Pleqtë
e Sharrit mungojnë në Tiranë
Shkruan:
Ardiana SHALA
Në
bjeshkët e Sharrit, qenin që gërvish njerëzit
e shtëpisë e vrasin përnjëherë. Pleqtë
e dinë arsyen. Qeni që të kafshon një herë,
do kafshojë sërish.
Mjerisht,
meqë në politikën shqiptare ka më pak mend se
në bjeshkët e Sharrit, gabimet përsëriten në
serial. Këtu qeni të kafshon njëqind herë në
ditë. Kurse të gjithë mbeten pa mend, athua se ç’po
ndodh.
Ja
një shembull tipik. Relata e Tiranës zyrtare me Kosovën.
Ajo/ai që e ka ndjekur politikën shqiptare pas pavarësisë
e di, që Tirana zyrtare Kosovën e ka përdorur sistematikisht
si kartë bixhozi. Për ta lozur sa herë që zihet
pisk. Ashtu Zogolli. Ashtu Enveri. Ashtu Saliu. Ashtu edhe Nano.
Kape njërin, bjeri tjetrit.
Pas
luftës së Kosovës, shpresonim (ne optimistët
së paku) se diçka mbase do ndodh edhe në Tiranë.
Se atje do të mbledhin mendjen, e s’do bëjnë
më politikë në kurriz të kosovarëve. Meqë
shqiptarët po vejnë drejt një zgjidhjeje policentriste,
a-la Austri, të problemit të tyre kombëtar, me së
paku dy shtete sovrane. Që do jenë doemos fqinje të
mira, n’e paçin kokën në vend.
Po
jo! Meqë politikat në Tiranë sajohen prej injorantësh,
kjo s’qe e shkruar as kësaj radhe. Nano dhe socialistët
pushtetmbajtës ndaj ngjarjeve në Kosovë u pozicionuan
sërish aq u duhej për t’i maksikuar poenët
e vet diplomatikë.
Bota
i qortonte „ekstremistët kosovarë”, Tirana
poashtu. Bota kërkonte ndalimin e dhunës, Tirana dhe më
shumë. Bota u ”brengos” për minoritetet, Tirana
desh luajti fiqiri.
I
vetmi alarm që primadonat evropiane s’arritën ta
hapin në Tiranë ishte ai kundër ”pastrimit
etnik të serbëve”. (Dora në zemër, as
që pati nevojë. Meqë atë ide e patentoi i pari
Veton Surroi në Prishtinë.)
Tashti,
mund të kemi shumë ide ç’u dashka të
bëjë Tirana për Kosovën. Nëse jemi, pra,
të gjithë të mendimit se ia ka të ngratës
ca borxhe të vjetra. (E di që ka nga ata që thonë
ndryshe, por për ta do ta nxjerrim një edicion të
veçantë në greqisht.)
Unë
për vete, në ca drejtime jam tradicionale. Ja p.sh., unë
mendoj që reagimet e shtetit shqiptar ndaj ngjarjeve në
Kosovë, kur s’i kërcënohet agresion i armatosur,
duhet të nisen në radhë të parë nga interesat
e kosovarëve. E jo nga kalkulimet e ngushta politike të
një kaste politikanësh në pushtet.
Kjo
rradakja ime e shkretë ma thotë, p.sh. që Tirana
zyrtare mund t’i thoshte ato që kosovarët s’i
thonë dot, meqë e kanë ende lakun rreth qafës.
Tirana, ta zëmë, mund ta kish theksuar se në Kosovë
rezoluta 1244 ka kohë që është shkelur me dy
këmbët nga ata që janë sjellur atje për
ta mbrojtur atë. Aq sa edhe OSBE-ja e ngratë, në
daçi besoni e në daçi jo, në dhjetor 2003
i bënte thirrje UNMIK-ut dhe K-Forit (!) që ta respektojnë
atë të gjorën rezolutë.
Kur
Beogradi drejton ende gjykatës, policë e ushtarë
në Kosovë. Kur ata ndërtojnë enklava me ndihmën
e ndërkombëtarëve, e bllokojnë për 5 vjet
me radhë mbi 40 herë magjistralet kryesore të Kosovës.
Kur UNMIK-u dënon dhjetëra ish luftëtarë kosovarë,
por asnjë serb të vetëm, për krime lufte. Kur
papunësia në Kosovë arrin 70 përqind, gjersa
serbët lokalë marrin nga dy rroga, prej Beogradit dhe
prej UNMIK-ut. Kur ata s’paguajnë taksa, por shfrytëzojnë
zemërgjërësisht – si për vete më!
– fondet e taksapaguesve shqiptarë. E kur politikanëve
kosovarë u thuhet ”trus!” sa herë hapin gojën
të belbëzojnë një protest verbal. Ahere Tirana
mund të çilte të shkretën, ta ha djalli, se
R1244 nuk është shkruar vetëm për shqiptarët.
E se shqiptarët kishin plot, madje tepër, arsye për
të dalë rrugëve.
Pastaj,
e marr me mend që Nanos s’i duket fundi i botës
kur policë e ushtarë përdorin mbidhunën. Por
20 (?) të vdekur brenda dy-tre ditësh do duhej të
ishin ca si tepër edhe për midet e forta të Tiranës.
Kur tanku grek i K-Forit e shtyp Alimuhamet Murselin 18 vjeç
në Ferizaj, ahere s’ka më vend për pallavra.
Tirana
mundej e duhej ta gjykonte dhunën kundër minoritarëve,
sidomos kundër tempujve fetarë, se ajo për t’u
gjykuar ishte. Por ajo e kishte borxh t’u dalë zot kosovarëve
në të gjitha drejtimet tjera. Dhe duhej të kërkonte,
në nivelet më të larta diplomatike, hetime të
pavarura për mbidhunën e përdorur kundër protestuesve.
Këtë mundej e duhej ta bënte patjetër një
shtet, që i thotë vetes ”shtet amë”.
Druaj
që rreziku më i madh nga ky qëndrim gjakftohtë
i shtetit shqiptar, gjersa shqiptarët shtypen me tanke nëpër
Kosovë, i kërcënohet shtetasve të tij. Më
shumë se gjithçka tjetër, ky qëndrim signalon
se Nano & Co. s’e ka për gjë t’i shtyp
me tanke nesër as shtetasit e vet.
Unë
s’jam dashamire e fushatave të Salos, meqë ato më
shumë prishin se ndreqin. Që të jem krejt e sinqertë,
nëse dikush do më detyronte me revole në tamth që
ta zgjedh patjetër o Salon, o Nanon, unë prapë do
ta zgjedhja këtë të fundit. Meqë Salua, thjesht,
të lë përshtypjen se ka lojtur.
Por
dua të besoj se votuesi shqiptar do të dijë t’i
shporr që të dy, pa një, pa dy, në zgjedhjet
e ardhshme. Se ai do dijë ta zgjedh dikë që i dhimbset
vetja, e populli i vet. E kushedi, mbase edhe një që i
dhembsen kosovarët. Për hir të tyre, e për hir
të shtetit shqiptar.
E
di që gjasat janë minimale. Por shpresën s’do
ta humb gjer në minutin e mbramë të zgjedhjeve. Meqë
votuesit shqiptarë mbase janë më të emancipuar
se pleqtë e Sharrit. Ata s’do ta lënë qenin
t’i kafshojë sërish. E sërish, e sërish.
|