 88.48 5'522 6.85 269 0.33 516 0.64
2'108 2.61 7 0.0 868 1.08
28 Zubin Potok 8'479 2'079 24.52 6'282 74.09 44 0.52 20 0.24 0.00
4 0.0 50 0.59
29 Zveçan 10'030 1'934 19.28 7'591 75.68 291 2.90 85 0.85
14 0.14 18 0.2 97 0.97
Gjithsejt 1'982'666 1'594'138 80.40% 186'599 9.41% 20'344 1.03%
66'104 3.33% 45'732 2.31% 8'044 0.41% 25'469 1.28%
Kjo
përbërje pas çlirimit ka pësuar ndryshime
dhe sigurisht sot bashkësitë etnike, sidomos ato serbe,
malazeze, rome dhe boshnjake për shkak të rrethanave të
njohura duhet të jenë edhe më të vogla.
Krahas kësaj pas çlirimit kemi një diversitet të
identifikimit etnik siç është rasti me boshnjakët,
ashkalinjtë, egjiptasit etj. që nënkupton se e drejta
e ligjshme e vetëdeklarimit të lirë ka filluar të
zbatohet në Kosovë. E që do të thotë se
liria e Kosovës nuk është liri vetëm për
shqiptarët, sepse edhe bashkësitë e tjera kanë
filluar ta kuptojnë Kosovën si shtëpinë e tyre.
Por që, natyrshëm, në kuadër të kësaj
shtëpie duan ta kenë një kënd të tyrin
që mëtojnë ta rregullojnë ose ta emërojnë
sipas shijes së vet.
Por këtu nuk është vetëm çështja
e të drejtave të njeriut, e të drejtave themelore
të tij, ka dhe çështje të tjera të mprehta
politike, në radhë të parë raporti shumicë
(shqiptarë) - pakica, që po bëhet gjithnjë e
më tepër sintagmë për të përcaktuar
të ardhmen e Kosovës, statusin e saj.
Duket se faktorët vendimtarë për të ardhmen
e Kosovës kanë qasje të ndryshme.
Qasja
e shqiptarëve
Përkundër
trysnive të mëdha nga ana e bashkësisë ndërkombëtare,
paria e Kosovës deri më sot ende nuk ka dalë me një
qëndrim të përpunuar mbi raportet ndëretnike
në Kosovë. E qëndrim i përpunuar do të
thotë një strategji e përbashkët e faktorit
politik dhe shoqërisë civile. Natyrisht deklaratat e dhëna
andej këtej nuk kanë asgjë të përbashkët
me strategjinë. Kjo e fundit vetëm sa theksohet nga fjalët
në erë.
Marrëdhëniet ndëretnike në Kosovë, paria
jonë ia 'ka lënë kohës', duke futur kokën
në rërë si struci.
Dhe sot realisht në Kosovë me këtë çështje
merret seriozisht vetëm Adem Demaçi, i cili ka edhe
guxim edhe mandat moral. Por nuk ka pushtet. E vetmja ndihmë
që i japin Demaçit institucionet dhe partitë politike
të Kosovës në këtë detyrë të
rëndësishme qytetare është propaganda e organizuar
denigruese që bëjnë kundër tij ekipet e specializuara
partiake në të gjitha rastet e mundshme: në kafene,
në media, në ndeja, në oda, në dasma e në
vende ngushëllimi. Kudo.
Ndërka çështja e marrëdhënieve ndëretnike,
kjo çështje parësore për Kosovën sot,
mbytet me kërkesën vend e pavend për 'pavarësi',
përkundër faktit tash të ditur edhe nga zogjtë
se pavarësi të Kosovës nuk do të ketë kurrë
pa krijuar hapësirë e mundësi që pakicat t'i
gëzojnë të drejtat që u takojnë. E ato,
ndër të tjera, janë: e drejta për të jetuar,
për të lëvizur dhe për t'u shprehur shlirshëm;
e drejta për t'u shkolluar, e drejta për të shfaqur
dhe për të mbrojtur identitetin dhe interesat që
lidhen me këtë identitet…
Është e dukshme se në këtë rrafsh në
Kosovë ka ndryshime pozitive. Kemi sot një klimë
tolerance që po vendoset ngadalë, por sigurt. Më
e rëndësishmja është se harbimi shovinist dhe
eksceset me shpërfaqje të urrejtjes ndëretnike nuk
po hasin në mbështetje te pjesa dërrmuese e shqiptarëve
të Kosovës.
