Ata
që kanë humbur dhe ata që kanë vrarë shpresën
Shkruan:
Xhafer SHATRI
Ngjarjet
e muajit të kaluar kanë qenë tronditëse për
të gjithë shqiptarët dhe për mbështetësit
e tyre kudo që janë ata. Në ato ngjarje ka pasur
gjëra të arsyetueshme, të paarsyetueshme dhe të
dënueshme.
Aktualisht katër çështje bien veçanërisht
në sy:
1.
Dy muaj e gjysmë para ngjarjeve koloneli Momir Stojanoviç,
shef i Agjencise së Sigurimit Ushtarak serb, në pyetjen
e gazetarit të javores « Nedeljni telegraf »
se a ka Agjencia dijeni për atë se çka po ndodhë
në Kosovë, deklaroi:
« Vitin
e fundit kemi arritur ta përtërijmë, gjegjësisht
të sigurojmë prezencën tonë operative, mu në
kreun e udhëheqjes seperatiste të Kosovës, në
kreun e organizatave terroriste që veprojnë atje dhe që
i kanë degët e tyre në Jug të Serbisë.
Tash atje kemi një numër më të madh operativësh,
dhe këtë në pozita të duhura prej nga mund të
përcjellim çdo gjë... »
Më
2 mars 2004, qeveria serbe e dalë nga zgjedhjet e fundit, përmes
kryetarit të saj, V. Koshtunica paraqiti para Parlamentit serb
programin e saj. Pikë e parë dhe e më e ngutshme
e Programit ishte çështja e Kosovës për të
cilën Koshtunica propozoi kantonizimin ose ndarjen sipas shëmbullit
të Bosnje e Hercegovinës që u vendos në Dejton.
Koshtunica Kosovën e shtroi si çështje krejt parësore,
edhe pse në fund të ekspozesë pohoi se: në Serbi
prej një kohe shumë të gjatë po jetohet shumë
vështirë dhe se një numër i madh njerëzish
nuk dijnë se si t’ia dalin në fund të muajit...
Më 11 mars, peshkopi Artemije i dërgon SP të KB,
Kofi Anan një letër ku kërkon masa shtrënguese
në Kosovë, sidomos « më shumë policë
ndërkombëtarë të përgatitur për të
luftuar kunër terrorizmit dhe krimit të organizuar... »
Më 15 mars Koshtunica pranoi një delegacion të enklavave
serbe në Kosovë.
Më 15 mars, në ora 18h30, në çagllavicë
plagoset nga persona të panjohur Jovica Iviç, nxënës
18 vjeçar. Sipas të plagosurit sulmi është
bërë nga shqiptarët që i kanë folur serbisht
e të cilët « kanë shtënë nga
vetura e me armë të pajisur me shurdhues ».
Po atë natë serbët e çagllavicës bllokuan
aksin kryesor rrugor të vendit.
Më 16 mars, rreth orës 16, katër fëmijë
të fshatit çabër, sipas njërit prej tyre,
të kërcënuar prej serbëve të fshatit Zupç,
që u kishin ndërsyer qenin, të frikësuar hidhen
në valët e turbullta të lumit Ibër. Tre prej
tyre, Egzon Deliu, 12 vjeç, Avni Veseli, 11 vjeç dhe
Florent Veseli, 8 vjeç gjejnë vdekjen aty.
2. Përkundër atmosferës eksplozive, megjithatë
askush nga përgjegjësit ndërkombëtarë që
qeverisin Kosovën dhe asnjëri prej udhëheqësve
të institucioneve dhe të partive politike të vendit
nuk ndërmori një hap të vetëm publik për
ta ndalë ortekun që pritej.
Më 17 mars Kosova ishte në anarki të plotë.
Nuk funksiononte asgjë. Madje as Kfori.
Në këtë anarki kolektive, trazirat e përplasjet
në Mitrovicë dhe në çagllavicë mund të
arsyetohen disi, por kurrsesi nuk mund të arsyetohen sulmet
mbi serbët dhe pronat e tyre në Prishtinë, Obiliç,
Fushë-Kosovë, Prizren, Pejë, Gjilan etj. Me asgjë
nuk mund të arsyetohen sulmet vandale mbi qytetarët e
qetë të Kosovës që nuk rrezikojnë askënd
dhe asgjë.
Ndërkaq djegia e shkatërrimi i objekteve dhe kulteve fetare
serbe është njëra prej faqeve më të zeza
në historinë edhe ashtu jo aq të lavdishme të
shqiptarëve.
Ato që bënë për dy ditë turmat e patru
të nxitura nga elementë kriminelë e psikopatë,
në fund të fundit nuk ishin asgjë tjetër veçse
përpjekje e suksesshme për të barazuar shqiptarët
me krimet sistematike që ka bërë kundër tyre
shteti serbë një shekull e gjysmë rresht.
