Pas
standardeve, prapë standardet
Shkruan:·
Skerdi SIKA
Më
duhet të pranoj sinqerisht që këtë kryelajmin
e bujshëm të tetë standardeve, pardon: Tetë
Standardeve, për Kosovën, s’e rrok dot kjo rradakja
ime. Ndonëse kam qëndruar këtu shpesh e gjatë,
e ndonëse e njoh tanimë këtë cep të atdheut,
besoj, ca më mirë se sa trevën ku kam lindur.
Mundet
që mua më janë ngatërruar kabllot. Fundja, më
kanë thënë edhe më herët që jam leshko,
por unë kam besuar gjithnjë që e kanë fjalën
për flokët e mi; mundet që s’është
ashtu. Ka mundësi, pra, që virusi Y2K ndofta i preu qarqet
e mia qysh natën e Vitit të Ri 2000, meqë gjindja
po më thonë se unë paskam keqkuptuar gjithçka
që prej atëhere e deri sot.
Sepse,
në atë botën time fantastike, unë tash e 4 vjet
kam jetuar në iluzionin se Tetë Standardet shkruheshin
me germë të vogël. Se ato, pra, ishin ato të
vjetrat, të numëruara me nge, një nga një, që
në vitin 2000, e të botuara në anglisht, frëngjisht,
rusisht, kinezisht, shqip e serbisht, në të gjitha dokumentet
parësore të UNMIK-ut për Kosovën. (Madje mua
se si më bëhet që i kam parë diku të përkthyera
edhe gjermanisht, greqisht, e maqedonisht!)
Mbase
kjo s’do t’ishte problem, sikur të mos qe e frikshme.
Merreni me mend, ju lutem, ju jetoni e punoni normalisht me vite
të tëra, për të zbuluar befas pas 4-5 vjetësh
që paskët qenë delirant tërë kohën!
Brrrr…..
Dora
në zemër, për të qenë krejt i sinqertë
ndaj jush, unë druaj ende për shëndetin mendor. Timin
së pari; por, në qofsha unë në rregull, ahere
të ca tjerëve më të rëndësishëm
se vogëlsia ime. -Se të dy palët s’mund ta
kemi drejt, apo jo? Ose ishin të njohura këto standarde
më herët, ose s’ishin, këtu tërci-mërci
s’ka!
E
keqja është që, sipas psikologëve, deliranti
s’e realizon dot faktin që është në delir.
Quamëni paranojak po deshët, fundja kjo bën pjesë
në delir: po si të dalloj në jam zgjuar tani, apo
në kam qenë i zgjuar më herët, e jam në
makth tani? –Pssst shoku, meqë erdhëm te kjo pika:
në qoftë se unë kam të drejtë, e tjerët
jo: si bën njeriu për ta ruajtur shëndetin në
një ambient komplet delirant?
Meqë
për momentin ndodhem jashtë rrezeveprimit të psikiatrisë
kosovare, mund ta hap zemrën pa drojë. Mua më duket
që kjo puna e standardeve i gjason rrobave të reja të
mbretit.
Duket
sheshit që standardeve s’u është ndërruar
asnjë germë qëkur u artikuluan së pari. Ndryshimi
i vetëm është, që tani u caktua një afat
(ano Domini 2005), krejtësisht jodetyrues për të
gjitha palët, për të këqyrur se si e sa ka vajtur
procesi.
Për
mendjen time, ky s’është ndonjë kapitull i
ri i sagës kosovare. S’është madje as pasus
i ri. Mundësisht kryerresht; -por atëhere tregohem optimist
i paparë, pothuajse si kryetari Rugova.
Ajo
që është e re, është se bashkësia
ndërkombëtare ka pranuar që është doktor
tejet hutaq: pothuajse një gjysmë dekade, pra, ajo as
paska pasur, as paska kërkuar të gjejë, veglat më
themelore për ta këqyrur nëse pacienti i ndjek apo
jo udhëzimet.
Një
lëshim i tillë do ta rrëzonte në provim cilindo
student të mjekësisë; por jo, a jo! doktorët
e vetshpallur të Kosovës. Për ta ruajtur fytyrën,
ata mbledhin kuvend, u mëshojnë daulleve, xurlave e borive,
e nxjerrin me pompë – termometrin!
Në
fakt, më fort se doktorin, ndërkombëtarët më
kujtojnë shamanin e indianëve. E se kë më kujtojnë
shqiptarët e fascinuar nga termomentri, për këtë
më mirë të mos shprehem fare.
|