Raporti
suedez kritikon vendet e Ballkanit
Shkruan:
Shqiptar Oseku
Shtetet
e Ballkanit janë në rrugë të mbarë drejt
respektimit të të drejtave të njeriut, por abuzimet
janë ende të numërta dhe mu organet zyrtare janë
fajtore për shumë prej tyre.
Ky
përfundim e përshkon si pe i kuq vlerësimin e qeverisë
suedeze rreth të drejtave të njeriut.
"Raporti
për Gjendjen e të Drejtave të Njeriut në Botë",
si quhet zyrtarisht ky vlerësim, përpilohet nga ambasadat
suedeze nëpër botë e përmbledhet për qeverinë
një herë në vit nga zyrtarët e Departamentit
të Jashtëm. Deri sot, ky raport ka qenë sekret shtetëror
e është ruajtur rreptësisht në kasafortat e
departamentit dhe të qeverisë. Heqja e siglave të
sekretit nga dosja e raportit u vendos nga qeveria suedeze pas Vitit
të Ri, si "një hap simbolik drejt transparencës
ndërkombëtare në fushën e të drejtave themelore
të njeriut".
Ndër
të papriturat e këtij raporti janë toni kritik kundër
Greqisë, partnere e Suedisë në BE, si dhe vështrimi
jashtëzakonisht kritik ndaj IRJM-së (Ish Republikës
Jugosllave të Maqedonisë).
Greqia
përmendet si shtet që e pranon vetëm ekzistencën
e komunitetit "mysliman" konform Ujdisë së Lozanës
nga v. 1923, por që hedh poshtë ekzistencën e minoriteteve
tjera. Qeveria suedeze vëren se ka pikëpyetje rreth lirisë
religjioze në vend. Vërehet, poashtu, se Greqia nuk e
ka ratifikuar "Konventën për Mbrojtje të Minoriteteve
Kombëtare" të Këshillit Evropian, e as "Kartën
për Gjuhë Regjionale e Minoritare". Qeveria suedeze
vëren se "Ligji për hyrjen dhe banimin e ardhësve"
që u miratua në prill 2001 është kritikuar për
shkelje të të drejtave themelore të ardhësve,
mes të cilëve shumica dërmuese janë shqiptarë.
Poashtu, raporti i cekë edhe kritikat e shpeshta për keqtrajtime
policore kundër ardhësve në Greqi.
IRJM-ja
është shteti i vetëm që bukvalisht "shitohet"
nga ky raport. Ai cilësohet në parim si republikë
bananesh, ku "korrupsioni është i përhapur",
ku administrata është ende "shumë largë
standardit perëndimor", ku "legjislacioni e gjyqësia
janë të mangëta", e ku "ekonomia është
në prag të katastrofës".
Qeveria
suedeze vëren veçmas se IRJM-ja nuk e ka nënshkruar
"Kartën për Gjuhë Regjionale e Minoritare".
Stokholmi zyrtar i vlerëson luftimet më 2001 si "kryengritje"
e thekson se mbarimi i saj e gjeti UÇK-në në kontroll
të mbi 130 fshatrave.
Raporti
thekson se ka "kallëzime të shpeshta" për
tejdhunë policore kundër minoriteteve, e se "keqtrajtimi
i personave është pjesë e 'punës normale' të
policisë". Raporti veçon masakrin në Luboten,
"me ç'rast u vranë dhjetëra civilë, u
shkatërruan shtëpi, e u arrestuan dhe u keqtrajtuan brutalisht
qindra burra". "Sipas mediave lokale, Ministri i Brendshëm
ishte prezent në katund gjatë tërë kohës",
thotë raporti. Poashtu përmendet rasti i keqtrajtimit
policor të katër vizituesve shqiptarë në spitalin
e Shkupit, të cilët së pari "u rrahën në
rrugë nën brohori të turmave, pastaj brenda në
spital, e së mbrami në stacion policor. Një prej
të katërve më vonë vdiq."
