Mëma
e të gjitha luftërave
Shkruan:
Shqiptar OSEKU
Thonë
se e keqja është e vetmja që këputet prej së
trashi. Po sikur kjo të ishte e vërtetë, Sadam Huseinit
të Irakut do t'i kish ardhur fundi atëhere kur vrau mëse
1 mil njerëz gjatë agresionit kundër Iranit, ose
kur i mbyti me gaz 6 000 civilë kurdë në qytetin
Halabxha. Apo, fundja, atëhere kur e pushtoi vendin e vëllezërve
të vet arabë, Kuvajtin, e kur ushtarët e tij i hedhën
dhjetëra foshnje kuvajtiane prej kuvozave për t'i transportuar
këto për në Bagdad.
Si
shumë shprehje tjera "të urta", edhe kjo për
të keqen ngjan se është shpikur për ta ngushëlluar
të dobëtin. Në fakt, historia s'ta ofron as një
shembull të "këputjes prej së trashi",
ndërsa vlon prej rasteve kur diktaturat janë rrëzuar
tek pas dobësimit. Amerikanët sot po ia marrin masën
Sadam Huseinit jo pse është më i fortë se kurrë,
po përkundrazi, pse është pjekur tamam për ta
këputur.
Sikur
Sadam Huseini të mos ishte ai maniak që është,
sigurisht se do ta hidhte një sy vetes. Plak trashalluq e me
peruke, që nuk shfaqet dot me syze për t'i fshehur shenjat
e plakjes, i leqitur prej botës, i urrejtur prej shtetasve
të vet, i braktisur prej familjarëve, e i mnershëm
edhe për fëmijët e vet.
Sekush
tjetër në lëkurën e tij doemos që ta nxirte
veten në pension, për ta shmangur një luftë
shkatërruese e krejtësisht të pashpresë. Por
jo ai. Në vend të kësaj, ai planon skëterrën.
Për amerikanët. Për shumicën e irakianëve
që janë kundër tij. E në fund, sigurisht, edhe
për veten e fëmijët e vet. Paralelet me Hitlerin
janë të dukshme, ndonëse thonë se diktatori
i Irakut e mban në mur portretin e Stalinit.
E
megjithatë, qëmoti një diktator s'ka gëzuar
më shumë mbështetje në opinionin perëndimor
se sa sot ky Sadam Huseini i Irakut. Nota bene që thashë
mbështetje, e jo simpati. Të gjithë kritikët
e luftës në Irak e ndjekin ritualin e distancimit prej
tij si person - thuase kjo lozka rol.
Ajo
që loz rol, është se Uashingtoni e ka ndërmend
ta spastrojë një ndër diktaturat më të
përgjakshme të botës arabe. E se kritikët po
protestojnë kundër. Duke e trimëruar kështu
Sadamin ta bëjë namin. Me arsyetimin se për ta, kjo
luftë "it's nothing personal", s'ka motive personale.
Ne
e dimë se Sadam Huseini i ka vdekur mëse 1 mil (!) njerëz.
Se ai absolutisht e ka ndërmend të bëjë sherr
sërish, sapo t'i jepet rasti. Se 6 500 armë kimike për
shkatërrim masiv janë "zhdukur pa gjurmë"
prej bazave të tij, në pritje të këtij rasti.
E që ai ka lozur si macja me miun me inspektorët e OKB-së,
të cilët i pat thirrur vet solemnisht och të cilëve
u pat premtuar "çfarëdo lloj ndihme".
Pika
e parë e shkel tërë kartën e OKB-së. Mbetja
e shkel çdo nen të çdo rezolute që është
votuar për Irakun në KS të OKB-së gjatë
këtyre 20 vjetëve të mbrama. Por kritikët e
luftës s'e çojnë mendjen deri atje për OKB-në.
Kjo
hipokrizi ma kujton kohën kur amerikanët bombardonin serbët.
Millosheviçi qe njëmend një antipatik i cili kutërbonte
krim prej së largu, por prapë së prapë, lufta
qe gabim, obobo! Ishte gabim parimor, kushtonte jetëra, dhe
fundja s'po luftonte OKB-ja po NATO-ja...
Argumentet
po përsëriten. Sikur edhe thënësit e tyre.
"Të
bombardosh për paqe është si të qihesh për
të mbetur virgjëreshë", citohej asokohe një
thënie e vërtetë a e trilluar e gazmorit Zhak Shirak.
Ndërsa gjyshja ime 72 vjeç, mbesa 6 vjeç, e rreth
1 mil njerëz tjerë po zboheshin prej vatrave të veta
të rrënuara, për t'u grahur si bagëtitë
matanë Alpeve Shqiptare.
Në
qytezën e Trelleborgut në Suedi, një majtist i trullosur
e thirrte tim at në telefon për ta ftuar atë të
marrë pjesë në demonstratat kundër "imperializmit
amerikan": ndoshta s'kam nevojë të sqaroj në
detaj se si mbaroi ajo telefonatë.
