Kronikë e arrestimeve
të paralajmëruara
"Pas çdo ngjarje në Kosovë, më ishte
bërë zakon të pyesja se si do të reagonte
ky apo ai krah politik. Pas arrestimeve të djeshme më
duhet të them se po pyes cili do të jetë ragimi
im, për më tepër se flitet për arrestime të
tjera." Këto fjalë m'i thoshte një nga gazetaret
me përvojë dhe e dalluar për baraspeshë në
Kosovë, pas ngritjes së aktakuzës dhe dërgimit
në Gjykatën e Hagës të katër ish luftëtarëve
të UÇK-së, mes të cilëve dhe Fatmir
Limaj, një nga politikanët më aktivë në
Kosovën e pasluftës dhe deputet në Parlamentin
e Kosovës.
Ndërsa tek flisja me të njohurit dhe miqtë në
Kosovë menjëherë pas arrestimeve ndihej një
lloj mpirje e përgjithshme.
Kishte prej tyre që ndiheshin të tradhëtuar nga
bashkësia ndërkombëtare, të tjerë mendonin
se Bllaca, të cilën e kishin përjetuar gati 4 vjet
më parë ishte vetëm një histori pa interes,
vuajtjet e asaj kohe, thjesht dukeshin se ishin hedhur në
kosh të plehrave.
Në fakt ndonëse të gjitha këto janë reagime
emocionale, duket se gjithë ky proces do të jetë
i shoqëruar nga ngarkesa emocionale. Kësaj për
fat të keq nuk i shpëtuan as politikanët. Madje,
qe pikërisht ngarkesa emocionale që u përdor nga
përfaqësuesit e bashkësisë ndërkombëtare
në Kosovë, që të qetësonin gjendjen.
Vlerësimi që ata i bënë veprimit të Fatmir
Limajt dukej se synonte më së tepërmi në qetësimin
e sedrës së vrarë dhe revoltës potenciale.
Në fakt rasti Limaj dhe i tre luftëtarëve të
tjerë të ish Ushtrisë Clirimtare të Kosovës
për pjesën tjetër, domethënë bashkësinë
ndërkombëtare është thjesht pjesë e përditshmërisë
politike.
Të paralajmëruara - Fare mirë mund të cilësohen
si të tilla arrestimet në fjalë. Menjëherë
pas luftës, në qershor 1999, me vendosjen e administratës
së Kombeve të Bashkuara, në rrethe të caktuara
në Kosovë, nisi të flitej për faktin se Gjykata
e Hagës do të hetonte dhe disa ngjarje, autorë
të së cilës qenë shqiptarët.
Këto informacione kanë qarkulluar në mënyrë
të herëpashershme gjatë këtyre katër
viteve. Ka qenë një sekret publik.
Megjithatë politikanët dhe më pas institucionet
e Kosovës, të dala nga zgjedhjet, asnjëherë
nuk trajtuan as me seriozitet dhe as me profesionalizëm,
informacionet që jo thjesht qarkullonin në rrethet vendimmarrëse
pranë tyre, por as kanë reaguar dhe kur një mundësi
e tillë iu është thënë nga diplomatë
e zyrtarë perëndimorë.
Fakti nëse u dorëzua apo u arrestua Fatmir Limaj nuk
duhet të ishte vënë në qendër të
diskutimit, duke marrë trajtën e problemit kryesor.
Kjo vetëm rithekson se sa të papërgatitur i ka
gjetur institucionet e Kosovës dhe strukturën politike
ky hap.
Në fakt dërgimi në Hagë i Fatmir Limajt dhe
tre të tjerëve ka nisur kohë më parë.
Ka nisur atëherë kur vetëm pak kohë pas përfundimit
të luftës propaganda kundër atyre që luftuan
ishte në pikun e vet, atëherë kur statusi i shoqatave
të dala nga lufta, si ajo e dëshmorëve apo invalidëve
të luftës nuk u qartësua apo institucionalizua
asnjëherë. Dërgimi në Hagë i katër
luftëtarëve të UÇK-së ka nisur kur
partitë politike nisën të përvetësonin
luftën si të tyren, por pa u përpjekur t'i krijonin
asaj mbrojtjen e duhur institucionale e ligjore. E kjo u duk qartë
dhe në deklaratat e zbehta, madje disa prej të cilave
dhe mjerane të përfaqësueve të një grupi
të caktuar politik në Kosovë.
