Pse
na duhet irredentizmi militant?
Shkruan: Ilir VROJTO
Kohëve
të fundit, në opinionin shqiptar këtej e andej kufirit
po dëgjohen shumë zëra të lartë tek bërtasin
kundër irridentizmit militant. Mynxat hedhen në radhë
të parë kundër AKSH-së, formacionit që
e ka vazhduar luftën e armatosur çlirimtare gjithandej
nëpër trojet e pushtuara.
Oponenca
kundër irridencës përmban elemente të ndryshme.
Kurrizin e saj e përbën specia e politikanëve, si
në shtetin shqiptar, ashtu edhe në protektorat. Dora në
zemër, ca prej tyre thonë se do ta pëlqenin unjësimin
kombëtar, sikur ai t'u ofrohej në talure argjendi. Po
meqë liria s'porositet në kafene e bashkësia ndërkombëtare
s'është kamariere, politikanët tanë, si të
ligjë që janë, parapëlqejnë t'i përndjekin
bashkëkombasit që thirrin për drejtësi.
S'duhet
harruar se politikanët tanë janë produkti meskin
i 100 e ca vjetëve të gjenocidit të fqinjve mbi ne:
"politikan shqiptar" është më tepër
diagnozë se sa zeje. Të jesh politikan karriere ndër
shqiptarët sot dtth që qysh në krye të punës
të heqësh dorë prej bashkimit e forcimit të
kombit tënd! -Në psikiatri, kur njeriun e dirigjojnë
dy zëra kaq të kundërt, rëndom
e fiton diagnozën skizofren.
Edhe
grupimet tjera mund t'i identifikosh mjaft lehtë. Kundërshtarë
të idesë irridentiste janë edhe mafiet, një
grusht fakultetlinjsh meskinë të trembur prej konkurrencës,
fanatikë fetarë që të gjitha kalkulimet i bëjnë
me numratoren e religjionit, si dhe shkarti që mbanë letërnjoftim
dialektor në vend të atij kombëtar.
E
përbashkët për të gjitha këto grupe është
se ato, si thotë populli, janë pajtuar me turpin, e s'këqyrin
tjetër pos ta maksimojnë fitimin e vet në kuadër
të "faktit të kryer", kurdifikimit të shqiptarëve.
Nën hijen e bjeshkëve të nëmura të Status
Quo-së, eksponentët e këtyre grupimeve kanë
ndërtuar subkultura inferiore politike, intelektuale, artistike
e ekonomike, ku kapardisen si gjela mbi grumbuj plehrash. Rrjedhimisht,
i përbashkët për ta është, pra, edhe fakti
se kanë gjithçka për të humbur nga unjësimi
kombëtar.
Kundër
tyre pozicionohet me instinkt shumica e shqiptarëve. Kjo shumicë
nuk i honeps dot argumentet mendjedobëta të liderëve
të ditës. Ajo, nisur nga arsyeja e shëndoshë,
mund ta marrë me mend që një Shqipëri e plotë
shkon në interes të saj. Ekonomia, por edhe kultura, arti,
si dhe të gjitha shprehjet tjera të progresit qytetërues,
s'do mend se do të kenë dobi nga unjësimi kombëtar.
Kjo vlente si kohën e Lidhjes së Prizrenit, ashtu edhe
sot. Sikur të ishe ti Bill Gejtsi, ku i kishe investuar milionat
tua, në një treg me 2-3 mil, apo me 8-10 mil konsumues?
-Përgjegja, që s'është fare hipotetike, erdhi
këtyre ditëve nga një tjetër milioner amerikan,
nga mbreti i cigareve Filip Morrisi, që kumtoi se do të
investojë miliarda dollarë - në Serbinë e Madhe!
Në
anën tjetër, po kjo arsye e shëndoshë e bën
shumicën të ngurrojë para pasojave të mundshme
të irridencës militante. Të gjithë ne - të
çmendurit përjashtim - i druajmë përsëritjes
së gabimeve të Luftës Çlirimtare në Kosovë.
Askush s'do t'i fut brirët atje prej ku s'i nxjerr dot më.
Radhën e kaluar na shpëtoi Amerika në momentin e
fundit, rezonon shumica. Nëse e armiqësojmë Amerikën,
kush do të na ndihmojë po na vajtën punët mbrapsht?
Kjo
është një pyetje fundamentale, të cilën
irridentisti i urtë nuk guxon as ta shpërfill, as ta demonizojë.
Në fakt, në këtë kapërcell kohor ku ndodhemi
tani, mu përgjegja në këtë pyetje ofron "Raison
d'Etre", arsyen e ekzistencës, të tërë
ideologjisë irridentiste.
Si
i përgjegjemi, atëhere, ne irredentistët kësaj
droje të ligjshme?
Si
pikë e parë, le të përsëritim, duhet e
pranuar si të tillë, pra si të ligjshme. Po, ka të
drejtë të druajë një popull që rishtazi
e shtynë gjer buzë apokalipsit: dhjetëramijëra
të vrarë, mbi 1 mil ikanakë. Dhe po, është
e vërtetë: pa ndihmën amerikane, ne do ta kishim
humbur luftën. Njësoj si do të kishin humbur pa Amerikën
edhe anglezët e francezët para 50 vjetësh. Kjo s'i
zvogëlon vlerat e Luftës Çlirimtare, përkundrazi.
