Ngritja
e një udhëheqësi
Shkruan : Iliriana BAJO
U
quajt "Fenomeni Obama", pas fjalimit që mbajti në
Kuvendin e Demokratëve amerikanë dhe fytyra e re e politikës
amerikane. Sipas mediave dhe ekspertëve të politikës
Obama ndoshta në dhjetëvjecarin e ardhshëm do jetë
kandidati demokrat për president të Shteteve të Bashkuara.
Barack Obama, afro-amerikan, që sapo i ka kaluar të 40-at
është zgjedhur anëtar i Kongresit amerikan në
zgjedhjet e 2 nëntorit. Obama ishte një nga pikat e pakta
të shpresës për demokratët amerikanë, që
jo vetëm humbën zgjedhjet presidenciale, por ulën
dhe përfaqësimin e tyre në Kongres përballë
republikanëve.
Ndërkaq republikanët, jo pa keqardhje, kanë deklaruar
se do të donin ta kishin Obamën pjesë të tyre.
Por ish-këshilltari i presidentit Regan deklaroi për mediat
se më e rëndësishme se përkatësia partiake
e Obamës është fakti se ai është amerikan.
Obama, një nga kritikët e ashpër të presidentit
Bush në fushatën presidenciale, vetëm një javë
pas zgjedhjes në Kongres, është ftuar nga presidenti
George Bush, në një mëngjes pune, për të
diskutuar bashkëpunimin mes dy partive në legjislaturën
e ardhshme. Obama premtoi bashkëpunim me republikanët
në cështjet me interes për Amerikën dhe qytetarët
e saj.
Komunikimi e koalicionet janë pjesë normale e politikës
edhe kur pozicionet e mbajtësve të tyre duken të
papajtueshme. Koalicionet mes grupimeve me qëndrime të
ndryshme në momente kthese, në shumicën e rasteve
në historinë e kombeve që e duan përparimin,
kanë dëshmuar sukses.
OBAMA:
" GJENIALITETI I AMERIKËS, BESIMI I NGRITUR NË ËNDËRRAT
E THJESHTA, NË FORCËN E MREKULLIVE TË VOGLA"
Fjalimi i mbajtur në Kuvendin e Demokratëve amerikanë
Në
emër të shtetit të mrekullueshëm të Illinoisit,
këtij udhëkryqi të kombit, tokës së Linkolnit,
më lejoni të shpreh mirënjohjen time të thellë
që po i drejtohem këtij Kuvendi. Sonte është
një nder i madh për mua, sepse le ta themi hapur, prania
e dikujt si unë në këtë podium nuk është
dicka e rëndomtë. Im atë ishte një student i
huaj, i lindur dhe i rritur në një fshat të vogël
në Kenia. Ai u rrit duke kullotur dhitë e duke shkuar
në shkollën e fshatit më të afërt. Ati
i tij, gjyshi im, ishte guzhinier, që shërbente në
familje të ndryshme.
Por gjyshi im kishte ëndrra më të mëdha për
birin e tij. Përmes punës dhe suksesit në shkollë
im atë fitoi një bursë studimi në vendin magjik
të quajtur Amerikë, që qëndronte si pishtar
i lirisë dhe mundësive për shumë të tjerë
të ardhur më parë në këtë vend. Derisa
studionte në Amerikë im atë u njoh me nënën
time. Ajo kishte lindur në Kansas, një qytet që i
takonte një pjese tjetër të botës, nga ajo që
vinte im atë. I ati i saj kishte punuar në ferma thuajse
gjatë gjithë kohës së Depresionit të Madh.
Një ditë pas Pearl Harbour ai u regjistrua për shërbimin
ushtarak dhe marshoi me ushtrinë amerikane nëpër
Evropë. Ndërkohë gjyshja ime punonte për të
rritur foshnjën e saj, nënën time. Pas lufte ata
vazhduan studimet, blenë shtëpi dhe lëvizën
në perëndim të vednit, në kërkim të
mundësive më të mira.
Edhe ata të dy kishin ëndrra të mëdha për
bijën e tyre, një ëndërr e përbashkët
lindur në dy kontitente. Prindërit e mi nuk ndanin vetëm
një dashuri të madhe me njëri-tjetrin por dhe një
besim të padiskutimtë në mundësitë që
ofronte ky komb. Ata do më vinin mua një emër afrikan
Barack, që do të thotë "bekim", duke besuar
se në Amerikën e tolerancës emri nuk është
pengesë drejt suksesit. Ata dëshironin që unë
të shkoja në shkollat më të mira, në një
vend ku nuk duhet të jesh i pasur për të shkuar në
shkollat më të mira, pasi në Amerikën zemërgjerë
nuk është e nevojshme të jesh i pasur për t'u
realizuar në bazë të aftësive. Ata të dy
nuk jetojnë sot, por e di se sonte nga lart më shohin
me krenari.
