Dyshtetësia,
privilegj a lojë?
Shkruan:
Skerdi SIKA
Një
lëndë, që ishte e paparamendueshme para vetëm
një viti, është përplasur sot me forcë
e ka ngritur shumë pluhur në tryezën e punës
së qeverisë greke. Athina zyrtare ka marrur përsipër
të shqyrtojë nëse do t'u ofrojë mërgimtarëve
shqiptarë atje dyshtetësi.
Merreni
me mend, ju lutem. Rreth 300 000 shqiptarë, sa thuhet se kanë
mërguar në Greqi (ndonëse numrin e saktë s'e
di askush, e më së paku autoritetet e shtetit shqiptar)
kanë një shans - të hollë vërtet, por megjithatë
- që të fitojnë shtetësinë greke pa u detyruar
së pari të heqin dorë prej asaj shqiptare.
Nëse,
përsëris: nëse!- kjo lëndë kalon në
parlamentin grek, atëhere sekush do të mund të konstatojë
lirisht se marrëdhëniet mes Shqipërisë e Greqisë
paskan hyrë vërtet në një epokë të
re.
Të
shkuara të harruara acarimet e pasluftës, të shkuara
të harruara manipulimet me 60 000 minoritarët greqishtfolës
të Shqipërisë. Nëse kujtojmë edhe gatishmërinë
e papritur që po signalon Athina për ta trajtuar çështjen
e pronave çame, me fjalët e ambasadorit grek në
Tiranë, "si lëndë juridike e jo çështje
politike", atëhere mesazhi i kombinuar del: "Lamtumirë
Ballkan, mirësevjen Evropë!"
E
megjithatë, në anijen e politikës shqiptare, thirrjet
joshëse të sirenave greke janë pritur me një
gjakftohtësi dyshuese. Mëdyshja ndaj blatimeve të
papandehura që i shpërndan Athina zyrtare këtyre
ditëve mbase buron nga ngurrimi i moçëm i shqiptarëve
kundrejt fqinjve të tyre mendjemëdhenj, të zgjuar
e ngatërrestarë ("Ruaju, bir, dhuratës së
danajve!"). Por, skepticizmi ushqehet edhe nga fakti se shqiptarët
s'po e kuptojnë dot motivin e dashamirësisë së
papritur të grekëve.
Doemos
që ajo nuk varet -ruana Zot!- prej trysnive të Tiranës.
Qeveritë shqiptare, si qeveria Nano, ashtu edhe të gjitha
qeveritë tjera prej asaj të Durrësit 1912 e këndej,
çamët i kanë zënë në gojë vetëm
shkarazi, "meqë ra fjala", ose shumë-shumë
në një gjest patetik të vetmbrojtjes së imagjinuar
kur Athina ngre ngatërresa për minoritarët. Kurse
sa për dyshtetësinë, qeveritarët shqiptarë
s'e kanë zënë në gojë as privatisht, meqë
o s'e kanë njohur, o s'e kanë besuar të jetë
mundësi.
Le
që edhe po të kish shpurdhur, shteti i dobët shqiptar
prapë shalqi do të qethte. I shkëputur prej Evropës,
me epitetin "shtet i dështuar" në supe që
i rëndon sa kryqi i Krishtit, e me financat gati krejt në
duart e grekëve, Tirana zyrtare prej grekëve mund të
kërkojë sa të dojë (nganjëherë), por
do të kënaqet me atë që i jepet.
Trysnira
në favor të shqiptarëve s'bëjnë as partnerët
ndërkombëtare të Athinës. Në BE Greqia
e ka në dorë kryesinë e radhës, kurse në
NATO të gjithë ndjehen të lumtur kur harrojnë
se Greqia ekziston.
Dora
në zemër, kërkesa për dyshtetësi është
ngritur për shqyrtim aty-këtu, si mundësi teorike,
nga p.sh. grupet për mbrojtjen e mërgimtarëve, Komiteti
i Helsinkit etj. Fundja, Greqia në letër është
një shtet qytetar, e s'do të mund t'i refuzonte gjer në
amshim kërkesat për shtetësi greke. Nëse do
ta quash veten anëtare në botën e qytetëruar,
apo -si në rastin grek- nëse do t'i kritikosh fqinjët
si barbarë të paqytetëruar, atëhere doemos që
do ta plotësosh së pari vet një minimum qytetarie.
Por
ky kthjellim nuk na shpien deri në fund. Sa për fillim,
kjo nuk na e ftillon kthesën greke për sa i përket
lëndës çame. Ajo deri dje ishte patate aq e nxehtë
sa s'e prekje as me pirun. Befas, pothuajse brenda natës, ajo
u kthye në "lëndë juridike" të vakët,
pothuajse jointeresante për "dy fqinj të ngushtë"
si Shqipëria e Greqia: si, e pse?!
Kuptohet
që, në mungesë të ftillimeve më të
mira, në sipërfaqe pluskojnë teoritë e konspiracionit.
Më sakt, janë të numërt ata që e lidhin
ndërrimin e kursit në Athinë me ngatërresat
që i nxori kryetari shqiptar Alfred Mojsiu për bazën
detare të Bisht-Pallës.
Rindërtimi i Bisht-Pallës ishte kontraktuar qëmoti
mes shtetit shqiptar e atij grek, po kryetari shqiptar dekretoi
në maj-qershor ndalimin e punës.
Motivet
qenë thjesht politike. Zt Mojsiu u shërbye me Bisht-Pallën
për të protestuar kundër qëndrimit josolidar
të Greqisë rreth Irakut, ku Shqipëria kontribon me
trupa të zgjedhura (dakord, edhe lufta e Kosovës mund
të ketë lozur rol), e njëherit për t'i dërguar
një signal të fortë besnikërie Uashingtonit;
nëse edhe Turqisë do t'i pëlqente ky dekret, aq më
mirë!
Dekreti
presidencial i zt. Mojsiu u rrëzua në parlament nga majoriteti
socialist i kryeministrit zt. Nano. Kjo pritej, e ndoshta edhe duhej
patjetër, meqë pezullimi i një kontrate ndërkombëtare
do t'i kushtonte multum Tiranës së varfër. Në
fakt, ciniku do të dyshonte që mu kjo edhe ishte ideja
e kryetarit shqiptar...
Nëse
është njëmend kështu apo jo, kjo le të
mbetet pa u thënë. Fundja, e vërteta do të del
në shesh kur të vje ora për ta zgjidhur lëndën
e dyshtetësisë, gjegjësisht të pronave çame.
Nëse vendimet merren pa vonesë e pa vegëza, e zbatohet
pa pengesa prej byrokracisë greke (e cila është shumë
më afër politikës se në vendet tjera evropiane)
atëhere kjo do t'u vinte kapak floriri një shekulli grindjesh
e mosbesimi mes dy fqinjve më të lashtë të Ballkanit.
Njeriu
s'bën kurrë të thotë kurrë, meqë mrekullitë
ende ndodhin: pesimisti le ta çojë mendjen një
çikë te Kosova. E drejta, në Ballkanin që
njoh unë, jo realisti, po as optimisti s'do të vinte bast
për dy mrekulli brenda një qindvjetëshi. Mirëpo,
ky nënqiell ka ndërruar shumë këtyre vjetëve.
E se sa ka ndërruar tamam - këtë do ta marrim vesh
së shpejti. Kur të merren dy vendime të rëndësishme
në Athinë. |