Një
moral tjetër për mijëvjeçarin e ri
Tirania
Dikur,
krejt kaherë, nëpër qelitë e burgjeve serbe,
në një vetmi të plotë, ku njeriu më shumë
se askund tjetër ka kohë ta tjerrë mendimin, konkludoja
se në një botë bipolare lufta kundër tiranisë
është një çështje vetëm e idealistëve
që vendosin të sakrifikohen për të çliruar
vendin. Vetëdija se ky është një proces i gjatë
që përpin disa gjenerata më bënte ta prek trishtimin
me dorë, por pa vënë kurrë në pyetje domosdonë
për t'iu kundërvënë tiranisë pavarësisht
nga burgimi, torturat dhe poshtrimet e papërshkrueshme.
Më vonë në ekzil, në kontakt me intelektuatë
të arratisur të shumë vendeve të botës,
mësova për praktika të ndryshme të tiranive
dhe të tiranëve të të gjitha meridianeve dhe
racave. U binda se idealistët ishin në dezavantazh absolut.
Në metropolin e të arratisurve, në Gjenevë,
kam takuar kamboxhianë, kurdë, koreanë, vietnamezë,
kubanë, kinez, marokenë, libianë, iranianë e
natyrisht dhe irakienë. Krahas atyre që i kam përjetuar
vetë, rrëfimet e tyre plot llahtar edhe sot më lënë
pagjumë.
Në këto kontakte u binda se përkundër faktit
se tiranët u takonin kombeve, racave dhe vendeve të ndryshëm
ata ishin shumë të ngjashëm në mizoritë
e tyre. Por gjithsesi ironia më e madhe ishte kur ata 'legjitimonin'
tiraninë, duke organizuar zgjedhje, siç është
rasti i fundit me Sadamin, kur 100% të irakienëve votuan
për të! Një popull i tërë bëhet teatër
kukullash. Pas farsave të tilla kam pasur rastin të shoh
të arratisur politikë që binin në një depresion
deri vetëvrasës.
Por rënia e Murit të Berlinit, ky grusht i fortë
kundër tiranisë, sigurisht më i forti deri atëherë,
shumëve ua ngjalli shpresat.
Krijimi i Gjyqit të Hagës dhe nxjerrja para tij për
krimet që ka bërë e një tirani siç është
Millosheviçi është një grusht tjetër
substancial që i jipet tiranisë, sepse tash lufta kundër
saj nuk po mbetet më vetëm çështje e idealistëve
të vendeve ku sundon tirania, por po merr formën dhe përmasat
e një procesi botëror. Duke ravijëzuar kështu
domosdonë e një morali të ri për milineumin
që nisëm.
Kjo është fitorja më e madhe e Demokracisë mbi
Tiraninë.
Përkufizimi
i gabuar
Në
këtë rrafsh politika perëndimore kundër Sadamit
është e flashkët dhe e mbështjellur me terminologji
aspak adekuate. Sepse thelbi i konfliktit duhet të nxjerret
në pah krejt lakuriq, pa e mbuluar as me naftë, as me
religjion e as me çarmatim, por parasegjithash me domosdonë
e rrëzimit të një Tirani, i cili tash një çerek
shekulli po ngulfat jetën e 25 milion njerëzve dhe po
destabilizon njërin prej rajoneve politikisht më tektonike
në botë, Lindjen e Mesme.
Sadami ka marrë pushtetin në Irak më 1979. Pas një
viti , konkretisht më 19 shtator 1980, ai ka filluar luftën
kundër Iranit, njërën prej luftërave më
të përgjakshme, ku kanë lënë jetën
mbi një milion e dyqindmijë njerëz, veç tjerash,
kjo luftë ka kushtuar1000 miliardë dollarë.
Taman kur përfundoi lufta me Iranin, Sadami sulmoi dhe pushtoi
Kuvajtin. Kështu ai provokoi intervenimin e Perëndimit
përmes Furtunës se Shkretëtirës dhe pasojat
e saj: shkatërrimin e ekonomisë së vendit, sanksionet
dërrmuese, dhe varfërimin e plotë të popullsisë.
Mirëpo ky intervenim mbeti një punë përgjysmë,
sepse Tirani nuk u rrëzua. Një rezultat konkret i këtij
intervenimi ishte se tash 8 vjet një pjesë e Kurdistanit,
atëherë nën Irak, tash po merret frymë lirisht.
Mbi 3 milionë e gjysmë kurdë për herë të
parë në historinë e tyre, pas shumë përpjekjesh,
por kësaj radhe falë intervenimit të Perëndimit,
kanë hapur shlirshëm mbi 2500 shkolla dhe kanë ngritur
Universitetin në gjuhën amtare; Kanë arritur të
kenë parlament, të ndërtojnë institucione; të
vetëqeverisen me shumë sukses.
Një territor ku nuk është e pranishme tirania, po
jeton normalisht dhe po ndërton një të ardhme tjetër,
ndërsa Iraku po kredhet në mjerim e skamje, dhe kjo për
qejfin e mustaqeve të Sadamit.