Unë jam sonte këtu para jush, mirënjohës për
laramaninë në origjinën time, i ndërgjegjshëm
se ëndrra e prindërve të mi jeton tek bija ime e
shtrenjtë. Jam këtu para jush dhe e di se historia e jetës
sime është pjesë e historisë amerikane. Ndaj
unë i detyrohem të gjithë atyre që erdhën
para meje dhe kjo pasi në asnjë vend tjetër në
këtë rruzull, historia e jetës sime nuk do të
ishte e mundur. Sonte jemi mbledhur të përsërisim
madhështinë e vendit tonë, madhështi që
nuk qëndron në lartësinë e rrokaqiejve, fuqinë
e ushtrisë sonë apo në ekonominë tonë.
Krenaria dhe fuqia jonë mbështetet në atë deklaratë
të thjeshtë të formuluar 200 vjet më parë:
"Ne i pranojmë si të vërtetë të mirëqenë
faktin se të gjithë njerëzit janë lindur të
barabartë. Nga Krijuesi ynë ata kanë ardhur në
jetë më disa të drejta të padiskutueshme, ku
mes tyre janë jeta, liria dhe rruga drejt lumturisë".
Ky është gjenialiteti i Amerikës, një besim
i ngritur në ëndërrat e thjeshta të njerëzve
të saj, në forcën e mrekullive të vogla. Se
ne e dimë se kur i mbulojmë fëmijët tanë
natën ata janë të ushqyer, të veshur dhe të
mbrojtur nga rreziku. se ne flasim atë që mendojmë,
shkruajmë cfarë mendojmë, pa u trembur se dikush
do vijë të na trokasë në derë. Ne mund
të kemi një ide, mbi të cilën nisim sipërmarrjet
tona, pa qenë të detyruar të paguajmë rryshfet
apo të punësojmë të birin e dikujt, për
të na mundësuar biznesin. Ne mund të marrim pjesë
në procesin politik pa pasur frikën se dikush do hakmerret
dhe se votojmë e votat tona numërohen cdo herë, ose
së paku shumicën e herëve.
Këtë vit, në këto zgjedhje, ne duhet të
riafirmojmë vlerat dhe angazhimet tona, t'i ruajmë ato
përballë një realiteti të ashpër dhe të
masim se si po e ruajmë traditën e të parëve
dhe premtimet për një të ardhme më të mirë
për brezat që vijnë. Bashkëqytetarë të
mitë amerikanë, demokratë, republikanë, të
pavarur, ju them sonte se kemi shumë punë për të
bërë. Kemi shumë për të bërë
për punëtorët që unë takoj në Galesburg,
Illinois, që po humbin vendet e punës në uzinën
e madhe Maytag, që po zhvendoset në Meksikë. Ne kemi
shumë për të bërë për babanë
që kishte humbur vendin e punës dhe i mbytur në lot
nuk dinte se si do përballonte tani 4'500 dollarë në
muaj medikamente për të birin, që nuk kishte sigurim
shëndetësor. Kemi shumë për të bërë
për atë zonjën e re nga St.Loius lindor, dhe mijëra
të tjerë si ajo, që kanë notat e mira, vullnetin,
dëshirën por jo dhe paratë e mjaftueshme për
të shkuar në kolegj.
Mos më keqkuptoni. Njerëzit që kam takuar si në
qytetet e vogla dhe në ato të mëdha, në dreka,
në zyra apo gjithkund tjetër nuk presin që qeveria
të zgjidhë të gjitha problemet e tyre. Ata e dinë
se duhet të punojnë shumë për të arritur
atë që dëshirojnë. Nëse shkon në rrethinat
e Cikagos njerëzit do të thonë se nuk dëshirojnë
që të ardhurat nga taksat e tyre të shpërdorohen
në Pentagon apo struktura të tjera qeveritare. Në
cdo qytezë njerëzit e dinë se qeveria e vetme nuk
mund t'u japë mësimin e dëshiruar fëmijëve.
Ata e dinë se prindërit duhet të përmbushin
detyrimet e tyre si prindër ndaj fëmijëve, pasi fëmijët
tanë nuk mund të arrijnë shumë nëse ne
nuk i ushqejmë synimet e tyre sa më lart dhe ato cfarë
presim nga ata. Nëse nuk ia mbyllim televizorin dhe nuk i lejojmë
që të mendojnë me klishe të tilla si "një
fëmijë me ngjyrë me libër në dorë,
sillet sikur të jetë një fëmijë i bardhë".
Jo, njerëzit nuk presin që qeveria të zgjidhë
gjithë problemet e tyre. Por ata e ndiejnë thellë
deri në asht se me një ndryshim në përparësitë
e qeverisë, ne mund t'i sigurojmë cdo fëmije në
Amerikë një jetë dinjitoze dhe se dyert e mundësive
mbeten të hapura për të gjithë. Ata e dinë
se ne mund ta bëjmë më mirë dhe ata e dëshirojnë
këtë zgjedhje.