Askush në Kosovë me të drejtë nuk ka kundërshtuar
faktin se edhe pse serbët përbëjnë nën
9% të popullsisë në vend, në parlament kanë
18.8% të deputetëve. Sepse ishte dhe është e
nevojshme që pakicave t'u jipen mekanizma konkrete për
të mbrojtur të drejtat e tyre.
Në Kosovë ekziston një opinion i favorshëm për
të ndërtuar një bashkëjetesë të qëndrueshme:
asnjë parti politike, asnjë grupim nuk ka në programin
e saj diskriminimin e atyre që nuk janë shqiptarë,
në media, marrë përgjithësisht, nuk ka gjuhë
të urrejtjes ndaj bashkësive të tjera.
Dinjitarët më të lartë religjioz shqiptarë
në të gjitha rastet thërrasin besimtarët e tyre
me shumë vendosmëri për paqe e tolerancë.
Kjo duhet vënë në pah në të gjitha rastet.
Por, ndonse e kufizuar, nuk ka munguar të shfaqet as ana tjetër
e medaljes, siç ishte rasti kobzi në Pejë, kur
qindra të rinjë shqiptarë u vërsulën kundër
pleqve e plakave serbe, që kishin shkuar në administratë
për të realizuar një të drejtë elementare
qytetare: marrjen e pensioneve.
Skena të tilla që lidhen jo vetëm me ato që
kanë ndodhur në Kosovë, por edhe me krizën aktuale
sociale, duhen identifikuar dhe mënjanuar me kohë. Para
akteve të tilla nuk mjafton vetëm të arsyetohemi
se ne shqiptarët nuk kemi pushtet, nuk kemi mekanizma…
Si
e shohin serbët e Kosovës Kosovën
Pjesa
më e madhe e popullsisë autoktone serbe në Kosovë
(kjo nënkupton ata që njihen dhe vetëthirren si starosedeoci,
banues të vjetër) e kuptojnë Kosovën si vendin
e tyre. Janë të vetëdijshëm për ato që
kanë ndodhur, janë të vetëdijshëm se shteti
serb, të gjitha levat e tij, pa përjashtuar këtu
Kishën serbe, kanë abuzuar me ta në mënyrën
më kriminale. Por zëri i këtyre njerëzve është
i pafuqishëm. Ata janë të kërcënuar nga
politikanë të pamoralshëm dhe nga strukturat e shtetit
serb, të pranishme në të gjitha mjediset në
Kosovë.
Eshtë për të ardhur keq se as shqiptarët e madje
as bashkësia ndërkombëtare nuk kanë ditur të
punojnë me këtë pjesë të popullsisë
serbe në Kosovë që ajo të shërbejë
si urë për ndërtimin e një bashkëjetese
të qëndrueshme në vend.
Një shtresë tjetër e gatshme për të pranuar
realitetin që është krijuar në Kosovë është
pjesa e të zhgënjyerve nga harbimet nacionaliste të
Serbisë. Këta njerëz që kishin krijuar një
emër dhe një perspektivë në Kosovë, pavarësisht
se kur dhe nga kanë ardhur në Kosovë, sot i kanë
humbur të gjitha: shtëpitë, banesat, punën,
emrin, perspektivën… dhe e kanë mësuar me shpinën
e tyre se në Serbi nuk i do askush. Këta serbë janë
të gatshëm të jetojnë në Kosovë.
Një pjesë tjetër, kryesisht kolonistët që
nuk janë liruar nga psikologjia koloniale, përbëhet
nga njerëz të dehur me fanatizëm politik. Këta
ekstremistë janë një bërthamë e fuqishme
për të mbledhur edhe sot vota, vetëvrasëse për
kosovarët serbë, në favor të Sheshelit dhe Millosheviqit.
Eshte vendi të përmendet këtu se procesi kundër
Millosheviqit i organizuar dobët dhe pa një vizion të
qartë për spektrin e efekteve negative te një pjesë
e mirë e serbëve, ka kontribuar që votuesit serbë
në Kosovë të mbështesin një politikë
që është dëshmuar katastrofike për ta.
Por detashmenti më i rrezikshëm përbëhet nga
pjesëtarët e strukturave politike, policore dhe ushtarake
që kanë marrë pjesë në zbatimin e politikës
së Serbisë në Kosovë. Këta e dijnë
se në rast të kthimit në Kosovë do të përgjigjen
para gjyqësisë për veprat penale që kanë
kryer, prandaj shfrytëzojnë të gjitha mundësitë
për ta acaruar gjendjen në Kosovë.