Alternativa është e qartë: Sadamin nuk mund të
hiqet normalisht nga pushteti. Kjo duhet bërë me forcë,
në radhë të parë për të mirën
e Irakut, por edhe të rajonit. Do të thuani pse dhe unë
mund t'ju numëroj njëqind sepse, por sepseja kryesore
është se nëse Sadamit i hiqen të gjitha armët,
do t'i mjaftojnë kallashët e gardës së tij që
të mbahet në pushtet..., pastaj tiranët, edhe këta
të kohës tonë, po trashëgohen. Ta zëmë
çfarë dallimi ka Kim Xhong Ili nga babi i tij monstrum,
Kim il Sun? Asnjë. Edhe Sadami i ka të bijtë e vet,
ashtu si edhe Asadi që i kishte dhe që e zëvendësuan.
Mu
për këtë intervenimi ushtarak në Irak është
i pashmangshëm. Ky është një oblgimi që
Perëndimi ka sot ndaj këtij vendi me një civilizim
të lashtë e me mundësi të mëdha.
çlirimi i Irakut dhe menagjimi normal në periudhën
e postsadamit do të bënte nga Iraku një Gjermani
në Lindjen e Mesme, ku do të vihej një baraspeshë
strategjike dhe do të krijoheshin kushtet për rirregullimin
e krejt këtij rajoni me shumë probleme e me jo pak tiranë,
të cilët duhet të mësojnë se çka
i pret nëse nuk ndjekin rrugën e reformave thelbësore.
Mu
për këtë përkufizimi i luftës duhet jetë
jo luftë kundër Irakut, por luftë për Irakun
e kundër Sadamit, luftë e Demokracisë kundër
Tiranisë.
çarjet
e Perëndimit
Mungesa
e një përkufizimi të drejtë të kësaj
lufte ka shkaktuar çarje te fuqitë perëndimore
dhe terren për manifestime masive, nga të cilat përfiton
vetëm një person. Ai e ka emrin Sadam.
Kjo ka ndodhur edhe për faktin se administrata amerikane ka
vërtetuar katërcipërisht thënien e Kisinxherit
se demokratët në Amerikë duan t'i imponojnë
në botë vlerat e vendit të tyre, ndërkaq republikanër
forcën e tij. Mungesa qoftë edhe e një intelektualizmi
të përciptë për çështjen e Irakut
në Washington ka bërë që të mungojë
plotësisht debati sidomos në qarqet intelektuale evropiane.
E debati i gjerë për këso çështjesh është
i domosdoshëm, sepse përmes tij do të kristalizohej
edhe morali për mijëvjeçarin e ri. Për arsyen
e thjeshtë se Globi ynë duhet të rregullohet, e njëra
prej pikave të tij më të nxhehta është
Lindja e Mesme. Aty duhet të punohet për vendosjen e një
rendi të ri, i cili nuk mund të paramendohet pa heqjen
e Sadamit. Efekti i heqjes së tij do të jetë shumëfish
pozitiv, sepse do të çonte drejt zgjidhjes së çështjes
së kurdëve, drejt zgjidhjes së çështjes
palestineze por edhe do të hapte udhën për një
reformim të gjithanshëm politik e besa edhe religjioz.
Sepse kështu do të humbnin pozicionet e tyre dominuese
faraonë të ndryshëm që kanë shkuar shumë
larg në çoroditjen e tyre pushtetore.
Në
fillim ishte fjala, por pas saj edhe xhandari
Shteti
ka filluar të funksionojë në momentin kur xhandari
është parë në rrugë dhe ka rrezikuar drejtpërdrejt
lirinë e kusarit, lirinë e vrasësit, liritë
e keqbërësve të ndryshëm.
Forca ushtarake e Perëndimit sot është disi në
këtë pozicion. A duam ta rregullojmë këtë
globin tonë, të madh e të vogël njëherësh?
A duam ta zhdukim skamjen, urinë, sëmundjet korrëse?
A mund të ecim përpara pa pasur një rend që
respektohet me vullnet ose detyrim?
Sigurisht se jo.
A mund të mendojmë të përballemi si glob me
të panjohurat e pashmangshme të gjithësisë pa
rregulluar problemet më themelore këtu, në Tokë?
Sigurisht se jo.
Heqja e Sadamit është një hap drejt kësaj.
Fillimi i këtij mileniumi duhet të thotë edhe çrrënjosje
e tiranisë dhe e tiranëve në Tokë. Le të
fillohet me Sadamin, e pastaj me të tjerët. As Kim Gjon
Il hamami nuk duhet ta ketë të gjatë.
Kjo duhet të jetë logjika e mijëvjeçarit të
ri dhe thelbi i moralit që duhet të bëhet dominues.
Mendojeni
një të burgosur që kalbet me dekada në burgjet
e Sadamit, apo të sadamëve të ndryshëm, vetëm
pse ka qenë kundër tiranisë apo vetëm pse ka
ëndërruar lirinë, se çka pret ai prej neve
që jemi të lirë!
E si ai ka shumë, me mijëra, por dhe miliona të tjerë
që, ani se jashtë burgut, jetojnë gjithë jetën
e tyre në ankth.
Jetën që jetohet vetëm njëherë.
|