Natyrisht ardhja deri në arrestimet e fundit është
pasojë dhe e faktorëve të tjerë, mes të
cilëve Serbia është njëri prej tyre.
Pas rënies së Millosheviqit, në vjeshtën e
vitit 2000, garnityra e re politike e ardhur në pushtet në
Serbi, në mesin e kaosit dhe problemeve që përballej,
si gjithmonë gjeti energji dhe burime për të bashkëpunuar
me Gjykatën e Hagës. Ky bashkëpunim nënkuptonte
përgatitjen e dosjeve dhe dërgimin e informacioneve
mbi politikanët e Kosovës, natyrisht atyre që kishin
ardhur në skenën politike nga lufta.
Veçanërisht pas dorëzimit spektakolar të
Sllobodan Millosheviqit, kryeministri aktual serb, Zoran Xhinxhiq,
e ka përdorur këtë rast për t'i kërkuar
kryeprokurores Del Ponte, dërgimin në Hagë dhe
të shqiptarëve të Kosovës, të cilët
sipas tij kanë kryer krime lufte dhe të tjera që
gjykohen nga gjykata në fjalë.
Sipas Xhinxhiqit, i cili ka luajtur kartën e politikanit
më bashkëpunues e më të hapur në Serbinë
e pas Millosheviqit, vetëm në këtë mënyrë
mund të sigurohej bashkëpunimi i mëtejshëm
i Beogradit me Hagën dhe Gjykata, sipas tij, të jepte
shembuj paanësie.
Megjithëse bashkësia ndërkombëtare, përfshirë
këtu dhe Gjykatën Ndërkombëtare për ish-Jugosllavinë,
ka qenë e familjarizuar me lojën e Beogradit, megjithatë
nuk i ka thënë jo, përkundrazi, informacioneve
të shkuara nga Beogradi drejt Hagës për drejtuesit
e UÇK-së.
Natyrisht ato nuk kanë qenë baza e vetme e ardhjes deri
tek aktakuzat për katër të dërguarit në
Hagë.
Segmente të bashkësisë ndërkombëtare
të përfshira në ngritjen e aktakuzave të fundit.
Koncepti bashkësi ndërkombëtare është
tepër i gjerë dhe në vetvete ngërthen një
morri aktorësh e institucionesh, shpeshherë me interesa
të ndryshme e jo rrallë dhe të kundërta.
Ndërsa çështja e statusit të Kosovës
duket se po rikthehet në tryezën e diskutimit në
forma të ndryshme, bashkësia ndërkombëtare,
apo thënë më mirë, lojtarët ndërkombëtarë
që do të jenë të përfshirë në
diskutimet e ardhshme mbi statusin, janë në rrugë
e sipër të përgatitjes. Natyrisht me shpejtësi
të ndryshme dhe jo të gjithë kanë të
njëjtin qëndrim.
Pikërisht segmente të bashkësisë ndërkombëtare
besojnë se Kosova duhet të mbetet në një mënyrë
ose në një tjetër e lidhur me Beogradin. Kjo është
e vështirë të arrihet pas luftës së vitit
1999 dhe pas afro katër vitesh të administrimit ndërkombëtar.
Një nga mënyrat për t'i detyruar shqiptarët
për të pranuar ekzistencën nën një ombrellë
të përbashkët me Beogradin, është dërgimi
në Hagë i disa prej shqiptarëve, të përfshirë
aktivisht në luftë.
Në këtë mënyrë krijohet ajo ndjesia e
barazpeshës së fajit. Pra të dyja palët kanë
bërë krime, por ato i përkasin së kaluarës,
ndërsa tani është koha e integrimeve dhe bashkjetesës.
Ndërkaq ai grup që i takon më radikalëve në
bashkësinë ndërkombëatre dhe që beson
se do të ketë ndryshime kufijsh e rishkrim hartash në
Ballkan, ka gjetur rrugët dhe mundësitë që
në tryezën e nesërme të bisedimeve shqiptarët
dhe serbët të ekuilibrojnë dy anët e peshores.
Burime të besueshme brenda Hagës tregojnë se ka
dosje në përgatitje e sipër apo të përfunduara
dhe për shqiptarë të tjerë të Kosovës,
bërja publike apo jo e të cilave mbetet të vendoset
siç duket nga politika dhe nga skenarët e mundshëm
të statusit të ardhshëm të Kosovës.