Zgjedhjet
në Shqipëri, kaloi apo ngeli politika?
Shkruan:
Iliriana BAJO
Shqipëria ka votuar më
12 tetor. Votimet janë provë për demokracinë
në Shqipëri, është dëgjuar shpesh gjatë
javëve para zgjedhjeve, nga politikanët vendorë dhe
përfaqësuesit ndërkombëtarë.
Në fakt Shqipëria është e vonuar në provën
e zgjedhjeve të lira dhe të ndershme, provë që
duhej të ishte kaluar vite më parë, derisa zgjedhjet
e para në një sistem shumëpartiak në vend janë
zhvilluar në pranverën e 1991. Dëshmi për kete
vonesë janë dhe vëzhguesit e ODHIR-it, që dhe
këtë rradhë do mbulojnë zgjedhjet në Shqipëri.
ODHIR-i si pjesë e OSBE-së vëzhgon zgjedhjet në
vendet më problematike.
Megjithatë,
duhet të mbetemi të shpresojmë, duke pasur parasysh
shprehjen “më mirë vonë se kurrë”.
Por a ishte prova e 12 tetorit një provë që e kaluan
politikanët?
Pa dashur t’i marrim meritat
që i takojnë politikanëve, një vështrim
i shpejtë i procesit zgjedhor flet për një provë
që e kanë kaluar votuesit.
Të lodhur nga tranzicioni i
tejzgjatur, nga fytyrat e njëjta të politikanëve,
nga e njëjta mëri mes partive politike, zgjedhësit
shqiptarë vendosën t’i qëndronin larg partive
politike.
Largësia është përcaktuar
dhe nga shkalla e ulët e besueshmërisë që kanë
politikanët në Shqipëri.
Mbi 2 milionë e 700 mijë
qytetarë shqiptarë kishin të drejtën e votës,
derisa më shumë se gjysma nuk e kanë përdorur
këtë të drejtë, apo thënë më
mirë kanë refuzuar për ta përdorur votën.
Për këtë 50 për qindësh që nuk ka
marrë pjesë në votime duket se asnjë nga forcat
politike apo kandidatët nuk e meritojnë votën e tyre.
Në mesin e këtij grupi
që nuk morrën pjesë në votime, ndonëse
nuk ka statistika të sakta, duket se shumica i takon grupmoshave
të reja të votuesve.
Në fakt kjo është
shenjë jo e mbarë për partitë politike në
vend, nëse realisht mendojnë për vazhdimësinë
e tyre.
Por cfarë bënë politikanët
në këto zgjedhje?
Drejtuesit politikë nga selitë
qëndrore të partive kryesore në vend në fakt
përdorën thuajse një fjalor të ngjashëm
me atë të zgjedhjeve të kaluara, derisa ka pasur
dallim në mënyrën e komunikimit mes kandidatëve
në nivel bashkish e komunash.
Kandidatët nëpër
rrethe kanë dëshmuar një nivel më të lartë
qytetarie, duke ruajtur atë minimum aq të kërkuar
deri tani nga zgjedhësit shqiptarë.
Megjithatë problemet mes partive
politike shqiptare duken më pak të rrezikshme dhe më
pak të rënda, nëse vështrojmë gjendjen
ne zonat e jugut të Shqipërisë.
Shumë emigrantë nga Greqia,
nën organizmin e strukturave ekstremiste të politikës
greke, të njohura dhe si qarqe anti-shqiptare, kanë ardhur
në mënyrë të organizuar për të votuar.
Dhe votat e tyre janë për kandidatët, të cilët
kanë mbështetjen e këtyre strukturave anti-shqiptare.
Në fakt për cudi të
të gjithëve, edhe pse jemi të mësuar me këtë
apati, edhe në këto zgjedhje nuk pati reagime nga partitë
politike shqiptare. Për më tepër kur mësohet
se edhe politikanë grekë, duke shkelur cdo ligj ndërkombëtar,
kanë ardhur dhe kanë bërë fushata zgjedhore
për kandidatë të caktuar.
Në shkëmbim ata premtojnë
viza dhe dokumenta pune në Greqi. Dhe ashtu si herët e
tjera mbetet, që vetëm disa javë apo muaj pas zgjedhjeve
qeveria greke, apo të ashtëquajturat grupe që merren
me të drejtat e pakicës greke në Shqipëri, t’i
dorëzojnë peticione oragnizmave ndërkombëtare,
rreth “shkeljeve të të drejtave” që iu
është bërë pakicës greke në zgjedhjet
e fundit.
E
vetmja gjë që mbetet të bëjmë, duke qenë
se deri më tash politika dhe mediat nuk e kanë kaluar
këtë provim, është të shpresojmë se
qytetarët sërish do të reagojnë përpara
politikës. Le të besojmë se reagimi i tyre do të
ndodhë përpara se të jetë vonë. |