Politikanët serbë nga Kosova, në masën më
të madhe ndodhen në mes të këtyre shtresëzimeve,
të paaftë dhe të pasigurt për të marrë
rol udhëheqës në mbrojtje të interesave jetike
të serbëve të Kosovës.
Kisha Ortodokse serbe, peshkopia e saj në Kosovë, si institucion
jo vetëm shpirtëror por edhe politik me shumë rëndësi
ka pësuar jo pak tronditje nga ngjarjet e viteve të fundit.
Por ajo, ashtu si dhe politikanët kryesorë serbokosovar
është nën një trysni të fortë të
Serbisë dhe të ardhmen e serbëve të Kosovës
e lidh gjithsesi me interesat e shtetit serb. Ndërkohë
që në realitetin e sotëm, këto interesa janë
kundërshtuese.
Me një fjalë politika e serbëve të Kosovës
nuk është autoktone. Ajo varet nga moti në Beograd.
Dhe sot në Evropë nuk ka asgjë më të paqëndueshme
e më të paqartë se sa klima politike në Serbi.
Manipulimi i paskrupullt që Beogradi bëri me zgjedhjet
e fundit lokale në Kosovë është shembulli më
i mirë për këtë.
Se si manipulon Beogradi me serbët e Kosovës tash së
fundit po del në shesh edhe me rastin e dorëheqjes së
Rada Trajkoviçit.
Serbia
dhe qasjet për Kosovën
Serbia
vazhdon të jetë shteti më i paqëndrueshëm
në rajon. Krimi i organizuar ka përfshirë të
gjitha strukturat e shtetit. Liderët kryesor po vazhdojnë
edhe pas dy vjet të rrëzimit të regjimit të
Millosheviqit të bëjnë një luftë të
pakompromis për pushtet, fundi i të cilës është
larg të dihet.
Përpjekjet për formimin e shtetit të përbashkët
Serbi-Mali i Zi, tani po përthehen në folen e dreqit,
në detajet juridike dhe ekonomike që s'u shihet fundi
askund…
Në këto kushte Kosova dhe lufta për pushtet në
Beograd vazhdojnë të jenë dy gjëra të pandashme
dhe të pashmangshme. Prandaj sot është shumë
vështirë të dihet saktësisht se cili politikan
i Serbisë kur deklarohet për Kosovën realisht çka
synon ai në konstelacionin e forcave në Beograd.
Disa gjëra megjithatë dihen:
- Grupimi rreth Koshtunicës, i cili fitoi shumicën e votave
edhe në zgjedhjet e fundit të dështuara presidenciale,
është për atë që Kosova të ndahet
në mes serbëve dhe shqiptarëve. Sipas tyre Mitrovica
mbetet argumenti themelor i identifikimit të interesave të
shtetit serb në Kosovë. Në konferencën ndërkombëtare
'Siguria në Evropën Juglindore në prag të shekullit
XXI', mbajtur në maj të vitit 2001 në Beograd, N.
Qoviq, i ngarkuari i Serbisë për Kosovën, ka dalë
hapur me propozimin për ndarjen e Kosovës. Sipas tij Kosova
do të duhej të ndahej në dy etnitete. Atë serb,
ku do të përfshiheshin vendet me monumentet kulturore
dhe historike të serbëve, e të cilin do ta mbronin
ushtria dhe policia serbe dhe etniteti shqiptar, ku do të vendoseshin
të gjithë shqiptarët e Kosovës dhe i cili do
të vihej nën mbrojtjen ndërkombëtare.
Duke parë vendosmërinë e faktorit ndërkombëtar
kundër këtij opsioni, grupimi i Koshtunicës tash
po këmbëngul në stërzgjatjen pa fund të
zgjidhjes së çështjes së Kosovës me shpresë
se shqiptarët do të dëshmohen të paaftë
të qeverisin, se nuk do të dijnë t'i zgjidhin problemet
e brendshme, ndaj do të komprometohen përballë bashkësisë
ndërkombëtare dhe kështu do të hapet mundësia
ose për ndarjen e Kosovës ose një vrimë për
t'u kthyer shteti serb në Kosovë.
Me këtë pikëpamje janë edhe Akademia, Kisha
dhe Shtatmadhoria.
