Ekstremisti
serb në Tiranë
Shkruan:
Shqiptar OSEKU
Shtëpia
e shqiptarit është e mikut dhe e Zotit, thotë zakoni.
Gjithçka në rregull, sikur zakoni të vlente: sikur
shtëpia të qe ende, miku të mos qe armik, e Zoti
të mos e kish braktisur nevojtarin. Por kur shtëpia është
rrënojë, armiku të kërcënon, e Zoti të
harron, ahere tradita e lashtë zakonore të lë disi
në baltë.
Si
kosovar e bir albanologu, i brymosur prej fëmijërisë
me traditën, jam mësuar t'i marr me rezervë disa
nga nenet e saj. Ja p.sh. kjo vizita e bujshme e Vuk Drashkoviçit,
Ministër i jashtëm serb, në Tiranë, e para e
këtij lloji në historinë e dy vendeve. Shqiptarët
do ta presin mikun me bukë e krypë, pa qoftë ai edhe
gjakës. Më optimistët ndër ne trumpetuan, pa
aterruar zt. Drashkoviç ende në aeroport, se ky na qenka
një fillim i ri.
Dora
në zemër, këtu ka njëmend diçka të
re. Shqiptarët kanë bërë aty-këtu vizita
te Vëllai i Madh në Beograd; kujtoni Esat Pashën,
Zogun dhe Enverin. Por serbët s'kanë denjuar gjer sot
asnjëherë të shpiejnë në Tiranë një
titullar kaq të lartë.
Por
a ishte kjo ardhje e mikut të mirë, apo trokitje e rrezikut?
Zemra e ngrohtë, mendja e ftohtë, thotë populli.
Zt Drashkoviç dhe shteti që ai përfaqëson
kanë ende shumë rrugë për të bërë
që të quhen miq të shqiptarëve.
Vizituesi
i tha pa ngurruar fjalët që priteshin prej tij. Frymë
e fqinjësisë së mirë. Bashkërendim i luftës
kundër krimit. Bashkëpunim ekonomik e politik. Fjalët
Demush. Por punët kurrkush - e ky është problemi
nr 1, si këtë herë, si përherë, i Serbisë
në raport me shqiptarët.
Punët
e mira vijnë ngadalë, do të thoni ju. E vërtetë.
Mirëpo, dita e mirë shihet në mëngjes. E zt
Drashkoviç dhe kolegët e tij në Beograd kanë
gdhirë mëngjese të panumërta duke sharë
e luftuar shqiptarët, si në kohën e Millosheviçit,
njësoj edhe pas tij.
Shqiptarëve
s'besoj se duhet t'u kujtosh që zt. Drashkoviç e startoi
karrierën e vet politike duke u kërcënuar botërisht
në media se do t'ua priste dy gishtat e fitores fëmijëve
shqiptarë. Ditëve që pasuan pas kërcënimit,
çetnikët e tij zunë t'i prejnë në parqet
e Prishtinës edhe pemët që kishin formën e V-së!
-Të njëjtët çetnikë, pra, që morën
pjesë aktive më vonë në masakrat e pamëshirshme
kundër joserbëve në Kroaci, Bosnje e Kosovë.
Është i njëjti Drashkoviç që, në
kohën e Luftës Çlirimtare në Kosovë,
nga posti i ministrit të Millosheviçit, u kërkonte
perëndimorëve në CNN e në BBC që t'i ndërprejnë
sulmet kundër Serbisë, se s'ia vlente të luftonin
për "shqiptarët primitivë".
Dikush
do të thotë që punët kanë ndërruar
në Beograd qysh atëhere. Ndoshta ka ndërruar edhe
zt. Drashkoviç...
Le
të mos e gënjejë mendja askënd. Ballkani ka
ujq që e ndërrojnë qimen. Si dhe ka Drashkoviçë,
që as qimen s'e ndërrojnë. Apo s'e kultivon zt. Drashkoviç
ende atë imazhin e vjetër mjekërrosh, për të
cilin ka thënë publikisht se e mban "në frymën
e traditës çetnike"?
Ndoshta
dikush do t'ia falte imazhin ministrit serb, sikur të ndërronte
mendjen. Fundja qimja s'kafshon, qoftë ajo edhe e ujkut, po
dhëmbët. Mirëpo zt. Drashkoviç vazhdon t'i
mpreh dhëmbët e vet, e të politikës serbe, pikërisht
për shqiptarët.
Gjatë
tërë periudhës pas Millosheviçit, zt Drashkoviç
është shquar si lider i rrymës nacionaliste në
politikën serbe, që kërkon riokupim të Kosovës
e copëtim administrativ të saj, si mjete për ta ndërruar
atje raportin demografik mes serbëve e shqiptarëve. Shule
shqip: shporrjen e shqiptarëve, e rikolonizimin e Kosovës
me serbë. Ai ka marrë pjesë aktive në orkestrimin
e luftës ekonomike kundër Kosovës, e është
ndër krerët e politikës së jashtme serbe rreth
Kosovës. -Nuk është fare e rastit, pra, pse mu Drashkoviçit,
që flet anglisht më dobët se tërë politikanët
serbë, iu dha posti i ndjeshëm i Ministrit të Jashtëm!
Tani
së fundi, mu në javën që do të vinte në
Tiranë, Partia e Përtërirjes Serbe e udhëhequr
prej zt Drashkoviç arriti të ngre në parlamentin
serb një ligj, me të cilin barabarësohen ligjërisht
luftëtarët partizanë nga LDB, që luftuan nën
Titon, me çetnikët mjekërroshë të Drazha
Mihailloviçit. Çetnikëve do t'u paguhen pensione
të veteranëve, e do t'u ngritet një përmendore
në të njëjtin vend ku Titua u ngriti përmendore
partizanëve më 1948. Çetnikët e rinj të
Drashkoviçit, pra, që sundojnë në pushtet,
po i pajisin me pensione e përmendore çetnikët
e vjetër, një ditë para se të vijë kreu
i tyre për vizitë në Tiranë!
