Me qindra shqiptarë nga Bujanovci e Presheva kanë ardhur në Kosovë të kërcënuar nga forcat serbe, pas largimit të këtyre të fundit nga Kosova.

Agjencia franceze e lajmeve ka pyetur dhjetë shqiptarë, në Prishtinë e rrethinë dhe në rrethinën e Gjilanit, të ikur nga këto anë. Ata kanë deklaruar se fshatra të tëra janë zbrazur nga shqiptarët pas ardhjes së forcave serbe, të cilat u tërhoqën sipas marrëveshjes me NATO-n.

Atla Solbeck, përfaqësuese e Komisariatit të lartë për Refugjatë i OKB-së në Gjilan, i ka deklaruarr të njëjtës agjenci se, 2000 deri në 3000 fshatarë, fshatrat e të cilëve janë afër Kosovës, kanë ardhur javëve të fundit në këtë qytet. Disa nga këta janë vendosur në familje, disa në qendra të pritjes në të cilat marrin disa ndihma, kurse ka nga ata të cilët kalojnë kufirin për t'i punuar arat e tyre.

Fshatarët kanë deklaruar se ka një lëvizje të madhe nga regjionet e Preshevës, Bujanocit, Medvegjës dhe Vranjës në drejtim të Kosovës.

Naimi me familje ka ardhur në Prishtinë me 15 korrik nga fshati Gërbavc. Në shtëpi kanë lënë vetëm gjyshin për të ruajtur pasurinë. Naimi thotë se, "kanë ardhur njerëz me uniforma dhe na ka thënë se do të fillojnë luftën edhe këtu ashtu siç kanë bërë dhe në Kosovë".

Në shkollën e një fshati kanë qenë të vendosur afër 1200 veta, serbët vinin rregullisht në grupe gjashtë apo shtatë veta, i binin derës së shtëpisë me forcë për të kërkuar kafe, alkool dhe femra, thotë një mësues, i cili nuk tregon emrin për shkaqe sigurie, sepse familja e tij është ende në fshat. Ai shton " thyenin çdo gjë e merrnin çka të donin". Gruaja dhe vajzat e tij kanë qëndruar të fshehura deri sa me rritjen e shtypjes dolën në mal dhe nga atje erdhën në Kosovë.

Në Tupallë, tregon një tjetër, paraushtarakët ishin vendosur në një banesë afër tij. Ata e pengonin të dilte nga banesa për të shkuar e për të blerë në Medvegjë. Pas përfundimit të luftës në Kosovë, situata u acarua së tepërmi, për të, gruan dhe 4 djemtë e tij, të moshës 4 deri në 16 vjeç. Ushtarë apo paraushtarakë, nuk kishte mundur t'i njihte "kishin zënë një shtëpi afër Xhamisë dhe aty dërgonin femra" por nga turpi nuk e përmendi fjalën "dhunim".

Në Gjilan, Emrushi 28 vjeçar, i traumatizuar thotë "Paramilatarët vinin çdo ditë, ata kërkonin që t'ju tregoja se ku është një pilot amerikan, avioni i të cilit paska rënë në këtë rajon, në përendim të qytetit të Vranjës.

Shumë fshatarë kanë ikur nga frika se do t'i ekzekutojnë pasi kanë parë se serbët po hapnin gropa të mëdha. Tash për tash ka vetëm këto të dhëna nga Komisariati i lartë për Refugjatë i OKB-së në Gjilan.

Në Prishtinë zëdhënësi i këtij Komisariati, Ron Redmond, ka thënë se ka disa qindra shqiptar të regjionit të Preshevës, Bujanocit e Medvegjës që janë të strehuar në Maqedoni.

AFP