- Grupimi rreth kryeministrit serb, Z. Gjingjiç, ende nuk
ka dalë qartë me pikëpamjen se si e mendon zgjidhjen
e çështjes së Kosovës. Duket se ai ishte prapa
kërkesave për decentralizim të Kosovës që
u intensifikuan në prag të zgjedhjeve të fundit lokale
në Kosovë. Dhe kjo më tepër duhet të jetë
si një intermeco për të. Sepse ky grupim llogaritet
të jetë realist dhe pa komplekse për sa i përket
kësaj çështjeje.
Fitohet përshtypja se në skenën politike serbe ditë
e më tepër po shtohet numri i politikanëve që
Kosovën e shohin si barrë tepër të rëndë
për supet e molisura të Serbisë, por që nuk
kanë guxim ta thonë, për shkak të indoktrinimit
dominues në vend.
- Shoqëria civile serbe, sidomos ajo pjesë që ka
rrezatuar vlera civilizuese në Serbi, kërkojnë respektimin
e të drejave të pakicave dhe shprehen hapur në favor
të pavarësisë së Kosovës. Këtu dominon
vetëdija se shteti serb ka humbur çdo të drejtë
të qeverimit me Kosovën.
Në këtë rrafsh me peshë të veçantë
duket mendimi i Dushan Janjiq-it, kryetar i Forumit për marrëdhënie
etnike, i cili është sot padyshim ndër ekspertët
më të njohur e më kompetent për këso çështjesh
në rajon.
Sipas tij, statusi final i Kosovës do të mund të
zgjidhet në 10-15 vitet e ardhshme. "Në atë
moment kur institucionet e Kosovës të aftësohen të
kontrollojnë të gjitha proceset, ekonominë, sigurinë
sociale, sigurimin pensional, punësimin në territorin
e Kosovës dhe për të gjithë qytetarët,
atëherë statusi vjen vetëvetiu. Atëherë
ata do të jenë të pavarur.
Nëse shqiptarët nuk do të aftësohen asnjëherë
për ta bërë këtë, do të jenë
nën protektorat të përhershëm, ose do të
bëhet një kthesë në histori dhe atje do të
kthehet drejtuesi serb…", ka deklaruara Janjiq për
B92, pak kohë më parë.
Një analizë të veçantë meriton qasja
e Janjiqit në nje tryezë për këtë çështje,
tash në këtë funddhjetori: ngutja për përcaktimin
e statusit të Kosovës në dy vitet që vijnë
do të thotë ndarje e saj…
Bashkësia
ndërkombëtare dhe qasja ndaj Kosovës
11
shtatori 2001, shënon një datë që ka goditur
rëndë jo vetëm Shtetet e Bashkuara, por dhe interesat
e shqiptarëve të Kosovës.
Politika amerikane ka pësuar ndryshime të mëdha.
Washingtoni tash ka përparësi të tjera që do
të reflektohen edhe me tërheqjen substanciale të
trupave nga rajoni i Evropës Juglindore. Kjo nënkupton
lënien e Kosovës në duart e BE-së, e cila duket
se mëton ta ruajë ende Serbinë e fortë. Dhe
në kuadër të saj Malin e Zi dhe Kosovën. Trysnia
që është bërë mbi Malin e Zi gjatë
vitit të fundit për të pranuar diktatin evropian
është një shembull konkret.
Në këtë politikë prinë Franca, Greqia dhe
Italia.
Nëse deri më 11 shtator askush nuk ngutej gjithaq për
përcaktimin e statusit të Kosovës, tash, e sidomos
kohët e fundit, gjithnjë e më tepër po flitet
se kjo çështje duhet të përmbyllet brenda
tri vjetëve të ardhshme.
Ndërkohë të panjohurat e bashkësisë ndërkombëtare
lidhur me Kosovën tash po dalin ditë e më tepër
në pah. Shqiptarët vetëm pas tri vitesh mësuan
se forcat ruse që ishin të vendosur në pikat më
strategjike të vendit (në aeroport dhe në Drenicë!)
nuk komandoheshin nga KFOR-i!