Nuk
është që Drashkoviçi s'e di se çfarë
hatash kanë bërë çetnikët kundër
joserbëve në Ballkan gjatë LDB. Ai e di fort mirë,
që çetikët vranë pamëshirshëm mijëra
shqiptarë, përfshirë këtu edhe foshnjet në
djep. Ai e di fort mirë që Serbia, në vjeshtën
1942, u bë shteti i parë në Evropën e pushtuar
prej nazistëve që u shpall "Judefrei", i pastruar
prej hebrenjve. Shqipëria, ku numri i hebrenjve gjatë
LDB u shumëfishua falë ikanakëve prej Serbisë,
mund t'ia kujtonte këto, po t'i kish harruar. Po puna ështe
se zt Drashkoviç s'i ka harruar ato: përkundrazi, ai
i njeh mirë e i çmon ato vepra - ndryshe s'do t'i shpallte
heronj kriminelët e vjetër.
Detajet
makabre s'mbarojnë atje. Mu në orën që zt Drashkoviç
aterroi në Tiranë, gjeneralshtabi i ushtrisë serbe
zgjodhi të kumtonte se do të shpiente përforcime
të reja në Luginën e Preshevës, zonë kjo
e mbetur brenda Serbisë ku shqiptarët janë shumicë
dërmuese. Ca më vonë, në kohën kur zt Drashkoviç
po nisej prej aeroportit drejt qytetit të Tiranës, dy
batalione serbe me pajisje të rënda, nga përbërja
e "Korpusit të Kosovës" (quhet ende ashtu!),
kishin nisur rrugën drejt qyteteve shqiptare Preshevë,
Medvegjë e Bujan. Citoj ministrin serb të mbrojtjes, Pravosllav
Darviniç: "Jo për luftë, se situata është
e qëndrueshme, po për parapengim!" -Apo për
t'u dhënë të kuptojnë të dy palëve
në terren, si serbëve, ashtu edhe shqiptarëve, se
asgjë s'ka ndërruar, e se gjithçka do të vazhdojë
me të vjetrën.
Në
Kosovë, sipas ndërkombëtarëve, ka ende ca 100
000 shqiptarë (!) që kanë mbetur rrugëve të
botës, meqë serbët u kanë zënë a rrënuar
shtëpitë nëpër enklavat e tyre. Por mendja më
thotë se zt Drashkoviç s'erdhi në Tiranë për
ta diskutuar problemin e tyre.
Ndonëse OSBE-ja ka konstatuar se minoritarët serbë
janë të privilegjuar ekonomikisht e në rrafshin social,
zt Drashkoviç s'pushon së enduri gjithandej nëpër
botë për ta pmbpo zt. Drashkoviç vazhdon t'i mprërrallosur
"holokaustin shqiptar kundër serbëve të martirizuar",
që, sipas tij, po ndodh përditë (!) në Kosovë.
Në qoftë zt Drashkoviç ai i moçmi, e unë
jam i bindur se është, këtë përrallë
do t'ua ketë rrëfyer edhe mikpritësve të vet
shqiptarë.
Ahere
pse e mori vallë zt Drashkoviç mundin të vijë
në Tiranë, kur s'ka asgjë të re te serbët?
Arsyet
janë dy. E para është ekonomia. Serbia, ku banorët
sot kanë të ardhura për kokë banori ndjeshëm
më të ulëta se në Shqipëri, kërkon
dorështrirë kredi nga bota. Meqë bota u ka kushtëzuar
kreditë, duke kërkuar bashkëpunim me gjykatën
e Hagës dhe me fqinjët, Beogradi orvatet si e si të
shtiret sikur po bën diçka, mundësisht sa më
"historike", pa pasur nevojë të bëjë
asgjë konkrete. E pra, ku ka më "historike"
e më jodetyruese, se sa një vizitë e Drashkoviçit
në Tiranë?
E
dyta, Kosova. Zt Drashkoviç, që e njeh urrejtjen e fortë
të kosovarëve kundër Beogradit, është bërë
propagues i një ideje "të re" të nacionalistëve
serbë, sipas të cilës Beogradi më kollaj do
të dakordohet me Tiranën, se sa me Prishtinën, rreth
Kosovës. Po ata serbë, pra, që dikur shpienin divizione
në kufirin shqiptar për ta trembur Tiranën sa më
larg Kosovës, hetojnë sot nëse do të kishin
përfitim nga një ndërhyrje e Tiranës.
Dy
zogj me një gur, pra. Por jo zogj për gojën shqiptare,
po për atë serbe.
Ec
e thuaj, pastaj, se pleqtë s'dinin më mirë se ne...
Apo s'e thotë tradita, që me të pabesin besë
nuk ka?
Zt
Drashkoviç vërtet denjoi të vinte në Tiranë.
Por ai nuk është miku i mirë i zakonit. Përderisa
shtëpitë shqiptare të mbeten gërmadha, e Beogradi
të luftojë ethshëm interesat e shqiptarëve,
ne s'kemi pse të shpresojnë në mrekullira të
Zotit. Miqve të tillë duhet thënë ashtu si i
thonë kosovarët mikut ngucakeq: "Mirë se erdhe,
e edhe më mirë se shkove. Herën tjetër ndoshta
për të mirë!"
|