"Në
asnjërin prej rasteve të dhunës policore, prokurori
as që është lodhur ta nisë procedurën hetimore",
vëren veçmas qeveria suedeze. Pas luftës, "brutaliteti
policor po vazhdon e të eksponuarit janë në parim
pa mbrojtje juridike. Policët në praktikë janë
të çliruar prej ligjit".
Aspak
më pozitiv s'është as vlerësimi rreth gjyqësisë
në IRJM. "Gjyqtarët zgjedhen nga parlamenti dhe e
mbajnë detyrën përjetë. Vendimet gjyqësore
kanë shpesh motive politike apo janë të prekura prej
korrupsionit", vlerëson qeveria suedeze. "Nëse
pala e dobët përkundër të gjitha gjasave fiton
kundër palës së fortë, s'ekziston ndonjë
menkanizëm për ta çuar në vend vendimin e
gjyqit".
Për
sa i përket lirisë së fjalës, qeveria suedeze
mendon se cilësia gazetareske "është fundosur
edhe më thellë" gjatë dhe pas kryengritjes.
"Pohimet e pavend e akuzat për ta përçmuar
grupin tjetër etnik dhe bashkësinë ndërkombëtare
janë rregull e jo përjashtim", shkruan raporti, me
adresim të qartë ndaj mediave sllave. Raporti vëren
se qeveria e ka ndërprerë disa herë punën e
kanalit MTV2 në TV-në e shtetit, për shkak të
"mosmarrëveshjeve se si duhet prezentuar lajmet".
Qeveria suedeze vëren, poashtu, se gazeta më e madhe e
vendit, "Dnevnik", e cila pjesërisht financohet edhe
me ndihma prej Agjencisë Suedeze për Zhvillim Ndërkombëtar
SIDA, gjatë luftës "shpesh herë hoqi dorë
prej pavarësisë redaksionale".
"Sllavo-maqedonët
dhe shqiptarët jetojnë ndarazi në shoqëri…
Nxënësit shqiptarë përbëjnë 30 % në
fillore, 17 % në gjimnaz dhe vetëm 5 % të ulta në
fakultet. Andaj, mund të thuhet se ndarja e fondeve arsimore
i diskriminon shqiptarët për sa i përket arsimit
sipëror. Në vitin 2020 parashikohet se nxënësit
shqiptarë do ta përbëjnë 50 % të fillores.
[Andaj] është me rëndësi që të rritet
numri i shqiptarëve që i vijojnë studimet",
konstaton qeveria suedeze.
"Sipas
shifrave zyrtare shqiptarët janë rreth 24 % e popullsisë,
ndonëse në realitet çmohet se ata përbëjnë
rreth 1/3-tën, por ata vetë dhe maqedonasit i vështrojnë
[shqiptarët] si shtetas të dorës së dytë,
si ekonomikisht, ashtu edhe politikisht. Niveli arsimor ndër
shqiptarët është më i ulët, papunësia
më e lartë, e përfaqësimi i tyre në organet
e institucionet shtetërore i mangët. Shumica e vlerësuesve
ndërkombëtare janë dakord se komuniteti shqiptar
ka qenë i privuar në shumë aspekte", konstaton
në një pasus të veçantë raporti i qeverisë
suedeze.
"Ligji
për shtetësi nga viti 1992 është kritikuar ashpër
prej vlerësuesve ndërkombëtarë. Maqedonasve
u jepet shtetësia automatikisht. Për shqiptarë bëhet
dallim mes atyre që kanë banuar në vend një
kohë të gjatë dhe atyre që kanë ardhur
'rishtazi', dtth qe 10 vjet, e që për shkaqe të ndryshme
nëpër pasaportat e vjetra jugosllave nuk e kishin të
shkruar troç se ishin me banim në Maqedoni. Lënda
është e koklavitur, por rezultati është se persona
me banim më të shkurtër në këtë vend,
sidomos ata në katundet malore të veriut, ende s'e kanë
të rregulluar as shtetësinë", thekson qeveria
suedeze.