Nëse francezët e çmokan hero një De Gol, që
endej me xhip prej anglezëve andej-këndej nëpër
shkretëtirat afrikane, si të mos jetë hero një
Adem Jashari që, krye në vete e pa asnjë garancë
prej dikujt, ngriti një rezistencë e hapi luftë mu
në mes të armikut?
Kur
kemi thënë këtë, le ta themi edhe tjetrën.
Ne s'na ndihmoi bota pse dështuam në luftë, po nisëm
luftën pse dështoi bota. Sikur bota ta kish mbajtur besën
e vet "Kurrë më!", që e dha fill pas LDB,
atëhere as Kroacia, as Bosnja, e as Kosova s'do të kishin
ndodhur fare. Amerika, thjesht, nuk ndërhyu për hir të
syve tonë të zi, as pse e kish pëlqyer aksh politikan
a aksh komandant, po pse nacionalizmi serb ndryshe do t'ia nxinte
krejt fytyrën Perëndimit.
Njëherit,
kjo ofron përgjegje edhe në pyetjen fundamentale, se athua
kush do të ndihmojë po vajtën punët mbrapsht:
ne duhet të këqyrim që punët të mos vejnë
mbrapsht, po mbarë! Martesa s'bëhet duke menduar shkurorëzimin,
as bashkohet kombi duke i druajtur humbjes. Rrjedhimisht, ne s'duhet
të këqyrim se si do të na ndihmojnë aleatët
kur të humbim, por si do të na ndihmojnë për
të ngadhnjyer; ndryshe, ne do të mbarojmë mu në
atë zezonë që duam ta shmangim.
Fundja,
sot për sot, ne as që kemi se ç'të humbim.
Pse jetokan mirë shqiptarët pa rrymë, pa ujësjellës,
pa shkollë, pa punë, tani që qenkan të ndarë?
Veç vdekja si komb më keq do të ishte; e për
sa kohë që Perëndimi ka interes të mbajë
prezencë trupore në Siujdhesën Ilirike, çfarosje
e dëbime masive më s'do të ketë. Ne, thjesht,
sot për sot s'kemi se ç'të humbim, po kemi shumëçka
- në mos gjithçka! - për të fituar!
Problemi
është, që kjo intermeco e favorshme s'do të
zgjasë gjer në infinit. Shqiptarët do të ishin
popull idiot po t'i fusnin krejt vezët në shportën
e një mysafiri. Në rastin më të mirë, Perëndimi
do të qëndrojë në Siujdhesën Ilirike derisa
ta ndërtojë një arqitekturë ca më stabile
të paqes (veni re që themi "stabile", e jo "të
drejtë"). Në rastin më të keq, ai do të
largohet pa u lodhur fort se çka lë pas, si ka bërë
shpesh anembanë rruzullit: një krizë në Irak,
në Izrael, a në Qipro, kërcënon ta kthejë
Serbinë katullaq në Kosovë. Qoftë në rastin
e parë, qoftë në atë të dytin, patjetër
që Perëndimi një ditë prej dite do të ikë
prej këtu. E atëhere, ç'do të bëjnë
shqiptarët?
Për
shqiptarët, ky Moment 22 ta kujton dilemën e bjeshkatarit
që ka rrëshqitur në greminë. I kapur për
një degë që sa vje e këputet ai ngurron, në
do të rrezikojë për t’u hedhur matanë,
apo ta shijojë jetën edhe pak, gjersa t'i këputet
dega krejt?
Irredentisti
e ka përgjegjen flakë: shqiptarët duhet të rrezikojnë!
Për ne shqiptarët, kjo situatë e re në Siujdhesën
Ilirike është gjas historik. Ne s'duhet ta lozim palaçon,
po ta shfrytëzojmë maksimalisht! këtë dritare
të rastit që na është hapur, sa s'është
mbyllur sërish pa kthim.
Në
këtë mes, irredentizmi militant loz rol parësor.
Ai është përshpejtuesi i përsosur i proceseve:
i trimëron shqiptarët në kërkesat e veta të
ligjshme, ndërsa i thërret njëherit edhe arsyes së
aleatëve tanë. Në një botë më të
përsosur, doemos që irredentizmi militant do të shfrytëzohej
edhe prej politikës zyrtare, si argument që kërkesat
irredentiste duhet marrur me seriozitet. S'do mend që irredentizmi
militant, njësoj si të gjitha fenomenet vizionare të
kohës, do të mallkohet prej shumë titullarëve
vendas e të huaj; por ai do ta gëzojë mirënjohjen
e amshueshme të pasardhësve tanë.
Ekzistojnë
vetëm dy kufij, të cilëve irredenca militante s'bën
t'u afrohet as për së largu. Ajo s'guxon kurrë të
ngre dorë mbi perëndimorët, në radhë të
parë mbi amerikanët, gjermanët, e turqit. Si dhe,
ajo s'guxon assesi të fërkohet me rrymime islamiste e/a
majtiste. Pos kësaj, kufiri i vetëm është ajo
që duan e janë të gatshëm ta bëjnë
vetë militantët. Apo, si thonë miqtë amerikanë:
"The sky is the limit”. |