BALLKANI,
MISION I AFATIZUAR?
Shkruan:
Iliriana BAJO
Këshilli
i Sigurisë vetëm një javë para vizitës
së paralajmëruar për në Kosovë, me rastin
e zgjedhjeve lokale të 26 tetorit, e shtyu atë për
një kohë të pacaktuar. Arsyeja: Iraku dhe diskutimet
për zgjidhjen e krizës atje.
Pentagoni,
Departamenti i mbrojtjes i Shteteve të Bashkuara, është
plotësisht i përfshirë në analizat dhe planet
për një luftë të mundshme në Irak. Shtëpia
e Bardhë është përqëndruar tërësisht
në Lindjen e Mesme. Në një situatë të tillë
lind pyetja: Cila është e ardhmja e trupave paqeruajtëse
amerikane në Ballkan, e veçanërisht në Kosovë?
Zbritje efektivash
Presidenti
amerikan, Xhorxh Bush, e kishte në programin e vet, madje para
fillimit të luftës kundër terrorizmit, tërheqjen
e trupave amerikane nga misionet paqeruajtëse. Misionet në
Ballkan ishin ndër të parat në listë, për
më tepër që ato renditen dhe ndër më të
mëdhatë në numër.
Konflikti
në Maqedoni, në vitin 2001, vendosja e një numri
të kufizuar paqeruajtësish atje, nën flamurin e NATO-s,
por me përbërje tërësisht evropiane, qe shembulli
i parë i zbatimit të linjës Bush në Ballkan.
Ndërkohë
ndodhi 11 shtatori dhe Shtetet e Bashkuara u përfshinë
tërësisht në luftën kundër terrorizmit.
Pas kësaj pasuan pranverën e kaluar njoftimet e aleancës
veriatlantike për zvogëlimin e numrit të trupave
paqeruajtëse në misionet e Bosnjës dhe Kosovës
me 20 për qind deri në fund të vitit 2002.
Edhe
forcat amerikane do të pakësohen. Pas pakësimeve
të parapara deri në fund të këtij viti, brenda
KFOR-it do të mbeten diku rreth 4 mijë trupa amerikane.
Megjithatë,
ndërsa flitet për operacione të reja ushtarake në
Lindjen e Mesme, burime të besueshme brenda Pentagonit vërtetojnë
se ekziston nervozizëm rreth përkushtimit ushtarak në
Ballkan. Arsyeja dihet botërisht. Planet paraprake parashohin
se në rast të një sulmi të njëanshëm
amerikan kundër Irakut, do të duhen nga 150.000 - 200.000
trupa amerikane.
Por,
ka zëra me ndikim që argumentojnë fuqishëm për
prani të vazhduar në Ballkan. Analistë në Institutin
KATO në Shtetet e Bashkuara pohojnë se prania ushtarake
në Ballkan, e veçanërisht në Kosovë,
në kushtet e sotme ka rëndësi të veçantë
strategjike për regjionin.
Në
të njëjtën drejtim shkon edhe deklarata Sekretarit
të Shtetit, Kolin Pauell, korrikun e kaluar lidhur me misionet
paqeruajtëse të NATO-s në Kosovë dhe Bosnjë.
"Ne atje vajtëm bashkë, e bashkë do të
largohemi. Kjo mbetet politika jonë", siguroi ai.
Evropianët
të shqetësuar...
E megjithatë,
s'do mend se në planin afatgjatë vendet evropiane të
NATO-s s'kanë se si ta flejnë mendjen rreth vazhdimit
të pranisë amerikane në Ballkan. Aleatet evropiane
të Amerikës po përgatiten "për më
të keqen", si shprehen një sërë diplomatësh
evropianë privatisht. E me ketë ata nënkuptojnë
vazhdimin e operacioneve paqeruajtëse në Ballkan në
regji tërësisht evropiane, pavarësisht se a do të
vazhdojnë të jenë nën flamurin e NATO-s apo
jo.