Federata
serbomalazeze lavdërohet për taktin e ndërrimeve
pas rrëzimit të Millosheviçit, por kritikohet për
reforma të ngadalta në gjyqësi, në ushtri e
në polici, si dhe për bashkëpunim "të mangët"
me gjykatën e Hagës. Qeveria suedeze vëren se Beogradi
nuk e ka ratifikuar Protokolin Fakultativ për Ankesa Private,
që do t'ia mundësonte çdo shtetasi të ankohet
direkt pranë Komitetit të OKB-së për të
Drejta të Njeriut.
"Shqiptarët
në RFJ kanë ende qasje më të mangët në
punëra komunale e në shërbime publike, gjë që
vërehet veçanërisht qartë në Serbinë
jugore", thekson qeveria suedeze.
Poashtu,
Stokholmi zyrtar vëren se rastet e raportuara të brutalitetit
policor hetohen tepër rrallë. Raporti i përmend edhe
dyshimet se politikanët e tanishëm "janë munduar
ta ndikojnë" procesin gjyqësor p.sh. në raste
kur të akuzuarit kanë qenë punonjës të
sigurimit shtetëror.
Shqipëria
lavdërohet për progesin politik të arritur me dakordim
të blloqeve oponente. "Ekziston shpresë se ky klimat
i bashkëpunimit mes qeverisë e opozitës do ta promovojë
stabilitetin e vendit", konstaton raporti. Raporti e lavdëron
"pavarësimin e shtuar" të mediave shqiptare,
"të analistëve të pavarur e të komentatorëve",
kundrejt pushtetit, por tërheq vëmendjen se shteti po
orvatet të gjejë mënyra për të ushtruar
ndikim të paligjshëm kundër mediave.
Qeveria
suedeze vëren se Tirana "i ka nënshkruar të
gjitha dokumentet qendrore" për të drejta të
njeriut. Por Shqipëria kritikohet për institucione të
dobëta, për korrupsion të lidhur me krimin e organizuar,
si dhe për "shoqëri fisnore ku mbretëron dhuna
". "Nuk ka dëshmi për vrasje a zhdukje politike,
por meqë dhuna mbretëron në shoqëri e politika
s'është shkoqur gjithmonë krejt prej krimit, prapavija
e disa vrasjeve dhe akteve të dhunës mbetet e turbullt",
shkruan në raport.
Raporti
i lavdëron nismat e qeverisë shqiptare për bashkëpunim
regjional kundër krimit të organizuar e trafiqeve të
paligjshme, por cekë se ka pasur raporte për brutalitet
policor. Kritika më e ashpër drejtohet kundër gjyqësisë
shqiptare, e cila quhet "inefektive, thellësisht e korruptuar
dhe një ndër pengesat më serioze kundër zhvillimit
të vendit në drejtim demokratik". "Palët
në gjyqësi kanë mosbesim ndaj njera-tjetrës,
ndërsa shpesh herë bashkëpunojnë ngusht me krimin
e organizuar", thuhet në raport.
Qeveria
suedeze vëren, poashtu, se ligjet e ashpra të kanunit
i kanë ngujuar 5 000 familje shqiptare, duke ndikuar keq në
ekonominë vendore, si dhe në fëmijët e gratë
e burrave të ngujuar. "Niveli i dhunës është
aq i lartë sa vendasit nuk ndjehen të sigurtë natën
jashtë shtëpive të veta", veçon raporti.
Në
raport theksohet veçmas pozita e rëndë e gruas
dhe e fëmijës në shtetet e Ballkanit, për shkaqe
jo vetëm socioekonomike, por edhe kulturore. Veçmas
përmendet Shqipëria, si "patriarkat" ku gruaja
"më shumë nga tradita se sa nga religjioni"
është e diskriminuar. "Vetëm 2 nga 19 ministrat
dhe 8 nga 140 parlamentarët janë gra", theksohet
në raport. "Dhuna shtëpiake nuk dënohet, kurse
trafikimi i femrave ka nisur ta prek edhe moshën 14-17 vjeç",
vëren qeveria suedeze. "Vajzat e trafikuara dhunohen,
kërcënohen e vriten prej pronarëve të tyre,
kurse po shpëtuan gjallë, atëhere gjykohen e leqiten
prej familjeve të veta".