3. Siç ka mundur të konstatohet fare lehtë pjesa
dërrmuese e pjesëmarrësve në trazirat e fundit
ishin me moshë 18 vjeç e tëposhtë.
Pra
ishte brezi i lindur në kohën e apartheidit, brezi që
ka filluar shkollën nëpër bodrume, brezi që
pa i ra fytyrës me brisk e ka përjetuar luftën, varganet
e ikanakëve, përdhunimet dhe vrasjet masive. Ky është
brezi më fatkeq i Kosovës, sepse pas përjetimeve
aq të rënda, çlirimi i vendit nuk i solli asnjë
perspektivë, asnjë minimum të përkujdesjes shoqërore,
institucionale, asnjë mundësi për të kryer një
shkollë të mirëfilltë, për të pasur
një vend pune, për të krijuar familje...
Ky
brez nuk pati një njeri të vetëm t’i mbrojë
interesat e tij në parlamentin tragjikomik të Kosovës.
Prandej edhe mund të quhet brezi që ka humbur shpresat,
e njerëzit e tillë mund t’i luajnë të
gjitha rolet në histori, në rastin më konkret edhe
ato më të këqijat.
Paqs
ngjarjeve të tilla trinditëse pyetja e parë që
shtrohet është: ku ishte dhe çka bëri elita?
Me një fjalë mund të thuhet se në këto
ngjarje nga personalitetet me peshë ka shpëtuer me fytyrë
vetëm Bajram Rexhepi.
Të tjerët po të kishin vetëm një minimum
dinjiteti e ndjesi përgjegjësie do të vetëshkarkoheshin,
sepse, në fund të fundit, orteku vetëvrasës
i marsit është në radhë të parë rezultat
i sjelljes kundërhistorike e për një kohë të
gjatë i elitës politike të vendit. Për arsyen
e thjeshtë se falë inkriminimit të gjithfarshëm
të elitës tonë politike në radhë të
parë, administrata e pamëshirshme e Kombeve të Bashkuara
e ka ndarë Mitrovicën, ka krijuar enklavat dhe ia ka hangër
Kosovës, si krokodili, 5 vjet tranzicioni. Mund të thuhet
kështu thjeshtë, sepse po të ishin ndërtuar
vetëm disa segmente të qëndrueshëm në Kosovë,
këtu nuk do të ndodhnin kurrë trazira tïlla
si ato më 16 e 17 mars 2004.
4.
Ngjarjet tragjike të muajit të kaluar kanë hapur
me forcë shtegun për copëtimin e Kosovës, duke
i dhënë Serbisë një argument të fortë
për të këmbëngulur në këtë opcion.
E tërë adminsitara serbe është mobilizuar në
këtë drejtim dhe ka vënë në lëvizje
të gjithë miqtë e Serbisë.
Kur mundësinë e ndarjes nuk e përjashtojnë as
miq te dëshmuar të Kosovës si Daniel Server dhe Norton
Abramovitz, atëherë kumbonët e alarmit do të
duhej të na i shurdhojnë veshët.
Për habi, edhe personalitete shqiptare me peshë kanë
shtruar nevojën e krijimit të kufirit etnik mes shqiptarëve
dhe serbëve, duke harruar të vërtetën historike
se kur ndahet territori, fiton gjithnjë ai që është
më i fortë. E faktori shqiptar është shumë
i dobët për t’i lejuar vetës një luks
të tillë.
Mjerisht ka indikacione të besueshme se edhe kreu i ndonjë
partie në Kosovë është lëshuar në
veprime konkrete në këtë drejtim të rrezikshëm.
Por, për fat, numri i partizanëve të pavarësisë
është i madh dhe krejt dominues në Kosovë. Prandaj
ky korpus pritet të jetë më i zëshëm dhe
më i vendosur në këtë vijë, duke dalur,
në rast nevoje, edhe me kërcënimin krejt konkret
se loja me Mitrovicën si parathënie për ndarjen e
Kosovës nuk guxon të zgjas edhe më tej, sepse kjo
do të çojë imperativisht në copëtimin
e Maqedonisë e Malit të Zi dhe në një krizë
tjetër tepër të rëndë në Ballkan.
Mbi këtë vijë, që në muajt e ardhshëm,
mund të vihet në binarë një lëvizje e fuqishme
politike, e cila do të ketë perspektivë të qartë
vetëm nëse krahas pavarësisë angazhohet jo me
fjalë por konkretisht për tolerancë dhe respektim
absolut të të drejtave të pakicave në Kosovë
dhe për integrimin e tyre në të gjitha poret e jetës
politike, ekonomike e kulturore të vendit.
Kosova
mund të bëhet e pavarur vetëm nëse arrin t’u
siguroj të gjithë qytetarëve të saj liri, të
drejta dhe detyrime të njëjta. |