Pak kohë më parë unë takova një djalë
të ri të quajtur Shamus nga Illinois. Ishte një djalë
i gjatë e i pashëm, me sy të kaltër e buzëqeshje
që nuk i ndahej nga fytyra. Më tha se do t'i bashkangjitej
marinsave në Irak. Derisa e dëgjoja kur më thoshte
se përse donte të shërbente në ushtri, besimin
e tij të padiskutueshëm tek ky vend dhe udhëheqësit
e tij, përkushtimin ndaj detyrës dhe shërbimit, mendova
se ky djalë ishte fëmija që cdonjëri nga ne
do dëshironte ta kishte djalë. Por në mendje më
goditi pyetja: A po i shërbejmë ne Shamusit ashtu si po
na shërben ai neve? Dhe mendimet shkuan tek ata 900 djem e
vajza ushtarë, njëherësh bij e bija, bashkëshortë
dhe bashkshorte, shok e fqinj që nuk do ktheheshin kurrë
në shtëpitë e tyre, në qytetin e lindjes, pasi
kishin mbetur në fushën e betejës në Irak. Mendova
dhe për mijëra familje që po përpiqen të
mbijetojnë me një rrogë më pak, derisa të
afërmit e tyre janë nisur në luftë, apo të
tjerët që më të dashurit e tyre iu kanë
kthyer të gjymtuar nga lufta, por sërish nuk kanë
paketën e plotë të sigurimeve shëndetësore
të paguar nga shteti, pasi ishin rezervistë. Nëse
i dërgojmë djemtë dhe vajzat tona në zona të
rrezikshme atëherë kemi detyrimin maksimal për t'u
kujduesur për familjet e tyre, pa fshehur asgjë. Njëherësh
asnjëherë nuk duhet shkuar në luftë pa pasur
numrin e nevojshëm të trupave që duhet për të
fituar luftën, për të siguruar paqen dhe për
të merituar respektin e botës.
Më lejoni të jem i qartë. Ne kemi armiq në botë,
armiq që duhen gjetur, luftuar dhe duhen mundur. Përgjatë
individualizmit tonë, për të cilin jemi të njohur
është, dhe një tjetër përbërës
i sagës amerikane. Ky është besimi se jemi të
lidhur si një popull. Nëse është një fëmijë
diku në jug të Cikagos që nuk mund të lexojë,
atëherë ky është shqetësimi im. Nëse
diku një e moshuar që nuk mund të blejë medikamentet
e nevojshme zgjedh mes qirasë që duhet ta paguajë
apo barnave, atëherë jeta ime është më
e varfër, edhe pse ajo zonjë e moshur nuk është
gjyshja ime. Nëse diku një familje arabo-amerikane nuk
ka mundësi për të paguar një avokat mbrojtës
kur i duhet të përballet me një proces gjyqësor,
atëherë edhe të drejtat e mia janë të cënuara.
Është një besim themelor që e bën këtë
vend të funksionojë dhe ky është besimi se jam
unë që e mbaj vëllanë tim, jam unë që
e ndihmoj motrën time. Është pikërisht kjo që
na lejon të realizojmë ëndërrat tona individuale
dhe sërisht të jemi sëbashku si një familje
amerikane.
Për të gjitha këto i them atyre që duan të
na ndajnë se nuk ka një Amerikë liberale dhe një
Amerikë konservatore, por ka vetëm Shtetet e Bashkuara
të Amerikës. Nuk ka Amerikë të bardhë dhe
të zezë, Amerikë të latinëve apo aziatikëve,
por ka vetëm një Shtetet e Bashkuara të Amerikës.
Përcarësit duan të na ndajnë në shtete
të kuqe e shtete blu, ku shtetet e kuqe i takojnë republikanëve
dhe ato blu demokratëve. Por unë kam lajme dhe në
këtë drejtim. Ne jemi fëmijët e Zotit dhe se
edhe në shtetet blu ashtu si në shtetet e kuqe nuk duam
që agjentët e sigurimit të kontrollojnë kartelat
tona në biblioteka. Ne kemi miq që janë homoseksualë
edhe në shtetet e kuqe. Ka patriotë në mesin e atyre
që e kundërshtuan luftën në Irak dhe në
mesin e atyre që e mbështetën atë. Ne jemi një
popull dhe i falemi të gjithë flamurit me yje dhe të
gjithë ne mbrojmë Shtetet e Bashkuara të Amerikës.
Ne duhet të marrim pjesë në politikën e shpresës
dhe jo të cinizmit. Këtu nuk flas për optimizmin
e verbër, që në fakt është i barsvlershëm
me padijen, kur mendon se duke mos folur për papunësinë
problemi do të zgjidhet, apo duke mos u marrë me krizën
në sistemin shëndetësor ajo do të kalojë.
Jo unë kam parasysh dicka më thëemelore. Bëhet
fjalë për shpresën e skllavit që këndon
këngë lirie rreth zjarrit, për shpresën imigrantit
që kërkon realizimin e ëndrrës në brigje
të largëta, shpresën për atë ushtarakun
e ri që patrullon ujërat tona, për shpresën
e atij fëmije kockë e lëkurë me emër qesharak,
që gjithashtu beson se Amerika është një vend
edhe për atë.
|