Në anën tjetër, sipas akademikut serb, Dushan Batakoviq,
me hyrjen e KFOR-it në Kosovë, serbëve u është
shpjeguar plani i kantonizimit, me të cilin parashihej që
zonat e kontrolluara prej serbëve të kenë lidhje
speciale me shtetin serb, gjë që është 'përshëndetur
zëshëm nga serbët e Kosovës'. Kështu 'Kosova
është kantonizuar spontanisht (!) për një kohë
të shkurtë dhe në përputhje me një projekt-hartë
prapa të cilës, që pa u zgjeruar lufta, kanë
qëndruar Kisha serbe dhe Lëvizja serbe e Rrezistencës…
Kantonizimi më i madh e më substancial është
bërë në Veriun e Kosovës ku përfshihen
enklavat serbe të Mitrovicës, Leposaviqit dhe Zubin Potokut…
Duke falenderuar trupat franceze në këtë zonë
të KFOR-it nuk është lejuar të bëhet bashkimi
i Mitrovicës, citon Batakoviqin gazeta Danas në nëntor
të këtij viti.
Ky implikim i drejtpërdrejtë i bashkësisë ndërkombëtare
në copëtimin e Kosovës në fakt i ka dhënë
grushtin më dërrmues idesë për Kosovën
multietnike. Sepse para luftës, Mitrovica, sipas statistikave
zyrtare serbe kishte popullsi dominuese shqiptare. Nga 104'885,
82'837, ose 78.98% ishin shqiptarë, 9'713, ose 9.04% ishin
serbë, 1'216 ose, 1.16% ishin malazez, 5'205 ose 4.96% boshnjakë,
4'851 ose 4.63% ishin romë… Pra nën flamurin e KFOR-it
është lejuar që 10% e popullsisë ta terrorizojë
dhe te mbajnë peng 90% të popullsisë së një
komune.
Me pëlqimin e bashkësisë ndërkombëtare,
vazhdon të mbahet ende e pushtuar nga strukturat shtetërore
serbe, pjesa veriore e Mitrovicës edhe pse dihet se shumica
e popullsisë ishin shqiptarë, pra 11 mijë, ndërsa
serbë kishte rreth 7000 veta.
Ky shembull nuk tregon vetëm përligjjen e copëtimit
të Kosovës, por bën dëme të shumëfishta,
sepse mban gjendjen e tendosur në vazhdimësi, acaron deri
në konflikte të përgjakshme marrëdhëniet
ndëretnike, hedh hije të zezë mbi përparimet
e dukshme që janë bërë në Kosovë.
Dëmton ekonomikisht Kosovën, sepse njëra prej minierave
më të mëdha të kontinentit, aq e nevojshme për
ekonominë e vendit, është jashtë prodhimit.
Me këtë akt, dhe jo vetëm me këtë, bashkësia
ndërkombëtare është treguar praktikisht pengesa
kryesore e politikës së proklamuar për Kosovën
multietnike.
Nisur nga këto fakte, planit të Steinerit duhet besuar
vetëm për aq sa shihet se përmes tij po bashkohet
qyteti dhe Kosovës po i hiqet nga kurrizi një krizë
me pasoja të shumëfishta.
Çelësi
për ndërtimin e Kosovës multietnike…?
Termi
'multietnike' të kujton ato termat komuniste për bashkim-vëllazërimin,
dhe kjo pasi konceptit qytetar për shtetin, koncept dominues
në Evropë, bashkësia ndërkombëtare i jep
jo vetëm tension, por dhe emër politik.
Pavarësisht nga emërtimet është e qartë
se Kosova nuk mund të jetë një vend i lirë e
as i pavarur nëse në të nuk respektohen të drejtat
e të gjithë qytetarëve pavarësisht nga përkatësia
e tyre etnike, fetare, politike.
I takon shumicës absolute, që në këtë rast
jemi ne, shqiptarët, të rishikojnë gjendjen dhe marrëdhëniet
me bashkëqytetarët joshqiptarë. Kështu vihen
themelet e shtetit qytetar, në të cilin askush askujt
nuk i jep të drejta, por ia respekton ato.
Dhënia e të drejtave sidomos në Ballkan ka një
histori të dhimbshme, madje dhe të përgjakshme. A
mund të harrohet shprehje e përtypur aq shumë nga
autoritetet e Serbisë e Maqedonisë veçanërisht
gjatë këtyre 30 vjetëve të fundit se "Ne
shqiptarëve u kemi dhënë të drejtat, që
asnjë vend evropian nuk i ka aplikuar për pakicat"…
Ai që jep të drejta, ai edhe mund t'i marrë ato.
