Votimi
kundër rezolutës çame ose votimi që pret të
ndëshkohet
Shkruan:
I. AHMETI
Projekt-rezoluta
për çështjen çame u hodh poshtë nga
Parlamenti i Shqipërisë, ndonëse prej disa muajsh
Komisioni Parlamentar për Cështje me Jashtë kishte
diskutuar tekstin. Shumica socialiste votoi kundër, derisa
disa nga drejtuesit kryesorë të Partisë Demokratike
në opozitë nuk morrën pjesë në seancën
e votimit. Besnikë të projektit në fjalë mbeten
partitë e vogla të djathta, që ishin dhe nismëtare
për këtë projekt.
Mos miratimi i projekt-rezolutës çame u shoqërua
me debate, në mesin e të cilëve pati dhe nga ata
që thanë se miratimi ose jo nuk kishte ndonjë rëndësi
të veçantë, pasi duhet të jetë ekzekutivi
dhe pikërisht qeveria e cila duhet të marrë hapa
konkrete në këtë drejtim.
Pavarësisht debateve hedhja poshtë e projektit në
fjalë rinxorri në sipërfaqje një numër
problemesh lidhur me integritetin e politikanëve, probleme
që për hir të së vërtetës janë
shfaqur dhe më parë.
Së pari, politikanët në Shqipëri vazhdojnë
të jenë po aq të padishëm lidhur me problemin
çam, sa dhe paraardhësit e tyre të para viteve
'90. Padija e politikanit kur lidhet me një problem të
historisë së vendit të vet dhe me interesat e nevojat
e një grupi të caktuar të shoqërisë shndërrohet
në gabim. Për çdo gabim pason dhe pësimi.
Në mesin e politikanëve që ngritën kartonin
e kuq kundër projekt rezolutës çame janë dhe
ata të cilët ngritjen e kartonit e bëjnë në
varësi të detyrave të shtëpisë të
dhëna nga "kapua", që si çdo kapo më
shumë se drejtues politik është drejtues bande dhe
turme. Për ata që edhe 14 vjet pas rënies së
komunizmit nuk mësuan, apo nuk deshën të mësonin
të mendonin vetë, pasi nuk e njohin vetrespektin, një
ndihmë e specializuar psikologjike apo fetare është
e nevojshme. Mëshirë për ta.
Padija e pjesës kryesore të politikanëve lidhur me
çështjen çame gërshetohet tek një pjesë
e tyre me interesat e drejtpërdrejta ekonomike, apo me kontratat
hije që ata i kanë me shtetin grek, biznesin grek, apo
më hidhur me struktura në Greqi të njohura për
qëndrimet e tyre, anti-shqiptare, anti-evropiane dhe anti-amerikane.
Për këtë grup të dytë politikanësh,
gabimi shndërrohet në faj.
Dhe faji ndëshkohet. |