Pika
e dobët e kësaj opozite kundër luftës, dje sikur
sot, mbetet falsiteti i saj. Sepse nuk është fjala për
opozitë kundër luftës, po për kritikë të
panuancuar antiamerikane.
Mbaj
mend që ishte bukur zbrazët nëpër barrikada
atyre viteve kur protestoja kundër luftërave të Millosheviçit
nëpër Evropë. Të cilat, meqë ra fjala,
kanë kushtuar më shumë jetëra se të gjitha
luftërat amerikane këtyre 20 vjetëve të fundit.
Njësoj është sot kur azilantët irakianë
demonstrojnë pro bombardimit të Sadamit. Dhe deri tani
s'më ka rënë të shoh ndonjë mësymje
shesheve e rrugëve të Evropës për të demonstruar
kundër gjenocidit rus në Çeçeni, apo atij
kinez në Tibet. Asnjë politikan, aktor a celebritet tjetër
s'shihet atje as me tejqyrë, ju premtoj.
Kritikët
e luftës janë, si të themi, bukur sqimatarë
kur i zgjedhin luftërat e veta. Sa për vete, unë
s'ju besoj fare. Në fakt, i trembem mendjemadhësisë
së tyre e s'besoj në moralin tyre vezullues: sa më
e lartë diploma e tyre akademike, aq më e rrezikshme dyfytyrësia.
Ekziston
edhe një problem tjetër me këtë lloj "pacifizmi".
Opozita e mirëfilltë, humaniste, kundër çdo
lufte bazohet te brenga për fatin e viktimës, të
njeriut të thjeshtë. E sot s'ka bir nëne që
guxon të pohojë se njeriu i thjeshtë, irakiani i
thjeshtë, humbet nëse rrëzohet Sadam Huseini; madje
përkundrazi.
Kritikët
e luftës mbase kanë të drejtë kur thonë
se humbet OKB-ja, se humbet ligji ndërkombëtar, madje
ndoshta edhe kur thonë se SHBA-të kanë motive të
dyshimta: unë s'ia mbaj qiririn Bushit që të di se
ç'mendon ai. Por një gjë e di: irakiani i thjeshtë
fiton me rënien e Sadam Huseinit. Kjo mjafton për mua.
Kurse
OKB-ja, paj le të humbas! Le të humbas edhe e drejta ndërkombëtare!
Në rrotë të s'ëmës le të vejnë
të gjitha konstruksionet juridike, që u kanë shërbyer
e u shërbejnë ende diktatorëve për t'i ruajtur
fronet e veta të përgjakura! Në fund të fundit,
OKB-ja dhe e drejta ndërkombëtare janë shpikur për
njeriun e thjeshtë, e jo anasjelltas.
Lufta
në Irak kushton jetëra? Pse, Sadam Huseini s'paska kushtuar
e s'kushtoka ende jetëra - përditë?
Lufta
destabilizon? S'dua të përsëritem si papagall. Vetëm
të shtoj se një shtet të cilit i duhet një Sadam
për t'u mbajtur më këmbë meriton të destabilizohet.
Të destabilizohet në rrotë të samës, në
më ndjeni.
Mos
mendoni se besoj në motivet amerikane, larg qoftë. Dora
në zemër, s'më kërset fare për motivet
amerikane, a për motivet e Bushit.
Ajo
që më intereson është ajo se të gjithë
irakianët që s'janë masha të Sadam Huseinit
e lavdërojnë Allahun, ashtu si gjyshja ime para pak vjetësh,
që amerikanët e paskan gjetur një shkas për
të ndërhyrë. Ndoshta ata e lavdërojnë edhe
Bin Ladinin që u bë shkas, ku ta di: faktikisht, do të
kishin plotësisht të drejtë.
Por
kaq kupton edhe kjo rradakja ime, se pa një shkas të vetin
s'i jep kush dy qindarka për irakianët. Ashtu si s'i kishin
dhënë dje për shqiptarët. Ashtu si s'i japin
as sot për çeçenët, e për tibetanët.
SHBA-të
kërkonin Bin Ladinin, e rrëzuan talibanët. Ata kishin
interesa të vetat në Bosnje e në Kosovë, për
ta ruajtur imazhin e vet nëmos diçka tjetër, e
ndërmorrën operacione masive për relata me publikun,
me ndihmën e zëdhënësve të vet B17 e Tomahavk.
20 mil afganë, 2 mil boshnjakë, e 8 mil shqiparë
do t'u jenë mirënjohës për jetë të
jetës, edhe në mos u qoftë mirënjohës askush
tjetër. E nëse irakianët kanë fat, kalorësia
amerikane do të arrijë edhe te ata në momentin e
fundit, bash si në filma: "Yeeehaa Yankeeees!"
E
vetmja që më mbetet të shpresoj është se
SHBA-të pas Irakut do të kuptojnë se Al Kaida është
jashtëzakonisht aktive edhe në Arabinë Saudike, në
Kuvajt, në Kashmir, e në Algjeri. Meqë ra fjala,
e kam nga një burim shuuuumë i sigurtë se Bin Ladini
po fshehet në Çeçeni. Apo mos qe në Turkistanin
Lindor në Kinë...?
|