Dhe mu kjo ka qenë në thelb të luftërave që
kanë përgjakur gjithë ish-Jugosllavinë në
dhjetëvjetëshin e fundit. Në këtë kuptim
shqiptarët si shumicë në Kosovë, nuk duhet të
lejojnë kurrë që bashkëqytetarëve të
tyre "t'u japin të drejta", por t'ua njohin dhe t'ua
respektojnë ato.
Historia e marëdhënieve serbo-shqiptare përbën
thelbin e asaj që quhet sindrom ballkanik: lufta për territore
pa zgjidhur mjete, përpjekje për të mbijetuar, urrejtje
patologjike ndëretnike, bashkëjetesë në ankth
e pasiguri të përhershme. Por kjo duhet të marrë
fund.
Luftëra, shumë luftëra, ka pasur, ta zëmë,
edhe në mes francezëve e gjermanëve, por sot ata
janë popuj që janë në themel të ndërtimit
të një kontinent-shteti të ardhshëm.
Arsyet e kësaj duhen gjetur te identifikimi dhe harmonizimi
i interesave, te negociimi i kompromiseve, që në jetën
e njerëzve dhe të shteteve janë të pashmangshme.
Në
këtë kuadër, ata që sot janë udhëheqja
e Kosovës do duhej të dilnin me propozime konkrete për
zgjidhjen e problemit të pakicave në Kosovë, të
serbëve në radhë të parë.
Dhe këtyre propozimeve t'u bëhet jehonë duke i shtruar
për sygjerim para komisionit përkatës të Këshilit
të Evropës, BE.-së dhe parasegjithash SHBA-ve.
Kosova është ajo që duhet të ketë vazhdimisht
oferta dhe projekt-zgjidhje.
Por këto oferta që u paraqiten kosovarëve serbë
dhe fuqive të mëdha, duhet të kenë një
kushtëzim të pakapërcyeshëm: respektimi i tërësisë
territoriale të Kosovës dhe zhbërja njëherë
e përgjithnjë e strukturave të shtetit serb që
funksionojnë ende sot në Kosovë.
Dhe prapa këtyre qëndrimeve të ketë një
unison e bashkëveprim të plotë të të gjithë
faktorit shqiptar në Kosovë dhe jashtë.
Duhet te nënvizohet se me serbët e Kosovës duhet
biseduar me tolerancë e mirëkuptim maksimal për të
gjitha problemet; ndërkaq me Beogradin bisedohet vetëm
për çështje që lidhen me ndarjen e pashmangshme
siç është sukcesioni apo dëmet e luftës.
Në këto bisedime ndërmjetësimi amerikan është
i domosdoshëm.
Përfundim
Sipas
8 opsioneve për zgjidhjen e çështjes së Kosovës
që i ka paraqitur publikisht Instituti Amerikan për Paqe,
opsioni i gjashtë dhe i shtatë duken më të arsyeshmit,
por dhe më të favorshmit për Kosovën:
Pavarësia
e kushtëzuar; Kosova e pavarur brenda kufinjve aktual e kushtëzuar
me një rend dhe qeverim demokratik, respektim të të
drejtave të pakicave, sjellje të përgjegjshme në
rajon…;
Pavarësia
nga një datë e caktuar; Pas zgjerimit të kompetencave
të organeve vetëqeverisëse, bashkësia ndërkombëtare
do ta njihte pavarësinë e Kosovës dhe do t'u garantonte
serbëve një autonomi të gjerë lokale...
Mesazhi
është i qartë: prej shqiptarëve kërkohet
të tregohen të aftë për të vetëqeverisur
dhe për të zgjidhur problemet e brendshme ndëretnike,
me një fjalë t'i integrojnë të gjithë qytetarët.
Kjo nënkupton integrimin e bashkësive etnike pakicë
në të gjitha organet dhe institucionet e vendit; universitetin
për serbët e Kosovës, Fakultetin e Kulturës
boshnjake, financimin e shkollimit të pjesëtarëve
të pakicave të tjera për të pasur ato kuadro
dhe mekanizma për të mbrojtur të drejtat dhe për
të kultivuar identitetin e tyre.
Kosova ka rastin historik t'i japë një mësim të
mirë gjithë rajonit se si diversitetet e një vendi
mund të kthehen nga sherre të pafund në përparësi
për të ecur më shpejt dhe më mirë drejt
mirëqenies së qëndrueshme dhe integrimeve.
Kjo
qasje nuk do ta dobësojë, përkundrazi do ta forcojë
Kosovën.
|