Shqipëria
veçohet për të keq edhe në lëmin e kujdesit
shoqëror për fëmijët. Ajo ka rënë
në vendin e 90 nga gjithsejt 175 përnga mortaliteti i
fëmijëve nën 5 vjeç, ndërsa ¼
e fëmijëve në Veri vuajnë nga malnutricioni.
Askush nuk gjobitet për fëmijët që s'vejnë
në shkollë e që vihen në punë ilegale qysh
në moshë të re, ndërkaq dhjetëra-mijëra
shqiptarë të vegjël janë të prekur prej
gjakmarrjes, përfundon raporti.
Në
anën tjetër, raporti suedez e veçon Shqipërinë
si shembull të respektit për minoritete etnike. Raporti
përmend se ka pasur kontraversa rreth numrit të minoritetit
grek, por e lavdëron frymën liberale ndaj shkollimit të
minoritarëve si dhe punësimin e tyre në adminsitratën
e shtetit. Është interesant p.sh. të vërehet
se Greqia përmendet në ton shumë më kritik se
Shqipëria në këtë aspekt. Se a varet kjo nga
kandari fort i saktë suedez, a nga njohja më e madhe me
Greqinë, apo nga niveli më i lartë i ambicieve ndaj
një vendi anëtar në NATO e në BE, kjo mbetet
për t'u qartësuar.
Botimi
i këtij raporti ishte befasi për opinionin suedez. Përmbajtja
e tij është mbajtur supersekret, meqë është
druajtur se botimi do t'i sillte dëm marrëdhënieve
ndërkombëtarë të Stokholmit zyrtar. Por vet
ekzistenca e raportit ka qenë fshehtësi publike tash sa
kohë. Pos tjerash, ky raport ka pasur gisht edhe në fatin
e dhjetëra mijëra azilantëve shqiptarë në
këtë vend, meqë të dhënat nga ky raport
janë përdorur si nënshtresë nga autoritetet
e imigracionit - pa iu ofruar për shikim as azilantëve,
e as avoketërve të tyre.
Pikëpamjet
e Stokholmit zyrtar kanë rëndësi edhe për shkak
të peshës së konsiderueshme të Suedisë
në organet e institucionet e bashkëpunimit ndërkombëtar.
Diplomacia suedeze, e painkuadruar në NATO e anëtare në
BE, loz një rol kyç në shumë prej arenave
ndërkombëtare, e para së gjithash në OKB. Ku,
poashtu, vepron një numër i madh i frilansëve joqeveritarë
suedezë.
Raporte
të ngjashme për të drejtat e njeriut bëjnë
shumë shtete të botës, e ndër ta më i njohuri
është sigurisht ai i Departamentit të Shtetit amerikan.
Vitin e kaluar, një raport të tillë e botoi për
herë të parë edhe Kina komuniste. Në raportin
kinez për gjendjen e të drejtave të njeriut në
botë u sulmuan egërsisht SHBA-të për abuzime
masive: incidentalisht, raporti amerikan 1 muaj më herët
e kish kritikuar ashpër pikërisht Kinën.
Pos
shteteve të përveçme, raporte të këtilla
përpilojnë rregullisht edhe shumë organizata joqeveritare,
si p.sh. Human Rights Watsch, Amnesty International etj, si dhe
aso që merren me këqyrjen e të drejtave të grupeve
të veçanta, si të grave, të fëmijëve,
etj.
Edhe
institucionet ndërkombëtare e kanë zakon t'i përpilojnë
raportet e veta. Para dy javësh, vet Suedia u gjykua në
një raport të ekspertëve të Këshillit të
Evropës për "tejdhunë policore kundër ardhësve"
si dhe për "një klimat ku policët nuk preken
prej ligjit."
(Raporti
suedez për vitin 2002 gjendet këtu)
|