Ky
shqetësim qe në qendër të takimit të mbajtur
javën e parë të tetorit mes ministrave të mbrojtjes
të Bashkimit Evropian, takim që u mbajt në Kretë
të Greqisë. Atje, vendet evropiano-perëndimore bënë
çmos t'i bindin Shtetet e Bashkuara që ta vazhdojnë
angazhimin e vet ushtarak në rajon, qoftë edhe në
numër të kufizuar.
Habitërisht,
ngulmimi më i fortë në këtë drejtim vjen
shi nga francezët. Ministrja franceze e mbrojtjes, Mishel Alio
Mari, ka konfirmuar botërisht se e njeh dëshirën
e Uashingtonit për t'u liruar nga detyrimet ballkanike. Por,
Alio Mari njëherësh e ka pohuar rëndësinë
e pranisë ushtarake në Ballkan, si tha ajo, "meqë
gjendja është ende e paqartë".
Ministrat
e mbrojtjes së vendeve të BE-së ishin të një
mendimi se tërheqja e trupave amerikane nga Ballkani mund t'u
dërgojë "sinjale negative" forcave të mbrapshta
në rajon. Shule shqip, kjo do të thotë se BE-ja i
druan një lufte të re ballkanike sapo të largohet
çizmja amerikane prej regjionit - e se evropianët qartazi
s'besojnë se mund t'ia vënë kapakun kusisë ballkanike
dora vetë.
...e të papërgatitur
Në
fakt, plot evropianëve - e më së shumti francezëve!
- u ka fort ëndja ta sundojnë kontinentin krye në
vete. Por puna është se vullneti nuk mjafton. Kur është
fjala te evropianët, dëshira është një,
e mundësia diçka krejt tjetër.
Lufta
në Gjirin Persik, e sidomos ndërhyrja e NATO-s në
Kosovë, evropianëve u ka dhënë të kuptojnë
se janë larg prapa kapacitetit operacional të amerikanëve.
Cinikët në Uashington s'lënë rast pa përmendur
se sikur SHBA-të t'i ngrinin shpenzimet ushtarake, e BE-ja
t'i dhjetëfishonte qysh sot, evropianëve do t'u duheshin
minimumi 20 vjet për ta arritur Amerikën në armatim!
Le
që problemet e evropianëve s'janë vetëm ushtarake.
Më shumë se aq, ato janë politike. Në thelb,
BE-ja është si një martesë e përdhunshme,
që ekziston vetëm falë hegjemonisë globale amerikane,
Pax Americana. Evropianët janë ata që ia nxorën
sytë njëri-tjetrit, e shkaktuan dy kasaphane botërore,
hiç më shumë se 40 vjet më parë. E, sikur
të mos ekzistonin culet shtërnguese amerikane, ata sigurisht
që s'do të përtonin të çohen peshë
sërish.
Duke
pasur parasysh këto, s'do mend pse krerët e BE-së
nxitojnë ngadalë. Para detyrave të tilla masive si
misioni paqeruajtës në Bosnjë, evropianët do
të dëshironin të provojnë vetveten në misione
më të vogla, që drejtohen më lehtë. Një
stërvitje të mirë ofron p.sh. misioni i tashëm
i NATO-s në Maqedoni, "Dhelpra e kuqërremtë".
BE-ja dukej fort e interesuar për këtë mision, por
grindjet kronike Greqi -Turqi bënë që BE-ja ta shtyjë
edhe për një kohë drejtimin e misionit në Maqedoni.
Mosmarrveshjet
brenda BE-së e komplokojnë të ardhmen e misioneve
paqeruajtëse në Ballkan. Në njëfarë mënyre,
kjo është fatkeqësi për tërë regjionin.
Rezultatet e zgjedhjeve të sivjetshme në Bosnjë,
ku nacionalistët sërish dolën në krye, pastaj
kriza politike në Serbi, si dhe statusi ende i pavendosur i
Kosovës, e theksojnë nevojën e madhe që ekziston
për prani evropiane.
|