Me
këso miqsh, Shqipërisë armiqtë s’i duhen
Shkruan:
Skerdi SIKA
Para
ca ditësh më ra ta dëgjoja këngën më
të re të një rapsodi, i cili, fatlumërisht për
muzikën shqiptare, ende mbetet i panjohur. ”O e mjera
Shqipëri, kush të ka hedhë me krye në hi? -Nano
e Salë me gjithë parti!”
Kënga
ogurzezë sikur paralajmëronte qytetarët e thjeshtë
t’i mbyllin dyert e dritaret para stuhisë së re
politike që po afronte. Pa një – pa dy, tendosjet
kulminuan në trazira të dhunshme në qendrën
e kryeqytetit, një vërejtje flagrante se ku mund ta shpie
vendin pasioni i errët i urrejtjes politike.
Kësaj
radhe salistët kishin leje të policisë për tubim
në sheshin Skënderbej. Por u pa që ata s’e
kishin ndër mend të mjaftohen me një protest evropian.
Partizanët salistë u dyndën drejt kryeministrisë,
të cilët e vandalizuan me gurë për orë
të tëra, me ndërhyrje policore e dhjetëra arrestime
si pasojë.
Incidenti
paralajmëron një pranverë të nxehtë në
politikën shqiptare. Tendosjet mes salistëve e nanistëve
janë sforcuar pas rizgjedhjes së Fatos Nanos në postin
e kreut të PS-së.
Për
oponencën e Nanos, rizgjedhja e tij ishte dëshmia e fundit
se ky jo vetëm që ka andje, por ka edhe mundësi,
ta shalojë Shqipërinë për shumë vjet me
radhë.
Sidomos
për Sali Berishën, politikisht e personalisht, rizgjedhja
e oponentit të tij në fronin socialist ështe bezdisëse
sa s’bën. Sepse ai tani, sikur të mos mjaftonte
pushteti i Nanos e mëdyshja e botës, duhet të luftojë
edhe me moshën e vet të thyer. Dy mandatet e ardhshme
janë shansi i fundit i Salës për të lënë
pas ca më shumë se kujtimin e presidencës së
vet dështake. E ky është një ogur fort i keq
për Shqipërinë.
Salës
i janë kurthuar punët lëmsh, si në një
përrallë të keqe. Sa më fort që orvatet
ta rrëzojë Nanon, aq më terminator del ky i fundit.
Në fakt, sot duket më kthjelltë se kurë se armiku
më madhor i Sali Berishës është Sali Berisha.
Problemi
Nr 1 i Berishës është imazhi i tij autokratik, të
cilin e fitoi më 1997. Për fat të keq të vetin,
ai këtë imazh ka vazhduar ta kultivojë me një
përkushtim prej idioti, duke u shtënë rregullisht
lemzën e drojës si shqiptarëve, ashtu edhe bashkësisë
ndërkombëtare. Një këshilltar i urtë do
t’i kish thënë atij me kohë se, sa herë
që organizon tubime të dhunshme, e posaçërisht
sa herë që zbon prej partisë krerë që ta
kthejnë fjalën, aq më fort zhvlerëson hiset
tua në tregun e lirë të demokracisë. Por, si
kemi mundur të shohim sa e sa herë, së fundit edhe
tani para kryeministrisë, Berishës i mungojnë dëshpërimisht
këshillat e mira.
Në
vend të tyre, Berisha ka aleatë të dyshimtë,
që e shfrytëzojnë si murethyes për t’u
mëshuar me kokë kullave të Nanos. Dashamir Shehi,
Hysen Selfo, Adriatik Alimadhi, janë ca nga flora e krerëve
minorë që e ndjekin Berishën, një specie e miqve
që ia bën atij të tepërt pasjen e armiqve. Ata
e dinë fort mirë se në një demokraci normale
do duhej të regjistroheshin për të kërkuar punë,
andaj mezi presin sherr. Secili prej tyre është gati ta
luftojnë Nanon gjer në salistin e fundit (se vet s’kanë
anëtarë); e pastaj, kur të rrëzohet Sala, secili
do ta merr kreun e bllokut të djathtë për vete. Se
ku shpie ky vizion, gjykojeni vet…
Tërë
ky lëmsh i djathtë është mizerje për qytetarin
shqiptar, në radhë të parë pse si opsion të
vetëm real – ndonëse të urryer – ta lë
Fatos Nanon. Ky është edhe sekreti i thjeshtë, si
i fitoreve zgjedhore të socialistëve në vend, ashtu
edhe i fitores së Nanos në kongresin socialist.
Nano,
thjesht, mund të thojë: “Pas meje Berisha!”
Mjafton me kaq për ta trembur këdo, socialist a josocialist;
mundësisht me përjashtim të militantëve më
të sertë të Berishës dhe familjarëve të
tij (këta të fundit me ca rezerva).
Pa
gogolin Salë, Nano s’do të kish mbijetuar kurrë
me një administratë kaq të korruptuar, e me kaq pak
arritje për Shqipërinë; vendi ynë sot është
më larg Evropës, se sa që ishte më 1994-1996.
Po edhe pa krejt këto, do të mjaftonin zbulimet e gazetarëve
për stilin luksoz të kryeministrit, për darkat e
tij gjersa policia i nxirte kufomat prej Karaburunit, për shpërblimet
e tij ekonomike dhënë ministrave besnikë, për
afarizmin e dyshimtë të bashkëshortes, e për
teprimet e djalit, për ta rrëzuar Fatos Nanon nga pushteti.
Shqiptarët janë njerëz xhelozë; ta falin po
e huqe kërkesën për anëtarësim në
BE, por jo nëse blen me hile një makinë më të
bukur…!
Mjerisht,
sa më shumë kohë që shkon, aq më vështirë
ta arrish një version të tillë. Përkundrazi,
opozita pakrye dhe ekscesive e Berishës rrezikon ta forcojë
edhe më Nanon, duke ia afruar Shqipërinë modelit
rus.
Kushedi.
Nëse diçka nuk ndodh së shpejti në kreun e
opozitës, s’është larg menç që
rapsodi im i panjohur të bëjë hit me ndonjë
këngë pop për “kryeministrin seksi”,
sikundër që po ndodh në Moskë me këngën
Putin Lover. E ahere, ju premtoj, as dyert e dritaret e mbyllura
s’do të mund ta mbajnë larg kutërbimin e politikës.
|