Gëzuar
kremtat, shqiptarë!
Shkruan:·
Shqiptar OSEKU
Ky
numër i revistës PASQYRA vie në një kohë
kremtash fetare e kombëtare. Përvjetori i Kongresit të
Manastirit, Kremta e Madhe myslimane, Dita e Flamurit, Krishtlindja,
Viti i Ri, të gjitha kanë ardhur të ngjeshura trus,
e në shpejtësi drite njëra-pas tjetrës. Mua
për vete më duket shenj i mirë kjo që sivjet,
Kremta e Madhe dhe Krishtlindja e kanë shtënë në
mes Ditën e Flamurit, si dy prindër të dashur, që
e fusin në mes fëmijën e hasretit. –Mbetet
të shoh se ç’do ndodhë në këtë
lëm dy viteve të ardhshme, për të parë
nëse do bëhem përfundimisht fetar, apo niçean.
Meqë
numrat e fundit jemi detyruar t’i nxjerrin në ritmin
modest 1h/muaj, ahere në këtë numër do të
gjeni tema që i rrahin ngapak shumë prej tyre. Meqë
ky ritëm ka mundësi të permanentohet për ca
kohë, kam kërkuar prej bashkëpunëtorëve
artikuj më karakter ca më të mprehtë debatues,
që të kenë afat ca më të gjatë. Unë
për vete jam i kënaqur, e shpresoj dhe besoj të mos
ju zhgënjejnë as juve.
Ky
numër tematikisht anon nga çështjet e (ri)hapura
të flamurit kombëtar. Është mëkat që
ky lëm debati nuk është lëvruar më zellshëm
prej intelektualëve e publicistëve tanë. Ndoshta
do të ishte mirë që edhe ne ta shpikim një herë
një qëndrim origjinal për një temë të
nxehtë, para se të na servojnë para hundësh
tjerët.
Për
sa u përket autoriteteve e subjeve politike, mendoj që
ato kanë me se të merren, para se të hapin debate
herake rreth flamurit. E para, po të duan, ato mund të
gjejnë ca cikërrima tjera me të cilat mund të
merren një çik. E dyta, pse autoritetet e urta politike,
temat e tilla së pari i lëshojnë në debat publik,
e vetëm pastaj, kur të jenë shoshitur protë
& contrat gjithanshëm, marrin një qëndrim të
vetin thjesht politik. Por autoritetet e urta, a: e ndër shqiptarët,
ato s’është lehtë t’i gjesh…
Këtu
do të gjeni edhe artikuj tjerë, për politikën,
gjuhësinë (për nder të Kongresit të Manastirit)
etj. Një recenzion tejet interesant na e dërgon bashkëpunëtorja
e rregullt Iliriana Bajo, për memoaret e Madlen Ollbrajtit;
aty ka njëmend se ç’të lexohet për sa
u përket shqiptarëve. E Ardiana Shala s’i zhgënjen
as kësaj radhe, as miqtë e, besoj, as armiqtë e vet…
Në
fund, vetëm edhe dy fjalë. Në këtë botë
të papërsosur, stina e kremtave nganjëherë,
në vend që të përhap gëzim, përhap
stres, nervozë e kriza. E kam me të jetuar, jo me të
dëgjuar. Unë miqtë i këshilloj gjithnjë
që, në situata të tilla, të mundohen të
kujtojnë sukseset, ato që i kanë bërë mirë,
në punë, në lëmin privat, etj. Të zgjuarit
e dinë që njerëzit i përsërisin gabimet;
të mençurit e dinë, që mund të përsëritet
edhe receta e suksesit. Hindutë e kanë një fjalë
të veten për këtë koncept, e quajnë Kharma.
E
dyta, miqtë i këshilloj të kujtojnë ata që
kanë nevojë për ndihmë. Një fjalë
e ngrohtë ta ngroh shpirtin; shto ca lekë, ngrohet edhe
barku. Në kapitalizmin e shpellave që ekziston ndër
shqiptarët sot, ka plot që kanë nevojë për
ndihmën tuaj. Kësaj radhe s’do të apeloj për
revistën PASQYRA, po për më të vobegëtit
në radhët tona; për ata te të cilët po
na përsëriten skenat migjeniane. Në Kosovë janë
familjet e të rënëve, të viktimave, të
të zhdukurve. Gjithandej në viset shqiptare, janë
ata për të cilët kjo botë, duket, s’ka
asnjë avenir përmirësimi.
Njeriu
s’mund të ndryshojë vet tërë botën.
Por mund ta ndryshojë një gjysmë dite, për një
tjetër njeri. Mbase për një fëmijë, a për
një plak. Aq më tepër në kohëra kremtash:
Gëzimi i ndarë, dyfish gëzim; pikëllimi i ndarë,
gjysmë pikëllim.
|